ނޮޅިވަރަމްގައި އެމްޓީސީސީން ކުރިއަށްގެންދިޔަ މަޝްރޫއުތައް ނުނިންމާ ފައިބަން މަސައްކަތް ކުރުމުން ހުއްޓުވައިފި
26 ޖެނުއަރީ 2019 | ހޮނިހިރު 11:39ބަނދަރުމަތީގެ 8 ފޫޓަށް ފޭވެމަންޓްގައި ގާއެތުރުމަށް ވަނީ އެއްބަސްވެފައި
ނޮޅިވަރަމްގައި އެމްޓީސީސީއިން މަސައްކަތް ކުރަމުންދާ ސައިޓެއް
އެމްޓީސީސީން ހދ. ނޮޅިވަރަމްގައި ކުރިއަށްގެންދިޔަ މަޝްރޫއުތައް ނުނިންމައި އެރަށުން ފައިބަން މަސައްކަތް ކުރުމުން އެކަން ހުއްޓުވައިފިއެވެ.
ރާއްޖެއެމްވީއަށް މައުލޫމާތު ދެއްވަމުން އެރަށުގެ ކައުންސިލަރު އިބްރާހިމް ނަސީރު ވިދާޅުވީ ބަނދަރުގެ ނެރުފައިކަށި ހެދުމުގެ މަސައްކަތާއި، ބަނދަރު މަތީގެ އަށް ފޫޓަށް ފޭވެމަންޓްގައި ގާ އެތުރުމާއި، ފުޓްބޯޅަ ދަނޑު އެއްވަރުގެ ކުރުމުގެ މަސައްކަތުގެ އިތުރުން ވާރޭވެހޭ ދުވަސްވަރު ރަށު ތެރޭ ފެންބޮޑުވާ މަގުތަކަށް ވެލިއެޅުމާއި, މަގު އެއްވަރުގެ ކުރުމުގެ މަސައްކަތް ކުރުމަށް އެމްޓީސީސީއާ ހަވާލުކޮށްފައިވާ ކަމަށެވެ.
ނަސީރު ވިދާޅުވީ އެ މަސައްކަތްތަކަކީ 2017 ވަނަ އަހަރު ފަހުކޮޅު ކުރީގެ ރައީސް ޔާމީންގެ ސަރުކާރުގައި ހައުސިން މިނިސްޓްރީން އެމްޓީސީސީއާ ހަވާލުކޮށްފައިވާ މަސައްކަތްތަކެއް ކަމަށެވެ. ނަމަވެސް ބަނދަރުގެ ނެރުފައިކަށި ހެދުން ފިޔަވައި އެހެން މަސައްކަތެއް ކޮށްފައިނުވާ ކަމަށާއި، ދެން ހުރި މަސައްކަތުގެ އަމަލީ މަސައްކަތް ވެސް ފަށާފައިނުވާ ކަމަށެވެ. މި ހުރިހާ ދުވަހު މަސައްކަތް ނުފަށައި ދިގުދައްމާލީ ތަފާތު އެކި އުޒުރުތައް ދެއްކުމަށް ފަހު ކަމަށް ވެސް އޭނާ ވިދާޅުވިއެވެ.
"މަސައްކަތް ކުރާ މީހުން ގާތު އަހާލިމަ ކޮންވެސް އުޒުރެއް ދައްކާނެ. ވަސީލަތްތައް ނެތޭ. މޫސުން ގޯހޭ" ނަސީރު ވިދާޅުވިއެވެ.
ނަސީރު ވިދާޅުވީ މަސައްކަތް ނުނިންމައި ހުކުރު ދުވަހު ރަށުން ފޭބުމަށް މަސައްކަތް ކުރުމުން ރަށު ރައްޔިތުން ނުކުމެ އެކަން ހުއްޓުވީ ކަމަށާއި، މަސައްކަތް ކުރުމަށް ބޭނުން ކުރި ސާމާނުތައް އެރުވުމަށް ރަށަށް ގެނައި ކޮޅުވެއްޓި ވެސް ރަށު ރައްޔިތުން ނުކުމެ ބަނދަރުން ބޭރުކުރީ ކަމަށެވެ.
މަސައްކަތް ނުނިންމާ އެމްޓީސީސީގެ މުއައްޒަފުން ދިއުމަށް މަސައްކަތް ކުރަނީ ބަނދަރުގެ ފައިކަށި ހެދުން ފިޔަވައި އެހެން މަސައްކަތެއް ކުރުމަށް އެގްރިމެންޓްކޮށްފައި ނުވާތީ ކަމަށް މިހާރު މި މަސައްކަތާ ހަވާލުވެ ހުރި ސްޕައިވައިޒަރު ބުނާ ކަމަށެވެ.
މީގެ އިތުރުން ނަސީރު ވިދާޅުވީ އަދިވެސް މަސައްކަތް ނުފަށާ ކަމަށާއި، ނަމަވެސް ބަނދަރުގެ މަސައްކަތް ކުރިއަށްދިޔައިރު ބަނދަރުގެ ބައެއް ލައިޓްތަކަށް އެފަރާތުގެ އިހުމާލުން ގެއްލުންވެފައިވާތީ އެކަން ހައްލުކުރުމުގެ މަސައްކަތް ކުރަމުންދާ ކަމަށެވެ.
ބަނދަރު މަތީގައި ހުރި ހޮޅިދަނޑިއަކަށް ގެއްލުންވެފައި
ނަސީރު ވިދާޅުވީ ރައްޔިތުން އެދޭ ގޮތަށް ކައުންސިލުން މަސައްކަތް ކުރާނެ ކަމަށާއި، ރައްޔިތުން ތިބީ މި މައްސަލައަށް ދޫދޭ ގޮތަށް ނޫން ކަމަށެވެ. އަދި ރައީސް ސޯލިހު އެރަށަށް ވަޑަގެންނެވި ދަތުރުފުޅުގައި މި މަސައްކަތްތައް ނިންމައިދޭނެ ކަމުގެ ފުރިހަމަ ޔަގީންކަން އެމަނިކުފާނު ދެއްވި ކަމަށް ވެސް އޭނާ ވިދާޅުވިއެވެ.
އެމަސައްކަތުގައި ހަވާލުވެ ހުންނެވި އެމްޓީސީސީގެ ސުޕައިވައިޒަރު ވިދާޅުވީ އެކަމާ ބެހޭ ގޮތުން އެއްވެސް ކޮމެންޓެއް ދޭން ބޭނުން ނުވާ ކަމަށެވެ.
