އީސީގެ ލޯގޯ އާއި ކުލަ ބަދަލު ކުރުމުގެ ޖަލްސާއަށް ހުރިހާ ރައީސުންނަށް ދައުވަތު
28 ޖެނުއަރީ 2019 | ހޯމަ 04:26ޖަލްސާ އޮންނާނީ ހޮޓެލް ޖެންގައި
އިލެކްޝަންސް ކޮމިޝަން އިދާރާ
އިލެކްޝަންސް ކޮމިޝަން (އީސީ)ގެ ލޯގޯ އާއި ކުލަ ބަދަލު ކުރުމުގެ ޖަލްސާއަށް ރައީސް އިބްރާހިމް މުހައްމަދު ސޯލިހް އާއި ކުރީގެ ހުރިހާ ރައީސުންނަށް ދައުވަތު ދީފި އެވެ.
ހޯމަ ދުވަހުގެ ރޭ 09:00 ޖަހާއިރު ހޮޓަލް ޖެންގައި ބާއްވާ މި ޖަލްސާގައި ރައީސް ސޯލިހްގެ އިތުރުން ކުރީގެ ރައީސް މައުމޫން އަބްދުލް ގައްޔޫމް އާއި ކުރީގެ ރައީސް މުހައްމަދު ނަޝީދު ބައިވެރިވެވަޑައިގަންނަވާނެ ކަމަށް އިލެކްޝަންސް ކޮމިޝަނުން ބުނެ އެވެ. އެހެން ރައީސުން އަދި ދައުވަތު ގަބޫލްފުޅެއް ނުކުރައްވަ އެވެ.
އެ ޖަލްސާގައި ލޯގޯ އާއި ކުލަ ބަދަލުކުރުމުގެ އިތުރުން، ރައްޔިތުންގެ މަޖިލީހުގެ އިންތިހާބު 2019 އަށް އިއުލާން ކުރުމަށް ހަމަޖެހިފައިވާ ކަމަށް ވެސް އެ ކޮމިޝަނުން ބުންޏެވެ.
އިލެކްޝަންސް ކޮމިޝަންގެ މެމްބަރު އަހްމަދު އަކްރަމް ވިދާޅުވި ގޮތުގައި އީސީގެ ކުލަ އާއި ލޯގޯ ބަދަލުކުރަން ނިންމީ މީގެ ދެއަހަރު ކުރިންނެވެ. ނަމަވެސް އެ ކޮމިޝަންގެ މަސައްކަތްތައް ހުރި ގޮތުން އޭރު އެކަމަށް ވަގުތު ނުދެވުނީ ކަމަށް އޭނާ ވިދާޅުވިއެވެ.
އީސީން މިހާރު އެ ކޮމިޝަންގެ ލޯގޯގައި ބޭނުން ކުރަނީ ފެހި ކުލައެވެ.
