ކޮޕަޑެލްރޭގެ ދެވަނަ ލެގުންވެސް ޖިރޯނާ ބަލިކޮށް ރެއާލް މެޑްރިޑް ސެމީ ފައިނަލަށް ދަތުރުކޮށްފިއެވެ.

ބުރާސްފަތި ދުވަހުގެ ރޭ ކުޅުނު ދެވަނަ ލެގުގެ މެޗު ޖިރޯނާއާ ވާދަކޮށް ރެއާލުން ކާމިޔާބުކުރީ 1-3 ގެ ނަތީޖާއަކުންނެވެ. އެގޮތުން ރެއާލް ސެމީއަށް ދަތުރުކުރީ ފުރަތަމަ ލެގާއެކު ޖުމްލަ 3-7 ގެ އެގްރިގޭޓް ނަތީޖާއަކުންނެވެ.

ޖިރޯނާ ދަނޑުގައި ކުޅުނު ދެވަނަ ލެގުގެ މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ރެއާލުންނެވެ. އެގޮތުން އެޓީމުން ވަނީ 27 ވަނަ މިނެޓުގައި ލީޑު ނަގާފައެވެ. މި ލަނޑު ކާމިޔާބުކުރީ ކަރިމް ބެންޒެމާއެވެ.

މި ލަނޑަށްފަހުވެސް ރެއާލުން ދިޔައީ ފުލުފުލުގައި ޖިރޯނާގެ ގޯލަށް ނުރައްކާކޮށް ހަމަލާ އުފައްދަމުންނެވެ. އެގޮތުން 43 ވަނަ މިނެޓުގައި އެޓީމުން ވަނީ ބެންޒެމާ ކާމިޔާބުކުރި އިތުރު ލަނޑަކުން ލީޑު ފުޅާކޮށްފައެވެ.

މި ހާފްގައި ޖިރޯނާއަށްވެސް ލަނޑު ޖެހުމަށް ގިނަ ފުރުސަތުތަކެއް ލިބިފައިވާއިރު، އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ފުރަތަމަ ހާފް ނިމުނީ 0-2 ގެ ނަތީޖާއިން ޖިރޯނާގެ މައްޗަށް ރެއާލް ކުރީގައި އޮވެގެންނެވެ.

ދެވަނަ ހާފް ފެށިގެން ޖިރޯނާގެ ފަރާތުން ގިނަ ހަމަލާތަކެއް ފެނިގެން ގޮސްފައިވާއިރު، ފުލުފުލުގައި އެޓީމުން ވަނީ ރެއާލްގެ ގޯލަށް ނުރައްކާކޮށްފައެވެ.

މެޗުގައި ޖިރޯނާގެ ފަރާތުން ފެނިގެންދިޔަ ހަމައެކަނި ލަނޑު 71 ވަނަ މިނެޓުގައި ކާމިޔާބުކުރީ ޕެޑްރޯ ޕޮރޯއެވެ. ނަމަވެސް އޭގެ ފަސް މިނެޓު ފަހުން ރެއާލްގެ މާކަސް ލޮރެންޓޭ ވަނީ ލަނޑެއް ކާމިޔާބުކޮށް އަނެއްކާވެސް އެޓީމަށް ލީޑު ފުޅާކޮށްދީފައެވެ.

މިއީ ފަހަކަށް އައިސް ދަށް ނަތީޖާތަކެއް ހޯދަމުން އަންނަ ރެއާލް ޖައްސަ ޖައްސައިގެން މޮޅުވި ހަތަރުވަނަ މެޗެވެ.