ބިޑުނުކޮށް މަޝްރޫއުތައް ހުށައެޅޭ އުސޫލަކީ ކޮރަޕްޝަނަށް މަގުފަހިވާ އުސޫލެއްނޫން ކަމަށް މިނިސްޓްރީ އޮފް އިކޮނޮމިކް ޑިވެލޮޕްމެންޓްގެ ރަޖިސްޓްރާ އޮފް ކޮމްޕެނީޒް މަރިޔަމް ވިޝާމް ވިދާޅުވެއްޖެއެވެ.

ރާއްޖެޓީވީން އަންގާރަ ދުވަހުގެ ރޭ ގެނެސްދިން ފަލަސުރުޚީ ޕްރޮގްރާމްގައި ވާހަކަ ދައްކަވަމުން ވިސާމް ވިދާޅުވީ ތަރައްގީގެ މަޝްރޫއުތަކާއި ތަރައްގީގެ ދާއިރާތައް ހުންނަނީ ސްޓްރެޖިކް ޕްލޭނެއް މެދުވެރިކޮށް ދެނެގަނެ ވިފައި ކަމަށެވެ.

އެގޮތުން ކަނޑައެޅޭ ދާއިރާތަކެއްގައި ސަރުކާރުން އެއަހަރެއްގެ ތެރޭގައި ކުރިއަށް ގެންދަން ބޭނުންވާ މަޝްރޫތައް ހުންނަ ކަމަށާ ބިޑުނުކޮށް މަޝްރޫއުތައް ހުށައެޅޭ އުސޫލަކީ ކޮރަޕްޝަނަށް މަގުފަހިވާ އުސޫލެއްނޫން ކަމަށް ވިސާމް ވިދާޅުވިއެވެ.  

ވިސާމް ވިދާޅުވީ ބިޑުކުރުމުގެ ދައުވަތަކާއި ނުލާ ސަރުކާރަށް ބިޑު ކުރުމުގެ އުސޫލުގެ މައިގަނޑު މަގްސަދަކީ ރާއްޖޭގައި ތަރައްގީ ކުރަން ބޭނުންވާ ދިވެހި އިންވެސްޓަރުންނާއި، ބޭރު އިނވެސްޓަރުންނާއި އަދި ޖަމުއިއްޔާ ޖަމާއަތްތައް ހިމެނޭގޮތަށް ވަކިކަހަލަ މަޝްރޫއުތަކެއްގައި އިންވެސްޓް ކުރަން ބޭނުންވާނަމަ އެ މަޝްރޫއަކަށް ޝައުގުވެރިކަން ފާޅުކޮށް ޕްރޮޕޯސަލް ހުށައެޅުމެވެ.

އަދި އާންމު ދިރިއުޅުމަށް މަގުފަހިވާނެ ފަދަ ކަންކަން ޕްރައިވެޓް ސެކްޓަރތަކުން ސަރުކާރާއި ހަމައަށް ގެނެވޭނެ ގޮތް ފަހި ކުރުމެވެ.

" އަޅުގަނޑު ދަންނަވާނީ ޖުމްލަގޮތެއްގައި ހުރިހާ ދާއިރާތަކެއް ވެސް ތަރަށްގީ ކުރަން ބޭނުންވާއިރު އިއުޖާދީ ވިސްނުމަކުން މަސައްކަތް ކުރެވިފައި ނެތް ސަރަހައްދުތައް އެބަހުރި . އެހެންކަމުން މިފަދަ އުސޫލެއް އޮންނަ ކަމަށްވާނަމަ އެ ސިނާއަތްތަކުގައި އިންވެސްޓް ކުރަން ބޭނުންވާ ފަރާތްތަކަށްވެސް ސަރުކާރަށް ޕްރޮޕޯސަލް ހުށައެޅުމުގެ ފުރުސަތު މި ހުޅުވިގެންދަނީ. އުއްމީދަކީ މީގެ ކުރިން ޕރޮޕޯސަލްތައް އައިސްފައި ނުވާ ދާއިރާތަކަށް ޕްރޮޕޯސަލްތައް އައުން." ވިސާމް ވިދާޅުވިއެވެ.

ވިސާމް ވިދާޅުވީ އެ އުސޫލުގެ ތަފްސީލަށް ބަލާއިރު ޕްރޮޕޯސަލް ހުށައަޅާފަރާތަށް  ތިން މަރުހަލާއެއް އޮންނަ ކަމަށާއި ފުރަތަމަ މަރުހަލާގައި އެންމެ އަސާސީ މައުލޫމާތުތަކާއި އެކު ޕްރޮޕޯސަލް ހުށައެޅުމުގެ ފުރުސަތު ލިބިގެން ދާއިރު ދެވަނަ މަރުހަލާގައި ތަފްސީލީ މައުލޫމާތުތައް ޕްރޮޕޯސަލްއާއި އެކު ހުށައަޅަން ޖެހުން ހިމެނޭ ކަމަށެވެ. އަދި  ތިންވަނަ މަރުހަލާގައި ވަކިކަހަލަ ނިންމުންތަކަކަށް ބިޑަށް ހުޅުވާލަން ސަރުކާރަށް ނިންމިދާނެ ކަމަށާއި އެހެން ނޫންނަމަ ޕްރޮޕޯސަލް ހުށައެޅި ފަރާތަކާއި އެކު ވާހަކަ ދައްކައިގެން ގޮތްތަކެއް ނިންމިދާނެ ކަމަށް އޭނާ ވިދާޅުވިއެވެ.

މީގެ އިތުރުން ވެސް ވިސާމް ވިދާޅުވީ މިއުސޫލުގެ 11 ވަނަ މާއްދާގައި ހިމެނޭ ސްޓިއަރިން ކޮމެޓީގައި ހިމެނޭނީ މައިގަނޑު ގޮތެއްގައި ޓެކްނިކަލް މީހުން ކަމަށާއި އުސޫލު އިމްޕްލިމެންޓް ކުރުމުގެ ޒިންމާ ނަގާނީ އިކޮނޮމިކް މިނިސްޓްރީން ކަމަށެވެ

"ސްޓީއަރިންގް ކޮމެޓީގެ މަސައްކަތަކަށްވަނީ މި އުސޫލުގައި ބުނާ މިންގަޑަށް ފެތޭގޮތަށް ޕްރޮޕޯސަލްތައް ހުށައަޅާފައި ހުރިތޯ ބެލުން. ލިބޭ ހުރިހާ ޕްރޮޕޯސަލްތަކާއި އޭގެ ތަފްސީލް ގަވާއިދުން ރައީސުލްޖުމްހުރިއްޔާގެ އޮފީހަށް ހުސައެޅުމަކީވެސް މި ކޮމެޓީގެ މަސްއޫލިއްޔަތެއް ވިސާމް" ވިދާޅުވިއެވެ.