އެމްޑީޕީގެ ފަރާތުން ރައްޔިތުން މަޖިލީހަށް ކުރިމަތިލާ ކެންޑިޑޭޓުންގެ މަސައްކަތަކަށް ދެންވާނީ މަޖިލިސް އިންތިހާބުގެ މަސައްކަތު ބައްދަލުވުމުގެ ނިންމުންތައް ރައްޔިތުންނަށް ކިޔައިދިނުން ކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް ރައްޔިތުންގެ މަޖިލީހަށް އެމްޑީޕީން ހުށަހަޅަން ގަސްތުކޮށްފައިވާ ބައެއް ހުށަހެޅުންތަކާ ބެހޭ މައުލޫމާތު ހިއްސާކޮށް ހިޔާލު ހޯދުމަށް އެމްޑީޕީގެ ކެންޑިޑޭޓުންނާއެކު ބޭއްވި މަސައްކަތު ބައްދަލުވުން ނިންމަވާލައްވަމުން ނަޝީދު ވިދާޅުވީ އެމްޑީޕީގެ ކެންޑިޓޭޓުން ހުށަހެޅި 15 ކަރުދާހަށް ހިޔާލު ހުށަހެޅުމުގެ ފުރުސަތު އަންނަ އަންގާރަ ދުވަހާ ހަމައަށް ހުޅުވާލާފައިވާ ކަމަށެވެ.
އެ މަސައްކަތު ބައްދަލުވުމަށް ޖުޑިޝަރީ އިސްލާހު ކުރުމަށް ހުށަހެޅުއްވީ ތުޅާދޫ ދާއިރާގެ ޓިކެޓް ކަށަވަރު ކުރެއްވި ހިސާން ހުސެއިނެވެ. އަދި މެމްބަރުންގެ ނަޒާހަތްތެރިކުރުވުމާ ގުޅޭ ކަރުދާސް ހުށަހެޅުއްވީ ފެލިދޫ ދާއިރާއަށް އެމްޑީޕީ ޓިކެޓުގައި ވާދަ ކުރައްވާ މަބްރޫކް އަޒީޒެވެ. ކަރަންޓާއި ފެން އަގު ހެޔޮ ކުރުމުގެ އިސްލާހު ހުށަހަޅުއްވާފައި ވަނީ ހޯރަފުށީ ދާއިރާއަށް އެމްޑީޕީގެ ފަރާތުން ވާދަކުރައްވާ އަހްމަދު ސަލީމް (ސައްލެ)އެވެ. މީގެ އިތުރުން ލާމަރުކަޒީ ޤާނޫނަށް ހުށަހަޅާ އިސްލާހު އިއްވަވައި ދެއްވީ ހުޅުމާލެ ދާއިރާގެ އެމްޑީޕީ ޓިކެޓް ކާމިޔާބު ކުރެއްވި އަލީ ނިޔާޒެވެ. އަމިއްލަ އާމްދަނީ އިން ޓެކްސް ނެގުން ނުވަތަ އިންކަމް ޓެކްސް ނެގުމާ ގުޅޭ ކަރުދާސް ހުށަހެޅުއްވީ ހުޅުދޫ ދާއިރާގެ ޓިކެޓް ކާމިޔާބު ކުރެއްވި އިލްޔާސް ލަބީބެވެ.
މަޖިލީހަށް މެމްބަރުން ހޮވުމަށްފަހު ރައްޔިތުންނާ ބައްދަލުނުކުރާ ކަމަށް އެ ރައްޔިތުން ބުނަމުންދާކަން ފާހަގަކުރައްވާ ނަޝީދު ވިދާޅުވީ މަޖިލިސް މެމްބަރުންނާއި ރައްޔިތުންނާއި ބައްދަލު ކުރުމުގެ އިންތިޒާމުގެ ތެރޭގައި މެދުމިނުމުގެ ހައްލެއް ހޯދަން ޖެހޭ ކަމަށެވެ. އެގޮތުން ބައެއް ޤައުމުތަކުގައި އެކަން ހައްލުކުރާ ގޮތަކީ އޮފީސްތައް ބަހައްޓައިގެން އެ އޮފީސްތަކަށް ރައްޔިތުންނަށް ގޮސް، ޝަކުވާތައް ހުށަހަޅައިގެން ކަމަށް ނަޝީދު ވިދާޅުވިއެވެ.
މީގެ އިތުރުން ނަޝީދު ވިދާޅުވީ ރާއްޖޭގެ ރަށްތަކުގެ ކައުންސިލް އިދާރާގައި ރައްޔިތުން މަޖިލީހުގެ މޭޒެއް ބެހެއްޓޭނެ އުސޫލެއް ގެންގުޅުމަކީ ވެސް ކުރެވިދާނެ ކަމެއް ޤަބޫލުކުރައްވާ ކަމަށެވެ.
މި މަސައްކަތު ބައްދަލުވުމުގައި މަޝްވަރާކޮށްފައި ވަނީ ބޯހިޔާވަހިކަން ފޯރުކޮށްދިނުމާއި، ލާމަރުކަޒު ކުރުމާއި، އަމިއްލަ އާމްދަނީން ޓެކްސް ނެގުމާއި، އެންމެ ކުޑަ އުޖޫރަ ކަނޑައެޅުމާއި، ދަރިވަރުންގެ ދަރަންޏާއި، އަން އެމްޕޮއިމެންޓް ބެނެފިޓް ދިނުމާއި، ވަލާއި ފަރުތައް ހިމާޔަތްކޮށް ބެލެހެއްޓުމާއި، ފެނާއި ކަރަންޓްގެ އަގު ހެޔޮ ކުރުމާއި، ދަތުރުފަތުރާއި، މަހުގެ ހަމަ އަގާއި، ޖަވާބު ދާރީ ކުރުވަނިވި ދައުލަތެއް ބިނާ ކުރުމާއި، އެގްރި ވިޔަފާރިއާއި، ޓްރާސްސިޝަނަލް ޖަސްޓިސް އާއި ޓުއަރިޒަމް އާއި ގެސްޓް ހައުސްގެ އިތުރުން ޖުޑިޝަރީ އިސްލާހް ކުރުމާއި، ރައްޔިތުންގެ މަޖިލީހުގެ މެމްބަރުންގެ ނަޒާހަތްތެރިކަމުގެ މައްޗަށެވެ.
މި މަސައްކަތުގައި ބައްދަލުވުމުގެ 66 ކެންޑިޑޭޓުންނަށްވުރެ ގިނަ ކެންޑިޑޭޓުން ވަނީ ބައިވެރިވެވަޑައިގެންފައެވެ.