އިންޓަނޭޝަނަލް ޓޭބަލް ޓެނިސް ފެޑެރޭޝަނުގެ މެމްބަރު ގައުމުތަކުގައި ބާއްވާ ރީޖަނަލް ހޯޕްސް ވީކްގައި ބައިވެރިވި ރާއްޖޭގެ ފާތިމަތު ދީމާ ކުޅުނު ހުރިހާ މެޗަކުން މޮޅުވެ، ރަން މެޑަލް ހާސިލްކޮށްފިއެވެ.

އިންޑިއާގެ ހަރިޔާނާ ސްޓޭޓްގައި ބޭއްވި މި ހަރަކާތުން ދީމާ ރަން މެޑަލް ހޯދީ ތަމްރީން ބައިތައް ފަސް ދުވަހަށް ކުރިޔަށް ގެންދިޔުމަށް ފަހު، ހުރިހާ ކުޅުންތެރިން މެދުގައި ބޭއްވި މުބާރާތުންނެވެ.

މުބާރާތުން ދީމާ އެއްވަނަ ހޯދީ އިންޑިއާގެ ގަދަ ހަތަރު ކުޅުންތެރިންނާއި، ލަންކާގެ ގަދަ ދެ ކުޅުންތެރިންނާއި، ނޭޕާލްގެ ގަދަ ދެ ކުޅުންތެރިން އަދި ބޫޓާންގެ ގަދަ ދެ ކުޅުންތެރިންނާ ވާދަކޮށްގެންނެވެ.

މިއާ އެކު ދީމާ ވެގެން ގޮސްފައި ވަނީ ކުޅުނު ހުރިހާ މެޗަކުން ވެސް މޮޅުވެ، ރަން މެޑަލްއެއް ހޯދި ފުރަތަމަ ދިވެހި ކުޅުންތެރިޔާއަށެވެ. އަދި މިއީ ޓޭބަލް ޓެނިސް މުބާރާތެއްގައި ރާއްޖެއިން ހޯދި ފުރަތަމަ ރަން މެޑަލްއެވެ.

މި ޕްރޮގްރާމުގައި ދީމާގެ އިތުރުން ބައިވެރިވެފައި ވަނީ މަލާކް ބިންތި މުއިއްޒު އާއި، އުމެއިރު މުހައްމަދު މުއިއްޒުގެ އިތުރުން ޒީކް ހަސަން ލަތީފެވެ. މި ޓީމުގެ ކޯޗަކީ ކުރީގެ ޓޭބަލް ޓެނިސް ޗެމްޕިއަން އަދި ޓީޓީ އެސޯސިއޭޝަނުގެ އެކްސްކޯ މެމްބަރު އިބްރާހީމް ޝިއުރީއެވެ.

ދިވެހި ޓީމް ރާއްޖެ އައުމަށް ހަމަޖެހިފައި ވަނީ ހޯމަ ދުވަހު ހަވީރުއެވެ. ފްލައިޓް ޖެއްސުމަށް ހަމަޖެހިފައި ވަނީ 16:25 ގައެވެ.