އިންގްލެންޑަށް ވޯލްޑް ކަޕް ހޯދައިދިން ކީޕަރު ގޯޑަން ބޭންކްސް މަރުވެއްޖެ
12 ފެބުރުއަރީ 2019 | އަންގާރަ 18:15ހުނަރުވެރި ކީޕަރު މަރުވީ އުމުރުން 81 އަހަރުގައި ގުދުރަތީ މަރަކުން
އިނގިރޭސި ކީޕަރު ގޯޑަން ބޭންކްސް
އިނގިރޭސިވިލާތަށް ފުޓުބޯޅަ ވޯލްޑް ކަޕް ހޯދައިދިން މަޝްހޫރު ކީޕަރު ގޯޑަން ބޭންކްސް، އުމުރުން 81 އަހަރުގައި މަރުވެއްޖެއެވެ.
ގޯޑަން ބޭންކްސްއަކީ ދުނިޔޭގެ އެއްމެ މޮޅު ކީޕަރުންގެ ލިސްޓުގައި ގިނަ މީހުން ހިމަނާފައިވާ ހުނަރުވެރި ކީޕަރެކެވެ. އިނގިރޭސި ޕްރިމިއަރ ލީގުގައި ކުޅޭ ސްޓޯކް ސިޓީއަށާއި ލެސްޓަރ ސިޓީއަށް ކުޅެފައިވާ ކީޕަރު ގިނަ މީހުންނަށް އެނގެނީ އޭނާ ގައުމީ ޓީމަށް ކުޅެމުން މަތަކޮށްފައިވާ މޮޅެތި ބޯޅަތަކުގެ ސަބަބުންނެވެ.
ބޭންކްސް މަރުވުމާއި ގުޅިގެން ފުޓުބޯޅަ އާއިލާގެ ގިނަ ފަރާތްތަކަކުން ވަނީ އޭނާގެ އާއިލާއަށް ތައުޒިޔާ ފޮނުވާފައެވެ. މީގެ ތެރޭގައި އެހާރާއި މިހާރުގެ ގިނަ ފުޓުބޯޅަ ތަރިން ހިމެނެއެވެ. ބޭންކްސް މަރުވީ ވާހަކަ އެއްމެ ފުރަތަމަ އޭނާގެ އާއިލާއާއި ހަވާލާދީ ހާމަކުރީ އޭނާގެ ކުރީގެ ކުލަބު ސްޓޯކް ސިޓީންނެވެ.
ވޯލްޑް ކަޕް ކާމިޔާބު ކުރުމާއި ގުޅިގެން ބޭންކްސް ވަނީ 1970 ވަނަ އަހަރު އޮފިސަރ އޮފް ދަ ބްރިޓިޝް އެމްޕަޔަރގެ ލަގަބު ހޯދާފައެވެ.
