އެންމެން ގުޅިގެން ކުރާ މަސައްކަތްތަކުގައި މުޅި ޤައުމަށް ނަމޫނާ ބަޔަކަށް މުދައްރިސުން ވާންޖެހޭ: ނައިބު ރައީސް
9 ފެބުރުއަރީ 2019 | ހޮނިހިރު 03:35ސަރުކާރުން ކުރާ ކަމެއް ރަނގަޅަށް ކުރުމަށް ރައީސުލްޖުމްހޫރިއްޔާ އަބަދުވެސް އިސްކަން ދެއްވާ
ނައިބު ރައީސް ގއ. ވިލިނގިއްޔަށް ކުރެއްވި ދަތުރުފުޅުގެ ތެރެއިން
ހުރިހާ އެންމެން ގުޅިގެން ކުރާ މަސައްކަތްތަކުގައި މުޅި ގައުމަށް ނަމޫނާ ބަޔަކަށް މުދައްރިސުން ވާންޖެހޭ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ހުކުރު ދުވަހުގެ ރޭ ގއ. އޮތޮޅު ތަޢުލީމީ މަރުކަޒަށް ޒިޔާރާތްކުރައްވާ ނައިބު ރައީސް ދެއްކެވި ވާހަކަފުޅުގައި ތަޢުލީމީ ދާއިރާއަކީ ސަރުކާރުން އެންމެ އިސްކަމެއްދޭ އެއް ދާއިރާކަން ފާހަގަކުރެއްވިއެވެ. ސުކޫލުގެ މާހައުލުގައި އެކުވެރި މާހައުލެއް ޤާއިމުކުރުމަށް ނަސޭހަތްތެރިވެވަޑައިގެންނެވިއެވެ.
މި ބައްދަލުވުމުގައި ،ސަރުކާރުން ކުރާ ކަމެއް ރަނގަޅަށް ކުރުމަށް ރައީސުލްޖުމްހޫރިއްޔާ އަބަދުވެސް އިސްކަން ދެއްވާކަމުގައި ނައިބު ރައީސް ވިދާޅުވިއެވެ. އެގޮތުން ސަރުކާރުގެ ވަޒީރުންނާއި ސަރުކާރު ހިންގަވަން ތިއްބެވި ބޭފުޅުން ތިއްބެވީ ހަފްތާއަކު ހަތް ދުވަހު މަސައްކަތަށް ނުކުންނަވައިގެންވެސް ޤައުމުގެ ހާލަތު ރަނގަޅުކުރަން މަސައްކަތް ކުރެއްވުމަށް ތައްޔާރަށްކަމަށް އެމަނިކުފާނު ފާހަގަކުރެއްވިއެވެ.
ހުރިހާ ބޭފުޅުންވެސް ފަރުދީ ޒިންމާ އަދާކުރެއްވުމަށް ނަސޭހަތްތެރިވެ ވަޑައިގަންނަވަމުން ނައިބު ރައީސް ފައިސަލް ވިދާޅުވީ ކޮންމެ ފަރުދަކީވެސް ތިމާވެށި ހިމާޔަތްކުރަން މަސައްކަތްކުރާ މީހަކަށް ވުން މުހިންމު ކަމަށެވެ. އެގޮތުން ގދ އަތޮޅު ތަޢުލީމީ މަރުކަޒަށް ވަޑައިގެން އެ މަރުކަޒުގައި ރައީސުލްޖުމްހޫރިއްޔާގެ ނައިބު ވަނީ ގަހެއް އިންދަވައިދެއްވައިފައެވެ.
ރައީސުލްޖުމްހޫރިއްޔާގެ ނައިބު ފައިސަލް ނަސީމް، ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި ހުވަދުއަތޮޅު އުތުރުބުރީ ވިލިނގިއްޔަށް ވަޑައިގެން ގއ. އޮަތޮޅު ތަޢުލީމީ މަރުކަޒަށާއި، އަތޮޅު ހޮސްޕިޓަލަށް ޒިޔާރަތްކުރައްވައި އެ މުއައްސަސާތަކުގެ ހާލަތު ބައްލަވާލައްވައިފިއެވެ. އެމަނިކުފާނުވަނީ ގައްދޫ، ހޯނޑެއްދޫ ، މަޑަވެލި އަދި ތިނަދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާފައެވެ.
