ހުދުމުޚުތާރުކަމާ ދެކޮޅަށް ލަންކާއިން ދިނީ އަގު ނުކުރެވޭ ފަދަ އެހީތެރިކަމެއް: ރައީސް ސޯލިހު
3 ފެބުރުއަރީ 2019 | އާދީއްތަ 13:07ރާއްޖެ ތަމްޞީލު ކުރުމަށް އެންމެ ފުރަތަމަ އޮފީހެއް ހުޅުވުނީ 1906 ވަނަ އަހަރު ކޮޅުނބުގައި
ރައީސް ސޯލިހު ލަންކާގައި ދިރިއުޅޭ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަނީ
ޚުދުމުހުތާރުކަމާ ދެކޮޅަށް ކުރެވުނު މަސައްކަތުގައި އަވަށްޓެރި ސްރީލަންކާއިން ރާއްޖެއަށް ދީފައިވާ އެހީތެރިކަމާއި އެއްބާރުލުމަކީ އަގު ނުކުރެވޭ ވަރުގެ އެހީތެރިކަމާއި އެއްބާރުލުން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ވިދާޅުވެއްޖެއެވެ.
ސްރީލަންކާގެ މިނިވަންދުވަހުގެ ރަސްމީ ހަފްލާ ޝަރަފުވެރިކޮށްދެއްވުމަށް އެ ޤައުމަށް ކުރައްވާ ފުރަމާނަ ދަތުރުފުޅުގައި އެ ޤައުމުގައި ދިރިއުޅޭ ދިވެހިންނާއި ބައްދަލުކުރައްވާ ރައީސް ސޯލިހު ވިދާޅުވީ، ސްރީލަންކާއަކީ ރާއްޖޭގައި ޑިމޮކްރަސީ ދިއުވައި އާލާކުރުމުގެ މުހިއްމު ހިއްސާދާރެއް ކަމަށެވެ.
"ރާއްޖޭގާ މަލްޓި ޕާޓީ ޑިމޮކްރަސީ ޤާއިމްކުރުމަށް ދެހާހުގެ ކުރީކޮޅުގެ އަހަރުތަކުގާ، ދިވެހިންގެ ބަޔަކު ހަށިފޮޅާލާފަ ނުކުތް. އެފަހަރުވެސް ވަރަށް ގިނަ ދަތިތައް ކުރިމަތިވެ، އޭރުގެ އިދިކޮޅު ސިޔާސީ ލީޑަރުންނަށް މަޖުބޫރުވީ ގާދޫކޮލުން ބޭރުވާން. އެފަހަރުވެސް އަޅުގަނޑުމެންނަށް ރައްކާތެރިކަން ލިބުނު އައްސޭރިއަކީ ސްރީލަންކާ. މިދިޔަ ފަސް އަހަރުގެ ތެރޭގާ ރާއްޖޭގެ ކަންކަން އިސްލާހު ކުރުމަށް ތެދުވި ވަރަށް ގިނަ ސިޔާސީ ލީޑަރުންނަށް ޖެހުނީ ކުރި ފަހަރުގެވެސް ދަތުރު (ކުރަން). ރާއްޖޭގާ އޮތް ޚުދުމުހުތާރު އަނިޔާވެރިކަމާ ދެކޮޅަށް ބައިނަލްއަޤުވާމީ ދުނިޔޭގެ ސަމާލުކަން ހޯދުމުގާ ސްރީލަންކާ ސަރުކާރާ ރައްޔިތުން ވެދިނީ އަގު ނުކުރެވޭހާ ބޮޑު އެހީތެރިކަމެއް"، ރައީސް ސޯލިހު ވިދާޅުވިއެވެ.
މީގެ 113 އަހަރު ކުރިން 1906 ވަނަ އަހަރު ރާއްޖެ ތަމްސީލު ކުރުމަށް ރާއްޖެއިން ބޭރުގައި ޤާއިމްކުރެވުނު ފުރަތަމަ އޮފީސް ޤާއިމު ކުރެވިގެން ދިޔައީ ސްރީލަންކާގައިކަން ފާހަގަކުރައްވާ، ރައީސް ސޯލިހު ވަނީ ދެ ޤައުމުގެ މެދުގައި އޮތް ގާތް ގުޅުމަށް އަލިއަޅުއްވާލައްވާފައެވެ.
އެގޮތުން ރާއްޖެއަށް ފުރިހަމަ ސިޔާސީ މިނިވަންކަން ހޯދުމަށް ކުރި މަސައްކަތުގައި ދިވެހިންނަށް އެންމެ ބޮޑު އެހީތެރިކަމެއް ދިނީ ސްރީލަންކާއިން ކަމާއި، ރާއްޖެ މިނިވަން ވުމާއި އެކު ހަމަ އެދުވަހު ރާއްޖެއާއި އެކު ސްރީލަންކާއިން ސިޔާސީ ގުޅުން ޤާއިމްކޮށް، ކޮޅުނބުގައި ރާއްޖޭގެ އެމްބަސީއެއް ޤާއިމް ކުރެވުނުކަން ރައީސް ފާހަގަކުރެއްވިއެވެ.
ސްރީލަންކާގައި 12،000 ށްވުރެގިނަ ދިވެހިން ދިރިއުޅެމުންދާއިރު، އެ ހުރިހާ ދިވެހިންނަކީ އެޤައުމުގައި ދިވެހިރާއްޖެ ތަމްޞީލުކުރާ މަންދޫބުންގެ ގޮތުގައި ސިފަކުރައްވައި، ރައީސް ސޯލިހު ވަނީ ދިވެހިންގެ އުޅުމާއި ގުޅުންތައް ބަހައްޓަންވާނީ ދެޤައުމުގެ ގުޅުން އިތުރަށް ބަދަހިވާނޭ ފަދައިންކަން ފާހަގަކުރައްވާފައެވެ. އަދި ސްރީލަންކާ ފަދަ ހުޅުވިފައިވާ މުޖުތަމަޢުއެއްގައި އުޅޭއިރު ދިވެހިންނާއި ވަކިވެގެން ނުވާނެ ދިވެހިވަންތަ ސިފަތައް ދެމެހެއްޓުމަށް ސަމާލުކަން ދޭން ވާނެ ކަން ފާހަގަކުރައްވައި، ރައީސް ސޯލިހު ވަނީ އަޙުލާޤީ ރީތި ސިފަތަށް ދެމެހެއްޓުމަށާއި، ނުރަނގަޅު ފިކުރުތަކުގައި ޖެހި ބައިބައިވުންތަކަށް މަގުފަހިވާފަދަ ވިސްނުންތައް ނުގެންގުޅުމަށް ނަސޭހަތްތެރި ވެވަޑައިގެންފައެވެ.
