ކުރީގެ ރައީސް އަބުދުﷲ ޔާމީނާއި، ކުރީގެ ނައިބު ރައީސް އަހުމަދު އަދީބުގެ މަނީލޯންޑްރިންގެ މައްސަލަތަކުގެ ލިޔެކިއުންތަކެއް އެޓާނީ ޖެނެރަލްގެ އޮފީހުން ކޮރަޕްޝަންގެ މައްސަލަތައް ބެލުމަށް ރައީސް ސޯލިހު އުފައްދަވައިވާ ރިޔާސީ ކޮމިޝަނަށާއި, ފުލުހުންނަށް ހުށައަޅައިފިއެވެ.

އޭޖީ އޮފީހުން އާދިއްތަ ދުވަހު ނެރުނު ބަޔާނެއްގައި ބުނީ ކުރީގެ ރައީސް ޔާމީންއާއި ކުރީގެ ނައިބު ރައީސް އަހުމަދު އަދީބާއި، ކުރީގެ ސަރުކާރުގެ ބައެއް އިސް ފަރާތްތަކުން މަނީލޯންޑްރިން ހިންގިކަމަށް ތުހުމަތުކުރެވޭ މުއާމަލާތްތަކެއްގެ ހެކި ހިމެނޭ ލިޔުންތަކެއް އެމްޑީޕީން މިމަހު އޭޖީ އޮފީހަށް ހުށަހަޅާފައިވާ ކަމަށެވެ.

އެލިޔެކިއުންތަކަކީ އަދީބުގެ މޮބައިލް ފޯނުތަކެއްގައިވާ ޑޭޓާ އެނަލައިޒްކުރުމަށްފަހު ބައިނަލްއަގްވާމީ ފްރޯޑް އިންވެސްޓިގޭޝަން ފާމަކުން ތައްޔާރުކޮށްފައިވާ ތަހުގީގު ރިޕޯޓަކާއި, އެއާ ގުޅޭ ލިޔުންތަކެއް ކަމަށް ބަޔާނުގައި ވެއެވެ. އަދި އެރިޕޯޓުގައި ބަޔާންކޮށްފައިވާގޮތުން މޮބައިލް ފޯނުގައިވާ ޑޭޓާތަކަކީ އިނގިރޭސިވިލާތުގެ ހޯމް އޮފީހުން ހުއްދަދީފައިވާ ޑޭޓާ ރިކަވަރީ އަދި އިންޓެލިޖެންސް ކުންފުންޏަކުން ފޮރެންސިކް އިމޭޖިން ހަދާފައިވާ ޑޭޓާތަކެއް ކަމަށްވެސް އޭޖީ އޮފީހުގެ ބަޔާނުގައިވެއެވެ.

އެލިޔެކިއުންތައް މިމަހުގެ 15 ވަނަ ދުވަހު ރިޔާސީ ކޮމިޝަނަށް ހުށަހަޅާފައިވާނެ ކަމަށާއި އަދި އެލިޔެކިއުންތަކުގައި ފާހަގަކޮށްފައިވާ ފަރާތްތަކުގެ މައްޗަށް ޖިނާއީ ތަހުގީގެއް ހިންގައި، ހެކި ރައްކާތެރިކޮށް މައްސަލަ ޝަރީއަތަށް ހުށަހެޅުމަށް ބޭނުންވާ ތައްޔާރީތައް ކުރުމަށް ފުލުހުންގެ އިދާރާއަށް ވެސް އެލިޔެކިއުންތައް ހުށަހަޅާފައިވާނެ ކަމަށް އެޖީ އޮފީހުން ހާމަކުރެއެެވެ.

އޭޖީ އޮފީހުން ހާމަކުރިގޮތުގައި އެލިޔުންތައް އެއޮފީހުން ދިރާސާކުރިއިރު އެލިޔެކިއުންތަކުގައި ފާހަގަކޮށްފައިވާ ފަރާތްތަކުން މަނީލޯންޑްރިންގެ ކުށުގެ އިތުރުން ރިޝްވަތު ދިނުމާއި ކޮރަޕްޝަނަށް ތުހުމަތުކުރެވޭ އަމަލުތަކެއް ވެސް ވަނީ ހިންގާފައެވެ.

