ވެނެޒުއޭލާގެ ވަގުތީ ރައީސަކީ ގައިޑޯ ކަމަށް ޔޫރަޕުގެ ބާރުތަކުން ބަލައިގެންފި

ވެނެޒުއޭލާގައި ރިޔާސީ އިންތިހާބެއް ބާއްވަން ޔޫރަޕްގެ ބާރުތަކުން ދިން މުހުލަތު ހަމަވުމާ ގުޅިގެން، އިދިކޮޅު ލީޑަރު ހުއާން ގައިޑޯއަކީ ވެނެޒުއޭލާގެ ރައީސްގެ ގޮތުގައި ބަލައިގަތުމަށް ޔޫރަޕުގެ ހަ ގައުމުކުން ނިންމައިފިއެވެ.

ގައިޑޯއަކީ ވެނެޒުއޭލާގެ ރައީސްގެ ގޮތުގައި ބަލައިގަންނަން ނިންމި ޔޫރަޕްގެ ގައުމުތަކަކީ ފަރަންސޭސްވިލާތް، އޮސްޓްރިއާ، ސްވިޑްން، ޑެންމަރކް، އިނގިރޭސިވިލާތް އަދި ސްޕެއިންއެވެ.

އިންތިހާބެއް ބާއްވަން ވެނެޒުއޭލާގެ ރައީސް ނިކޮލަސް މަޑޫރޯއަށް ދިން އަށް ދުވަހުގެ މުހުލަތު ހަމަވީ އާދިއްތަ ދުވަހުއެވެ. މަޑޫރޯ ވަނީ ގޮތްދޫނުކުރައްވާނެ ކަމަށް ވިދާޅުވުމަށް ފަހު، އެ ގައުމުގެ ހަމަޖެހުން ނަގާލަން ޔޫރަޕްގެ ގައުމުތަކުން މަސައްކަތް ކުރަމުން ގެންދާ ކަމަށް ތުހުމަތު ކުރައްވާފައެވެ.

ވަގުތީ ރައީސްއަކީ ގައިޑޯ ކަމަށް ބަލައިގަންނަން ޔޫރަޕުގެ ގައުމުތަކުން ނިންމާފައިވާ އިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ އަސްކަރިއްޔާ ފޮނުވަން އިހްތިޔާރު އެބަ އޮތް ކަމަށް ވިދާޅުވެ ވެނެޒުއޭލާގައި ބާރުގެ ބޭނުން ކުރަން ފަސްޖެހިވަޑައި ނުގަންނަވާނެ ކަމުގެ އިންޒާރުދެއްވާފައެވެ.