ކޯލިޝަންގެ ހަތަރު ލީޑަރުންގެ ބައްދަލުވުން ނުބޭއްވިގެން އުޅޭނީ އެމަނިކުފާނު ބިޒީ ވެގެން ނޫން ކަމަށާއި، ބައްދަލުވުމަށް ތައްޔާރަށް ހުންނެވިކަމަށް ސަރުކާރުގެ ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.

ޖުމްހޫރީ ޕާޓީގެ ޓިކެޓްގައި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާ އަށް ވާދަ ކުރައްވާ އައިޝަތު ނާޒިމާގެ ކެމްޕޭން ލޯންޗުކުރުމުގެ ހަފްލާއަށްފަހު ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ގާސިމް ވިދާޅުވީ، ކޯލިޝަން ލީޑަރުންގެ ބައްދަލުވުން ވަކި ދުވަހަކު ބޭއްވުމަށް ރައީސް އަރިހުން އެދިފައި ނުވާނެކަމަށެވެ. އަދި ވަރަށް އަވަހަށް ބައްދަލުވުން ބޭއްވިގެން ދާނެ ކަމަށް ގަބޫލުފުޅު ކުރައްވާ ކަމަށް ޤާސިމް ވިދާޅުވި އެވެ. 

''މި ދުވަސްވަރަކީ މާ އަވަދިނެތި އުޅޭ ވަގުތުތަކެއްވެސް ނޫން. މި ދެންނެވީ މަޖިލީސް އޮތީ މިހާރު މުޅިން ރެސެސްގައި. މަޖިލީހުގެ ރައީސެއްގެ ހައިސިއްޔަތުން އަޅުގަނޑު ކުރަންޖެހޭ މަސައްކަތްތަކެއް ހުރި ކަމުގައިވިޔަސް ވަރަށް މިނިވަންކޮށް މިދަނީ.'' ރައްޔިތުންގެ މަޖިލީހުގެ ރައީސް ގާސިމް ވިދާޅުވިއެވެ.

ގާސިމް މިހެން ވިދާޅުވެފައިވާއިރު, ކޯލިޝަންގެ ބައްދަލުވުމެއް އަންނަ ހަފްތާގެ ތެރޭގައި ބޭއްވޭނެ ކަމަށް ޤަބޫލުފުޅުކުރައްވާ ކަމަށް މިމަހު 24 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވެފަވެއެވެ. ނަމަވެސް ހަތަރު ލީޑަރުންގެ ބައްދަލުވުން ބާއްވާނެ ތާރީޚެއް އަދިވެސް ކަނޑައެޅިފައި ނުވާކަން ރާއްޖެ.އެމްވީއަށް އެނގިފައިވެއެވެ. ރާއްޖެ އެމްވީއަށް އެނގިފައިވާ ގޮތުގައި މި ހަފްތާގައި ރައީސް ސޯލިހު ވަޑައިގެންނެވުމަށް ހަމަޖެހިފައިވާ އިވެންޓްތަކުގެ ޕްލޭންގައި އަދި ހަތަރު ލީޑަރުންގެ ބައްދަލުވުމެއް ނެތެވެ.

ކޯލިޝަންގައި ހިމެނޭ ހަތަރު ޕާޓީގެ ލީޑަރުން ކޮންމެ މަހަކު އެއް ފަހަރު ބައްދަލުވުމެއް ބޭއްވުމަށް ނިންމާފައި ވަނީ މިދިޔަ ނޮވެމްބަރު 15 ދުވަހު ހޮޓެލް ޖެންގައި ބޭއްވި ބައްދަލުވުމުގައެވެ.