މީގެއިތުރުން އޭޖީ އޮފީހުގެ ބަޔާނުގައި ބުނެފައިވަނީ ދިވެހި ދައުލަތުން ގެއްލިފައިވާ ފައިސާއާއި މުދާ އަނބުރައި ދައުލަތަށް ހޯދުމަކީ މިސަރުކާރުން ވަރަށް ބޮޑު އިސްކަމެއްދީގެން ކުރާ ކަމެއް ކަމަށެވެ. އެއާއިއެކު ދައުލަތުން ގެއްލިފައިވާ ފައިސާއާއި މުދާ، އަނބުރައި ހޯދުމަށްފަހު އެފައިސާ ރާއްޖެއަށް ގެނައުމަށްޓަކައި ގާނޫނީ ގޮތުން ރާއްޖެއިން ބޭރުގައި ކުރަންޖެހޭ މަސައްކަތައް ކުރުމަށް، ބޭރުގެ ތަޖުރިބާކާރުންނާއި ގާނޫނީ ވަކީލުން ހޯދައި އެމަސައްކަތް ކުރިއަށްގެންދިއުމަށް ކަމާބެހޭ ފަރާތްތަކާއެކު އޭޖީ އޮފީހުން މިހާރު މަޝްވަރާކުރަމުން އަންނަ ކަމަށް ވެސް އޭޖީގެ މި ބަޔާނުގައިވެއެވެ.

ބުރާސްފަތި ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ވަހަކަފުޅުދައްކަވަމުން ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވީ ކުރީގެ ރައީސް އަބްދުﷲ ޔާމީންގެ ސަރުކާރުން ހިންގާފައިވާ ކަމަށް ތުހުމަތުކުރާ ޖަރީމާތަކުގެ ތެރެއިން ކަޅު ފައިސާ ރާއްޖޭގެ އެކައުންޓްތަކަށް ވަތް ގޮތުގެ ތަފްސީލީ މައުލޫމާތު ބަންޑާރަ ނައިބުގެ އަތްޕުޅަށް އަރުވާފައިވާކަމަށެވެ. ނަޝީދު ވިދާޅުވީ އެމަނިކުފާނު އިނގިރޭސި ވިލާތަށް އަރުވާލެވިގެން ހުންނެވި ދުވަސްވަރު ރާއްޖޭގެ އެކައުންޓްތަކަށް ވަން ކަޅު ފައިސާގެ މައުލޫމާތު ލިބިވަޑައިގެންނެވީ، ލިބިވަޑައިގެންނެވި ދެ ފޯނާއި ލަޕްޓޮޕަކުންކަމަށެވެ. އޭގައި ހުރި މައުލޫމާތު ފޮރެންސިކް އެކައުންޓެންޓަކާ ހަވާލުކޮށްފައިވާ ކަމަށާއި ކަޅު ފައިސާ ދައުރުވި ގޮތުގެ މައުލޫމާތުގެ ތަފްސީލު ވަރަށް ހާމަކަން ބޮޑު ގޮތެއްގައި އެބަހުރި ކަމަށެވެ. 

"އިނގިރޭސި ވިލާތަށް ވަޑައިގަތް ފަހުން އަޅުގަނޑަށް މައުލޫމާތު ލިބިއްޖެ ދެ ފޯނާއި ލަޕްޓޮޕެއްގައި ހުރި މައުލޫމާތު. ދެން އެ މައުލޫމާތު އަނެއްކާ އަޅުގަނޑު ހަވާލުކޮށްފިން ފޮރެންސިކް އެކައުންޓެންޓަކާ. ވަރަށް ބޮޑަށް އޭގެ ތަފްސީލު އެބަހުރި އިނގޭތޯ ވަރަށްބޮޑަށް ތަފްސީލު އެބަހުރި. ބަންޑާރަ ނައިބުގެ އަތްޕުޅުގައި އެތަކެތި އެބަހުރި. އަޅުގަނޑު އުއްމީދު ކުރަނީ ބަންޑާރަ ނައިބު ތަހުގީގުގައި އެހީތެރިކަން ދެއްވާނެ ކަމަށް ފުލުސް އޮފީހަށްވެސް އަދި ބޭރުން ހޯދަންޖެހޭ އެކިއެކި ބާވަތުގެ މާހިރުންވެސް ހޯއްދަވައިގެން ފުރިހަމަ ތަހުގީގެއް ހިންގަވާނެކަމަށް،" ނަޝީދު ވިދާޅުވިއެވެ.