އާދަމް އާރިފު ޑްރަގް ކޯޓަށް ބަދަލުކޮށް، ކްރިމިނަލް ކޯޓަށް ދެ ފަނޑިޔާރަކު
6 ފެބުރުއަރީ 2019 | ބުދަ 18:06ގާޒީ އާދަމް އާެރިފު ބަދަލު ކުރަނީ ޑްރަގް ކޯޓަށް
ކްރިމިނަލް ކޯޓުގެ ގާޒީ އާދަމް އާރިފު:-މިހާރު އޭނާ ވަނީ ޑްރަގު ކޯޓަށް ބަދަލު ކުރަން ނިންމާފައި
ކްރިމިނަލް ކޯޓުގެ ގާޒީ އާދަމް އާރިފް ޑްރަގް ކޯޓަކަށް ބަދަލުކޮށް އާ ދެ ގާޒީއަކު ކްރިމިނަލް ކޯޓަށް އައްޔަން ކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
މި ނިންމުން ޖޭއެސްސީ އިން ނިންމީ ބުދަ ދުވަހު ބޭއްވި އެކޮމިޝަނުގެ ބައްދަލުވުމުގައި އެވެ.
ކްރިމިނަލް ކޯޓަށް ބަދަލު ކުރަން ނިންމާފައިވަނީ ޑްރަގް ކޯޓުގެ ގާޒީ އަލީ ރަޝީދާއި ސިވިލް ކޯޓުގެ ގާޒީ ހުސައިން ފާއިޒް ރަޝާދެވެ. މި ބަދަލު ގެންނަން ނިންމީ ދަށު ކޯޓުތަކުގެ ފަނޑިޔާރުން ބަދަލު ކުރުމާ ބެހޭ އުސޫލުގެ ދަށުން ސުޕްރީމް ކޯޓުން އެގޮތަށް ހުށަހެޅުމުން ނެވެ.
އާދަމް އާރިފް ވަނީ ވަގުތީ ގޮތުން ކްރިމިނަލް ކޯޓުން ހިންގުމާ ހަވާލުވެ ދުވަސް ކޮޅަކަށް ހިންގަވާފައި އެވެ. ކުރިން ޕްރޮސެކިއުޓާ ޖެނަރަލް އޮފީހުގައި ވަކީލެއްގެ ގޮތުގައި މަސައްކަތްކުރެއްވި އާދަމް އާރިފް ވަނީ ކްރިމިނަލް ކޯޓުގެ ގާޒީ ކަމުގައި ހުންނެވި ދުވަސްވަރު ޖިނާއީ ބޮޑެތި މައްސަލަތަކާއި ސިޔާސީ ބޭފުޅުންގެ މައްސަލަތައް ބައްލަވާފައި އެވެ.
ގާޒީ އަލީ ރަޝީދަކީ ކުރިން ވެސް ކްރިމިނަލް ކޯޓުގެ ގާޒީކަން ކުރެއްވި ބޭފުޅެކެވެ. ގިނަ ދުވަސްތަކެއް ވަންދެން ކްރިމިނަލް ކޯޓުގައި މަސައްކަތް ކުރެއްވުމަށް ފަހު 2011 ގައި އޭނާ ސިވިލް ކޯޓަށް ބަދަލުކުރީ އޭނާ އަމިއްލައަށް އެދިވަޑައިގަތުމުންނެވެ. ފަހުން ސިވިލް ކޯޓުގެ އިސް ގާޒީކަން ވެސް އޭނާ ކުރެއްވި އެވެ. އޭނާ ޑްރަގް ކޯޓަށް ބަދަލުކުރީ އޭގެފަހުންނެވެ.
