ޕީއެންސީ އުފެއްދުމަށް ބާއްވާ ޖަލްސާ މިރޭ ދަރުބާރުގޭގައި
ޖަލްސާ ފަށާނީ 8:30 ގައި
ޕީއެންސީ އުފެއްދުމުގެ ޖަލްސާ ބޭއްވުމުގެ ހުއްދަ ދެނީ
ޕީޕަލްސް ނޭޝަނަލް ކޮންގްރެސް (ޕީއެންސީ) އުފެއްދުމަށް ބާއްވާ ޖަލްސާ މިރޭ ދަރުބާރުގޭގައި އޮންނާނެ ކަމަށް އެޕާޓީ އުފެއްދުމުގައި އިސްކޮށް ހުންނަވާ ފަރާތް ކަމަށްވާ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވެއްޖެ އެވެ.
ހޮނިހިރު ދުވަހު އަބްދުއްރަހީމް ކުރައްވާފައިވާ ޓްވީޓެއްގައި ވިދާޅުވެފައިވަނީ ޕީއެންސީ އުފެއްދުމަށް ބާއްވާ ޖަލްސާ މިރޭ 08:30 ގައި ދަރުބާރުގޭ ރަންނަ ބަނޑޭރި މާލަމްގައި އޮންނާނެ ކަމަށާއި ދައުވަތު އެރުވިފައިވާ ބޭފުޅުން އެ ޖަލްސާ އަށް ވަޑައިގަތުމަށް އެދޭކަމަށެވެ
ރައީސް އަބްދުﷲ ޔާމީން އިސްވެ ހުންނަވައިގެން މަސައްކަތް ކުރައްވަމުން އަންނަ ޕީއެންސީ އުފެއްދުމަށް ބާއްވަންޖެހޭ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަންސް (އީސީ) އިން ދީފައި ވަނީ ބުރާސްފަތި ދުވަހުއެވެ.
ޕީއެންސީ އުފެއްދުމަށް ބޭނުންވާ ޖަލްސާ ބޭއްވުމުގެ ހުއްދަ އީސީން ދީފައި ވަނީ އީސީގެ މެންބަރުން މަޖިލީހަށް ހާޒިރު ކުރާނެ ކަމުގެ އިންޒާރު ދީފައި ވަނިކޮށެވެ.
ޕީއެންސީގެ އިތުރުން މިހާތަނަށް ރާއްޖޭގައި އަށް ޕާޓީއެއް ވަނީ ރަޖިސްޓްރީކޮށްފައެވެ. އެއީ ދާދި ފަހުން ރަޖިސްޓްރީކުރި ކުރީގެ ނައިބު ރައީސް އަހްމަދު އަދީބު އިސްކޮށް ހުންނަވައިގެން އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އާއި މަސައްކަތްތެރިންގެ ހައްގުތައް ދިފާއުކުރުމަށް ކަމަށް ބުނެ އުފެއްދި ލޭބާ ޕާޓީގެ އިތުރުން އެމްޑީޕީ އާއި، ޕީޕީއެމް، ޖުމްހޫރީ ޕާޓީ، އަދާލަތު ޕާޓީ، އެމްޑީއޭ އަދި ޑީއާރުޕީއެވެ.
