މާކުރަތުގައި ހުރި ސަރުކާރުގެ ހުރިހާ މުއައްސަސާތަކެއް ފަޅާލި މައްސާލަގައި 4 މީހަކު ހައްޔަރުކޮށްފި
26 ޖެނުއަރީ 2019 | ހޮނިހިރު 06:16ހައްޔަރު ކުރީ 21 އަހަރުގެ ދެ މީހުންނާއި، 19 އަހަރުގެ މީހަކާއި، 62 އަހަރުގެ މީހެއް
ރ.މާކުރަތު
ރ. މާކުރަތު ކައުންސިލް އިދާރާއާއި ރަށު ކޯޓުގެ އިތުރުން އެރަށު ހެލްތް ސެންޓަރު ފަޅާލައި ގިނަ އަދަދެއްގެ ފައިސާ ވަގަށް ނެގި މައްސަލާގައި 4 މީހަކު ހައްޔަރުކޮށްފިއެވެ.
ފުލުހުން ބުނީ މިމައްސަލާގެ ތަހުގީގަށްފަހު، ކޯޓު އަމުރެއްގެ ދަށުން 4 މީހަކު ހައްޔަރުކޮށްފައިވާ ކަމަށެވެ. މިމައްސަލާގައި ހައްޔަރުކުރީ 21 އަހަރުގެ ދެ މީހުންނާއި، 19 އަހަރުގެ މީހަކާއި، 62 އަހަރުގެ މީހެކެެވެ.
ފުލުހުން ބުނީ ހެލްތް ސެންޓަރުގެ ތިޖޫރީ ވަގަށް ގެންގޮސްފައިވާއިރު، އެތަނުގެ އޮފީސް ތެރެއިންވެސް ގިނަ އަދަދެއްގެ ފައިސާ ގެންގޮސްފައިވާ ކަމަށެވެ. އަދި ކައުންސިލްގެ އިދާރާގައި ހުރި ތިޖޫރީ ހަލާކުކޮށްލައިގެން ގިނަ އަދަދެއްގެ ފައިސާ ވަގަށް ނަގާފައިވާ ކަމަށެވެ.
މީގެ އިތުރުން ފުލުހުން ބުނީ އެރަށުގެ ކޯޓުގައި ހުރި ތިޖޫރީ ހަލާކުކޮށްލާފައި ހުރި ނަމަވެސް އެއްވެސް ފައިސާއެއް ތިޖޫރީގައި ނެތް ކަމަށެވެ. ނަމަވެސް ކޯޓުގެ އޮފީސް ތެރޭގައި ބަހައްޓާފައިހުރި ފައިސާތަކެއް ވަގަށް ނަގާފައިވާ ކަމަށެވެ. އެއީ ކިހާ އަދަދެއްގެ ފައިސާ ކަމެއް ފުލުހުން ހާމަކޮށްފައި ނުވެއެވެ.
އެރަށުގެ ކައުންސިލުން ބުނީ ކައުންސިލް އިދާރާގެ ތިޖޫރި ހަލާކުކޮށްލައި، 40،000 ރުފިޔާ ވަގަށް ނަގާފައިވާ ކަމަށެވެ. އަދި ހެލްތު ސެންޓަރުގެ ތިޖޫރި ވަގަށް ގެންގޮސްފައިވާ ކަމަށާއި އެ އިދާރާގައި ހުރި 15،000 ރުފިޔާވެސް ވަގަށް ނަގާފައިވާ ކަމަށެވެ.
މާކުރަތުގެ ސަރުކާރުގެ ހުރިހާ މުއައްސަސާތަކެއް ފަޅާލަފައި ވަނީ ބުރާސްފަތި ދުވަހުގެ ރޭ ދަންވަރުގެ ވަގުތެއްގައެވެ.
