ޕީޕީއެމް އާއި ޕީއެންސީ ކޯލިޝަން، ޕްރޮގްރެސިވް ކޮންގްރެސްގެ ފަރާތުން އަންނަ އެޕްރީލް މަހުގެ ހަވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވާދަކުރާ ކެންޑިޑޭޓުން ހޮވުމަށް ހަ ދާއިރާއެއްގެ ޕްރައިމަރީ ހުކުރު ދުވަހު ބާއްވަން ނިންމައިފިއެވެ.

ހުކުރު ދުވަހުގެ 3:00 އިން 6:00 ކުރިޔަށް ގެންދިޔުމަށް ހަމަޖެހިފައިވާ މި ޕްރައިމަރީ ބާއްވަނީ ފެލިދޫ ދާއިރާ، މ. މުލަކު ދާއިރާ  މަކުނުދޫ ދާއިރާ، އަލިފުށި ދާއިރާ، ތުލުސްދޫ ދާއިރާ، އަދި ކިނބިދޫ ދާއިރާއިން މަޖިލިސް އިންތިޚާބުގައި ވާދަކުރާނެ ކެނޑިޑޭޓުން ކަނޑައެޅުމަށެވެ.

މިއަދު ބާއްވާ ޕްރައިމަރީގައި 19 ކެންޑިޑޭޓުން ވާދަކުރާއިރު، ވޯޓުލުމުގެ ފުރުސަތު ދެ ޕާޓީގެ މެމްބަރުންނަށް ވެސް ލިބިގެންދާނެއެވެ. ވޯޓުލުން ކުރިޔަށް ދާނީ ޕްރައިމަރީ ބާއްވަން ހަމަޖެހިފައިވާ ރަށްތަކުގެ އިތުރުން މާލޭގައި ހުންނަ ޕީޕީއެމްގެ އޮފީހުގައެވެ.

މި ޕްރައިމަރީގައި ވ. ތިނަދޫ ފިޔަވައި އެހެން ހުރިހާރަށެއްގައި ވޯޓުލުން ކުރިއަށްގެންދާނެކަމަށް ވަނީ މައުލޫމާތު ލިބިފައެވެ. ޕީ.ޕީއެމް ޕަރައިމަރީގައި މީގެ ކުރިން ނޮޅިވަރަމް ދާއިރާއާއި ފުވައްމުލަކު އުތުރު ދާއިރާގެ ކެނޑިޑޭޓެއް ހޮވުމަށް ވޯޓުލުން ބާއްވަން ހިމެނި ނަމަވެސް އެ ދާއިރާތަކުގެ ވޯޓުލުން ހުކުރު ދުވަހު ނުބާއްވާނެކަން އެކޯލިޝަނުން ވަނީ އަންގާފައެވެ.

"ދެ ޕާޓީ ވުޖޫދުގައި އޮތްހާ ދުވަހަކަށް ދެމިގެން ދާގޮތަށް" ހެދި އެއްބަސްވުމުގައި ސޮއި ކުރައްވަމުން މީގެކުރިން އެ ޕާޓީން ބުނެފައިވަނީ މިހާތަނަށް ޕީޕީއެމްއިން މަޖިލިސް އިންތިޚާބުގެ ޓިކެޓު ދީފައިވާ ފަރާތްތައްވެސް ދެން އިންތިޚާބުގައި ވާދަކުރާނީ ޕްރޮގްރެސިވް ކޮންގްރެސް ކޯލިޝަންގެ ޓިކެޓުގައިކަމަށެވެ. އެ ކޯލިޝަނުން މިހާތަނަށް ޖުމްލަ 63 ދާއިރާއެއްގެ ޓިކެޓު ޕްރައިމަރީއަކާއި ނުލައި އެކި ފަރާތްތަކަށް ވަނީ ދީފައެވެ.