ފެލިވަރުގައި ކާނާ ވިހަވެގެން އުޅޭ ކަމަށް ޚަބަރު ފަތުރަނީ މައުލޫމާތު ނުހޯދާ: މިފްކޯ
އެތަނުގެ ސާފުތާހިރު ކަމަކީ ބައިނަލް އަޤުވާމީ މިންގަނޑު ތަކެއްގައި ބަލަހައްޓަމުން އަންނަ ތަނެއް ކަމަށް މިފްކޯއިން ބުނި
ފެލިވަރު މަސްފެކްޓްރީގައި މަސްބަންދު ކުރަނީ
ޅ.ފެލިވަރުގައި ކާނާ ވިހަ ވުމުގެ ސަބަބުން ގިނަ އަދަދެއްގެ ބަޔަކަށް ފަރުވާ ދެމުންދާކަމަށް ފެތުރެމުންދާ ޚަބަރަކީ ކަމުގެ ފުރިހަމަ މައުލޫމާތު ނުހޯދާ ފެތުރެމުންދާ ޚަބަރެއް ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ބުނެފިއެވެ.
މިފްކޯއން ނެރެފައިވާ ނޫސްބަޔާނެއްގައި ބުނެފައިވަނީ ފެލިވަރަކީ ރާއްޖޭގައި އެންމެ ފުޅާދާއިރާއެއްގައި ކާބޯތަކެތި އުފައްދާ ކާރުހާނާއެއް ހިންގާ ތަނަކަށް ވީހިނދު އެތަނުގެ ސާފުތާހިރު ކަމަކީ ބައިނަލް އަޤުވާމީ މިންގަނޑު ތަކެއްގައި ބަލަހައްޓަމުން އަންނަ ތަނެއް ކަމަށެވެ.
އެހެންކަމުން ފެލިވަރުގެ މުވައްޒަފުންގެ ކެއިންބުޔުމަށް ބޭނުން ކުރާ ތަކެއްޗާއި އެތަކެތި ތައްޔަރު ކުރާ ތަންތަނާއި، ބޭނުންކުރާ ވަށީލަތްތަކުގެ ސަބަބުން މިފަދަ ކަމެއް ހިންގުމަކީ ވަރަށްވެސް ނާދިރު ކަމެއް ކަމަށް ބަޔާނުގައި ވެއެވެ.
ފެލިވަރުގައި ކާނާ ވިހަވުމުގެ ސަބަބުން ގިނަ އަދަދެއްގެ ބަޔަކަށް ފަރުވާ ދެމުންދާ ކަމަށް މީޑިއާގައި ފެތުރެމުންދާ ޚަބަރަކީ ކަމުގެ ފުރިހަމަ މައުލޫމާތު ނުހޯދާ ފެތުރެމުންދާ ޚަބަރެއް ކަމަށް މިފްކޯއިން މައުލޫމާތު ދެއެވެ.
