ޕްރިމިއާ ލީގް: ޗެލްސީ ތާވަލްގެ ފަސްވަނައަށް ވެއްޓިއްޖެ

ޕްރިމިއާ ލީގުގައި ބުދަ ދުވަހުގެރޭ ކުޅުނު މެޗުން ޗެލްސީ ބަލި ވީ ބޯންމައުތް އަތުން 0-4 ގެ ތަފާތު ބޮޑު ނަތީޖާ އަކުންނެވެ.

ބޯންމައުތްގެ ދަނޑުގައި ކުޅުނު މި މެޗު ފެށިގެން ގިނައިރުތަކެއްވަންދެން ބޯޅަ ކޮންޓްރޯލް ކޮށްގެން ކުޅެމުން ދިޔައީ ޗެލްސީންނެވެ. ގިނަ ހަމަލާތަކެއް އުފައްދާ ބޯންމައުތްގެ ގޯލަށް ނުރައްކާ ކުރުމަށް ޗެލްސީން މަސައްކަތް ކޮށްފައިވެއެެވެ.

ފުރަތަމަ ހާފްގައި ލަނޑު ޖަހާނެ ރަނގަޅު ފުރުސަތުތަކެއް ދެ ޓީމަށް ވެސް ލިބި ވަނީ ބޭކާރުވެފައެވެ. ފުރަތަމަ ހާފް ނިމުނީ ދެ ޓީމް އެއްވަރުވެ 0-0 ގެ ނަތީޖާ އަކުންނެވެ.

ދެވަނަ ހާފް ފެށުނުއިރު ދެ ޓީމްގެ ފަރާތުން ވެސް ފެނިގެންދިޔައީ ވަރުގަދަ ކުޅުމެކެވެ. ގާތް ގާތުގައި ބޯންމައުތުގެ ގޯލަށް ޗެލްސީން ވަނީ ނުރައްކާ ކޮށްފައެވެ. އެހެން ނަމަވެސް ބޯންމައުތްގެ ޑިފެންސް ލައިންގެ ވަރުގަދަކަމުން ޗެލްސީއަށް ވަނީ ލަނޑެއް ޖެހޭ ގޮތްނުވެފައެވެ.

ޗެލްސީ ގެ ގޯލް ފޫ އަޅުވާލާ، ބޯންމައުތް މެޗުގެ ފުރަތަމަ ލަނޑު 47 ވަނަ މިނެޓުގައި ޑޭވިޑް ބްރޫކްގެ އެހީތެރިކަމާއެކު ކާމިޔާބު ކޮށްފައިވަނީ ޖޯށުއާ ކިންގްއެވެ.

މި ލަންޑަށްފަހުގައި ބޯންމައުތްގެ ކުޅުން އިތުރަށް ރަނގަޅުކޮށް 63 ވަނަ މިނެޓުގައި އެޓީމުގެ 2 ވަނަ ލަނޑު ޖޯށުއާ ކިންގްގެ އެހީތެރިކަމާއި އެކު ކާމިޔާބު ކޮއްދިނީ ޑޭވިޑް ބްރޫކްއެވެ.

ދެވަނަ ހާފްގައި ޗެލްސީގެ ފަރާތުން މާއެދެވޭ ކުޅުމެއް ނުފެނުމުގެ ނަތީޖާ އަކަށްވީ ބޯންމައުތް އެޓީމްގެ ތިންވަނަ ލަނޑު މެޗުގެ 74 ވަނަ މިނެޓުގައި ޖޫނިއާ ސްޓަނިސްލަސްގެ އެހީތެރި ކަމާއިއެކު ޖޯށުއާ ކިންގް ކާމިޔާބުކުރުމެވެ.

ޗެލްސީގެ ޑިފެންސްލައިން ވަރުގަދަކޮށް ލަނޑެއްޖެހުމަށް ގިނަ މަސައްކަތްތަކެއް ކުރި ނަމަވެސް ލަނޑެއް ކާމިޔާބުވެފައެއްނުވެއެވެ. މެޗުގެ އިތުރުވަގުތުގައި ބޯންމައުތްގެ ހަތަރުވަނަ ލަނޑު ޖޯޑަން އިބެގެ އެހީތެރިކަމާއިއެކު ޗާލީ ޑެނައިލްސް ކާމިޔާބު ކޮށްދީ، ލީޑް އިތުރަށް ފުޅާކޮށް ދިނެވެ.

މެޗު ނިމުނުއިރު ނަތީޖާ އަކީ ޗެލްސީ ސުމެއް، ބޯންމައުުތް ހަތަރެކެވެ.

މި މެޗުން ބަލިވުމުން ކުޅުނު ޗެލްސީވަނީ ތާވަލްގެ ފަސްވަނަ އަށް ވެއްޓިފައެވެ. ޕޮއިންޓުގެ ގޮތުން ޗެލްސީއާއި އާސެނަލް އެއްވަރުވެ، އާސެނަލް ވަނީ ތާވަލްގެ ހަތަރުވަނައަށް ޖެހިލާފައެވެ.

ބޯންމައުތު ބުދަ ދުވަހުގެ މެޗުން މޮޅުވުމުން ތާވަލުގެ 10 ވަނާގައި ވަނީ ހަމަޖެހިލާފައެވެ.