ޕެލިކަންސްގެ ކުޅުންތެރިޔާ އެންތޮނީ ޑޭވިސް ދެން އެ ޓީމުން ފެންނާނެ ކަމާ މެދު ޝައްކު

އެންބީއޭގެ ކްލަބް ޕެލިކަންސްގެ ކުޅުންތެރިޔާ އެންތޮނީ ޑޭވިސް ދެން އެ ޓީމުން ފެންނާނެ ކަމާ މެދު ޝައްކު އުފެދިއްޖެއެވެ.

އަންގާރަ ދުވަހު މެޗުގެ ކުރިން ދެއްކި ޓީމްގެ ތައާރަފް ވީޑިއޯ އިން އެންތޮނީ ޑޭވިސް ފެނިފައެއް ނުވެއެވެ.

އުމުރުން 25 އަހަރުގެ ބާސްކެޓް ކުޅުންތެރިޔާ ޑޭވިސް މިވަގުތު ހުރީ އަނިޔާވެގެން ކުޅުމާ ދުރުގައެވެ. ޑޭވިސް އެންމެ ފަހުން މެޗަކުން ފެނިފައި ވަނީ މި މަހުގެ 18 ވަނަ ދުވަހުއެވެ.

ދެން އޭނާ ޕެލިކަންސުން ފެންނާނެތޯ ނޫސްވެރިޔަކު ކުރި ސުވާލަށް ޖަވާބު ދެމުން އެ ޓީމުގެ ކޯޗް އަލްވިން ޖެންޓްރީ ސީދާ ޖަވާބެއް ދީފައެއް ނުވެއެވެ.

ކޯޗު ބުނީ އެއީ ޖަވާބު ދޭން އުނދަގޫ ސުވާލެއް ކަމަށާއި، ފެނުން ވެސް އެކަށީގެންވެއެވެ.

އެންބީއޭގެ ޓްރާންސްފާ މާކެޓް ފެބްރުއަރީ 7 އަށް ހަމަވާއިރު ޕެލިކަންސްގެ މެނޭޖަރ ޑެލް ޑެމްޕްސް ޑޭވިސްގެ ޓްރާންސްފާގެ މަޝްވަރާތައް ކުރިއަށް ގެންދިއުމަށް، ފޯނަށް ޖަވާބު ނުދޭ ކަމަށް އީއެސްޕީއެންއާ ހަވާލާދީ އަޑުތައް ފެތުރިފައިވެއެވެ.

ޑޭވިސްގެ ކޮންޓްރެކްޓް ހަމަވާން ކާރިވެފައިވާއިރު ނިއު އޯލިންސް ޕެލިކަންސްއާ އެކު އިތުރަށް ހުންނަން ބޭނުންނުވާ ކަމަށް ޑޭވިސް މީގެ ކުރިން ބުނެފާ ވެއެވެ.

ޓްރާންސްފާ މާކެޓްގައި ލޭކާސް، މިލްވޯކީ ބަކްސް އަދި ޓޮރޮންޓޯ ރެޕްޓޯސް ވަނީ ޑޭވިސްއަށް ޝައުގުވެރިވާ ކަމަށް ބުނެފައެވެ. އެހެންނަަމަވެސް މިއިން އެއްވެސް ޓީމަކާ އެއްކޮށް މަޝްވަރާ ބައްދަލުވުމެއް ބާއްވާފައެއް ނުވެއެވެ.

ޖުނުއަރީ 28 ވަނަ ދުވަހު ޑޭވިސް ވަނީ އިތުރަށް ޕެލިކަންސް އަށް ކުޅެން ބޭނުން ނުވާ ކަމަށް ބުނެ އަމިއްލަ ގޮތުން އެހެން ޓީމެއް ހޯދުމަށް ހުށައަޅާފައެވެ. ޑޭވިސްގެ މިއަމަލާ ގުޅިގެން ނެޝަނަލް ބާސްކެޓްބޯލް އެސޯސިއޭޝަނުން ވަނީ 50،000 (ފަންސާސް ހާސް) ޑޮލަރުން ޑޭވިސް ޖޫރިމަނާ ކޮށްފައެވެ.

އެންތަނީ ޑޭވިސް ޕެލިކަންސް އަށް ކުޅެން ފެށީ 2012 ވަނަ އަހަރުއެވެ.