ޕީޕީއެމް މައްސަލައިގެ ހުކުމް މިއަދު
މައްސަލަ ތާވަލް ކޮށްފައިވަނީ ބުދ ދުވަހުގެ މެންދުރު 12:45 އަށް
ޕީޕީއެމްއިން ބޭއްވި ކޮންގްރެސް
ޕީޕީއެމްގެ ކޮންގްރެސް ބަލައިގަންނަން ހައިކޯޓުން ކުރި ޙުކުމް އިލެކްޝަންސް ކޮމިޝަނުން އިސްތިއުނާފު ކުރުމަށް ދިވެހިރާއްޖޭގެ ސުޕްރީމް ކޯޓަށް ހުށަހެޅި މައްސަލައިގައި ހުކުމްކުރުން ތާވަލުކޮށްފި އެވެ.
މި މައްސަލަ ތާވަލުކޮށްފައި ވަނީ މިއަދު މެންދުރު 12:45 އަށެވެ.
ޕީޕީއެމްގެ ކޮންގްރެސް ބާއްވާފައި ވަނީ މިދިޔަ ސެޕްޓެމްބަރު މަހު، ރައީސް ޔާމީނަށް ރިޔާސީ އިންތިޚާބުން ކުރިމަތި ވެވަޑައިގެންނެވި ނާކާމިޔާބީއާއެކުއެވެ. އެ ކޮންގްރެސްގައި ޕާޓީގެ ލީޑަރަކަށް ރައީސް ޔާމީން އައްޔަން ކުރުމުގެ އިތުރުން އިސް މަގާމުތަކަށް ބޭފުޅުން އިންތިޚާބުކޮށްފައިވެއެވެ.
ކޮންގްރެސް ބޭއްވުމަށްފަހު އެކަމާއި ގުޅޭ މައުލޫމާތު އިލެކްޝަންސް ކޮމިޝަނަށް ޕީޕީއެމް އިން ހުށަހެޅި ނަމަވެސް އެކޮމިޝަނުން ކޮންގްރެސްގެ ނިންމުންތައް ބަލައިނުގަތުމަށް ނިންމިއެވެ. އގޮތުން ޕީޕީއެމް އިން މި މި މައްސަލަ ހައިކޯޓަށް ހުށަހެޅުމުން އެ ކޯޓުން ކޮށްފައިވާ ހުކުމްގައި ބުނެފައިވަނީ އެ ޕާޓީގެ ކޮންގްރެސްއިން އައްޔަން ކުރި މަގާމުތައް އަނބުރާ ދިނުމަށް އިލެކްޝަންސް ކޮމިޝަންގެ މައްޗަށް އަމުރު ކުރާކަމަށެވެ. މިއާއެކު ހައިކޯޓުގެ އެ ހުކުމް އިސްތިއުނާފު ކުރުމަށް ދިވެހިރާއްޖޭގެ ސުޕްރީމް ކޯޓަށް ވަނީ އީސީން ހުށަހަޅާފައެވެ.
ޕީޕީއެމްގެ ހިންގުމުގެ ބާރުތައް ރައީސް މައުމޫންގެ އަތްޕުޅުން ނެންގެވުމަށްފަހު، އެޕާޓީ ހިންގުމުގެ ބާރު ހަވާލުކޮށްފައި ވަނީ ޕީޕީއެމްގެ މުސްތަޝާރު, ކުރީގެ ރައީސް އަބްދުﷲ ޔާމީނަށެވެ. ސިވިލް ކޯޓުގެ ހުކުމަކުން 2016 ވަނަ އަހަރު ރައީސް ޔާމީނަށް ޕީޕީއެމް ހިންގުމަށް ހަވާލު ކުރި ހުކުމްގައި ބުނެފައި ވަނީ ރައީސް ޔާމީންގެ ބެލުމުގެ ދަށުން އެ ޕާޓީގެ ގައުމީ ޖަލްސާ އެއް ނުވަތަ ކޮންގްރެސް އެއް ބޭއްވުމަށެވެ. ނަމަވެސް އެ ޕާޓީން ކޮންގްރެސް ބާއްވާފައި ވަނީ ރައީސް ޔާމީނާއި ކޯޓުން, ޕީޕީއެމް ހަވާލުކުރިތާ ދެ އަހަރު ފަހުން މިދިޔަ ސެޕްޓެމްބަރު މަހުގައެވެ.
ޕީޕީއެމްގެ ކޮންގްރެސް ބަލައިނުގަންނަން ނިންމީ ގާނޫނާ ހިލާފަށް ކަމަށް ހައިކޯޓުން ހުކުމް ކޮށްފައިވާއިރު ޕީޕީއެމްގެ ކޮންގްރެސްގައި އެޕާޓީގައި ނުހިމެނޭ މީހުންވެސް ބައިވެރިވެފައިވާ ކަމަށް އީސީއިން ވަނީ ބުނެފައެވެ. އަދި ޕީޕީއެމްގެ އަސާސީ ގަވައިދުގައި އެޕާޓީގެ މަގާމުތަކަށް ކުރިމަތިލެވޭނީ އެޕާޓީގެ މެންބަރުންނަށް ވާތާ ކަނޑައެޅިފައިވާ މުއްދަތެއް ހަމަވުމުން ކަމަށާއި, ޕާޓީގެ އެފަދަ އަސާސްތަކާ ހިލާފުވެފައިވާ އިރު ކޮންގްރެސްގެ ނިންމުންތައް ބަލައިގަނެވޭނެ ޖާގައެއް ނެތް ކަމަށް އީސީން މީގެ ކުރިން ވަނީ ބުނެފައެވެ.
ޕީޕީއެމްގެ ބާރުތައް ކުރީގެ ރައީސް އަބްދުﷲ ޔާމީންގެ އަތްޕުޅުން ގެއްލިދާނެ ކަމުގެ ބިރަށް، އެމަނިކުފާނު އިސްވެ ހުންނަވައިގެން ވަނީ ޕީޕަލްސް ނޭޝަނަލް ކޮންގްރެސް ކިޔާ ސިޔާސީ ޕާޓީއެއް އުފައްދަވާފައެވެ.
