އެލައިޑް އިންޝޫރެންސް އަށް އާ މެނޭޖިންގ ޑިރެކްޓަރަކު އައްޔަންކޮށްފި
ޝަފާޒު އައްޔަނު ކުރަން ނިންމީ ކުރިން އެ މަގާމުގައި ހުންނެވި އަހްމަދު އަމީލް އިސްތިއުފާ ދެއްވުމުން
އެލައިޑް އިންޝޫރެންސްގެ އެމްޑީ މުހައްމަދު ޝަފާޒު | އެލައިޑް އިންޝުއަރެންސް
އެލައިޑް އިންޝޫރެންސްގެ އާ މެނޭޖިންގ ޑިރެކްޓަރަކަށް، މއ. ކަނޯވާ މުހައްމަދު ޝަފާޒު އައްޔަނުކުރަން އެސްޓީއޯގެ ޑިރެކްޓަރުންގެ ބޯޑުން ނިންމައިފިއެވެ.
އެލައިޑްގެ އެމްޑީއަކަށް ޝަފާޒު އައްޔަން ކުރަން ނިންމީ، އެ މަގާމު ފަސް އަހަރު ވަންދެން ހުންނެވި އަހުމަދު އަމީލް އިސްތިއުފާ ދެއްވުމަށް ނިންމެވުމާ ގުޅިގެންނެވެ. ޑިސެމްބަރު 6 ވަނަ ދުވަހު އަމީލް އިސްތިއުފާގެ ނޯޓިސް ދެއްވީ އާއިލާއަށް ވަގުތު ދެއްވަން ކަމަށް ވިދާޅުވެއެވެ.
މަގާމަށް އައްޔަނު ކުރެވުނު ޝަފާޒު ވަނީ އެލައިޑް އިންޝޫރެންސް ކުންފުނީގައި 24 އަހަރަށް ވުރެ ދިގު މުއްދަތަކަށް ހިދުމަތް ކުރައްވާފައެވެ. މީގެ ކުރިން އޭނާ ހުންނެވީ ކުންފުނީގެ އެގްޒެކެޓިވް ޑިރެކްޓަރ އަދި ޑެޕިއުޓީ މެނޭޖިންގ ޑިރެކްޓަރގެ މަގާމުގައެވެ.
އެސްޓީއޯގެ ސަބްސިޑިއަރީ ކުންފުންޏެއް ކަމުގައިވާ އެލައިޑް އިންޝޫރެންސްއަކީ، ރާއްޖޭގައި އިންޝޫރެންސްގެ ހިދުމަތް ފޯރުކޮށްދޭތާ 43 އަހަރުވެފައިވާ ކުންފުންޏެކެވެ. އަދި 2018 ވަނަ އަހަރުގެ މޯލްޑިވްސް ބިޒްނަސް އެވޯޑްސްގައި ރާއްޖޭގެ އެއްމެ ކާމިޔާބު ކުންފުނީގެ މަގާމު ލިބުނު އެލައިޑްގެ އިންޝޫރެންސް ކެޕޭސިޓީ ވަނީ 120 މިލިއަން ޑޮލަރަށް (2.17 ބިލިއަން ރުފިޔާ) އިތުރުވެފައެވެ.
