ހުކުރު ދުވަހުގެ ރޭ ޖަމުއިއްޔަތުއް ސަލަފްއިން އަރަބިއްޔާ ސްކޫލް ހޯލްގައި ބޭއްވުމަށްޓަކައި އިޝްތިހާރު ކޮށްފައިވާ ދަރުސަކީ މިނިސްޓްރީން ކަނޑައަޅާފައިވާ އުސޫލުން ބޭރުން ހުއްދަ ނެގުމަކާއި ނުލާ އިޝްތިހާރު ކޮށްފައިވާ ދަރުސެއް ކަމަށް މިނިސްޓްރީ އޮފް އިސްލާމިކް އެފެއަރޒް އިން ބުނެފިއެވެ.
އިސްލާމިކް މިނިސްޓްރީން ބުނީ ޤާނޫނު ނަމްބަރު 6/94 ގައި ވާގޮތުން ދިވެހި ރައްޔިތުން ގެ ދީނީ އެއްބައިވަންތްކަން ހިމާޔަތް ކުރުމާއި ދީނީ ޝިއާރުތައް ފާޅުކުރުމުގެ ބެލެނިވެރި ފަރާތަކީ އެ މިނިސްޓްރީ ކަމަށެވެ. އަދި އެ ޤާނޫނުގެ ދަށުން މިނިސްޓްރީއަށް މަތިކުރެވިފައިވާ ޒިންމާގެ ދަށުން މިނިސްޓްރީގެ142-C1/CIR/2018/4 (1 ފެބްރުއަރީ 2018) ނަމްބަރު ސަރކިއުލާއިން، ދިވެހިރާއްޖޭގެ އެއްވެސް ތަނެއްގައި ދީނީ ނަސޭހަތް ދޭނަމަ މިނިސްޓްރީގެ ހުއްދަ ނަގަން ވާނެ ކަމަށް ވާނީ ދަންނަވާފައިވާ ކަމަށް މިނިސްޓްރީން ބުންޏެވެ.
މިނިސްޓްރީ އިތުރަށް ބުނީ، ސަލަފުން ބާއްވަން އުޅުނު ދަރުހަކީ އުސޫލުން ބޭރުން ހުއްދަ ނެގުމަކާއި ނުލާ އިޝްތިހާރު ކޮށްފައިވާ ދަރުސެއްކަމުގެ ޝަކުވާތައް މިނިސްޓްރީއަށް ލިބުމާއި އެކު ދަރުސް ބޭއްވުމުގެ ހުއްދަ ނެގުމަށްފަހު ކުރިއަށް ގެންދިއުމަށް މިދިޔަ ޖެނުއަރީ މަހުގެ 30 ގައި އެ ޖަމުއިއްޔާއަށް އަންގާފައިވާކަމަށެވެ. އަދި ހުއްދަ ނެގުމަށް ތަކުރާރުކޮށް 31 ޖެނުއަރީގައިވެސް އެ ޖަމުއިއްޔާއަށް އެންގިފައިވާ ކަމަށް މިނިސްޓްރީން މައުލޫމާތު ދެއެވެ.
މިނިސްޓްރީ ބުނީ، އެ މިނިސްޓްރީ އާއި ދީނީ ޖަމުއިއްޔާތަކަކީ އެއްވިސްނުމެއްގައި އެއް ލަނޑުދަނޑިއެއް ހާސިލް ކުރުމަށްޓަކައި އެކުގައި މަސައްކަތް ކުރަންޖެހޭކަމަށެވެ. އަދި މިނިސްޓްރީގެ އަމާޒަކީ ޖަމުއިއްޔާތަކާއި ގާތް ގުޅުމެއް ދެމެހެއްޓުމާއިއެކު މިނިސްޓްރީން ކަނޑައަޅާފައިވާ ޤާނޫނުތަކާއި އުސޫލްތައް ނެގެހެއްޓުން ކަމަށް މިނިސްޓްރީން ބުންޏެވެ.
