ފިޔާޒަށް ހުކުމް ކުރިތާ ހަތަރު މަހަށް ވުރެ ގިނަ ދުވަސް، އިސްތިއުނާފު ކުރުމާ މެދު އަދިވެސް ގޮތެއް ނުނިންމާ!
2 ޖެނުއަރީ 2018 | އަންގާރަ 03:05ފިޔާޒުއަށް ހުކުމް ކުރީ މިދިޔަ އަހަރުގެ އޯގަސްޓް 27 ގައި
ރާއްޖެޓީވީގެ ސީއޯއޯ ހުސައިން ފިޔާޒު މޫސާއާއި އޭނާގެ ގާނޫނީ ވަކީލު
ރާއްޖެޓީވީގެ ޗީފް އޮޕަރޭޓިންގ އޮފިސަރ(ސީއޯއޯ) ހުސައިން ފިޔާޒު މޫސާގެ މައްޗަށް ދައުލަތުން އުފުލި ދައުވާ ސާބިތުނުވާ ކަމަށް ހުކުމް ކުރިތާ ހަތަރު މަހަށް ވުރެ ގިނަ ދުވަސްވީއިރު ވެސް، އެ މައްސަލަ އިސްތިއުނާފު ކުރުމާ މެދު ގޮތެއް ނުނިންމާ ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފި އެވެ.
ފިޔާޒުގެ މައްޗަށް ކުރީ އަތްލުމުގެ ކުށުގެ ދައުވާއެވެ. އެ ދައުވާ ކުރީ 2015 ވަނަ އަހަރުގެ ނޮވެމްބަރު މަހުގެ ދެވަނަ ދުވަހުގެ ރޭ މުލިއާގެ ކައިރިން ފެނުނު އައިޑީ ނައްތާލަން ސްޓޭޑިއަމް ސަރަހައްދުގައި ފުލުހުން މަސައްކަތް ކުރަމުން ދަނިކޮށް ފުލުހެއްގެ މޭ މަތީގައި އޭނާ ޖަހާފައިވާ ކަމަށް ބުނެއެވެ.
ފިޔާޒުގެ މައްޗަށް ކުރި ދައުވާ ސާބިތުނުވާ ކަމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުގެ އޯގަސްޓް 27 ވަނަ ދުވަހު އެވެ.
ޕްރޮސެކިއުޓަރ ޖެނެރަލްގެ އޮފީހުން ބުނާ ގޮތުގައި، ކްރިމިނަލް ކޯޓުގެ ހުކުމް ހައިކޯޓުގައި އިސްތިއުނާފު ކުރުމާ މެދު އަދި ގޮތެއް ނުނިންމަ އެވެ. އެ އޮފީހުން ކުރިން ބުނަމުން ދިޔައީ މައްސަލަ އިސްތިއުނާފު ކުރުމާ މެދު ގޮތެއް ނުނިންމި އޮތީ މައްސަލަ ނިމުނު ގޮތުގެ ރިޕޯޓް ނުލިބިގެން ކަމަށެވެ.
އެހެންނަމަވެސް، ކްރިމިނަލް ކޯޓުން ބުނާ ގޮތުގައި މައްސަލަ ނިމުނު ގޮތުގެ ރިޕޯޓް ދައުލަތާ ވަނީ ހަވާލުކޮށްފަ އެވެ.
ކޯޓުތަކުންނާއި ޓްރައިބިޔުނަލްތަކުން ކުރާ ޙުކުމްތަކާއި ނިންމުންތައް ދިވެހިރާއްޖޭގެ ހައިކޯޓުގައި އިސްތިއުނާފު ކުރުމަށް މިހާރު ކަނޑައެޅިފައިވަނީ 10 ދުވަހުގެ މުއްދަތެކެވެ. ކޯޓުތަކުގެ ޤާނޫނުން ކަށަވަރު ކޮށްދީފައިވާ 90 ދުވަހުގެ މުއްދަތާއި 180 ދުވަހުގެ މުއްދަތާއި، ވަޒީފާއާބެހޭ ޤާނޫނުން ކަށަވަރު ކޮށްދީފައިވާ 60 ދުވަހުގެ މުއްދަތު ސްޕްރީމް ކޯޓުގެ ސާކިއުލާއެއް މެދުވެރިކޮށް 10 ދުވަހަށް ބަދަލު ކުރީ 2015 ވަނަ އަހަރުގެ ޖެނުއަރީގަ އެވެ.
އިސްތިއުނާފު ކުރުމަށް 10 ދުވަހުގެ މުއްދަތެއް ކަނޑައެޅިފައިވީ ނަމަވެސް، އެކަށީގެންވާ ސަބަބަކާއި ލައިގެން އެ މުއްދަތު ފަހަނައަޅައިދާ ފަހުން އިސްތިއުނާފު ކުރިޔަސް ކޯޓުން މައްސަލަ ބަލައިގަނެއެވެ.
