މޯލްޑިވްސް އިމިގްރޭޝަންގެ ތަފާސް ހިސާބުތައް އާންމުކޮށްފިއެވެ.
އިމިގްރޭޝަން އިން ހުކުރު ދުވަހު ކުރި ޓުވީޓެއްގައި ބުނެފައިވަނީ އިމިގްރޭޝަން ކޮންޓްރޯލަރުގެ މަގާމަށް މުހައްމަދު އަހުމަދު ހުސައިން (ހަނަފީ) ވިދާޅުވި ގޮތަށް، އިމިގްރޭޝަން އިން މީގެ ފަހުން ކޮންމެ ހަފްތާއަކު ތަފާސް ހިސާބުތައް އާންމު ކުރަމުންދާނެ ކަމަށެވެ.
Weekly statistics of our services will be uploaded to the website, as disclosed by the Controller General @hanafymv in his press briefing last week.https://t.co/b9uwHoO0Hc
— Maldives Immigration (@ImmigrationMV) January 25, 2019
ތަފާސް ހިސާބުތައް އިމިގްރޭޝަންގެ ވެބްސައިޓް މެދުވެރިކޮށް ލިބޭއިރު ތަފާސް ހިސާބުތަކުގައި ފެންނަ ހުންނަނީ ކޯޓާތަކަށް އެދޭ ފަރާތްތަކާއި ކޯޓާތައް ދޫކޮށްފައިވާ އަދަދުގެ މައުލޫމާތެވެ. އެގޮތުން މި ހަފްތާގައި އާންމުކޮށްފައިވާ ތަފާސް ހިސާބުތަކަށް ބަލާއިރު އެންމެ ގިނައިން ކޯޓާ ދޫކޮށްފައިވަނީ ރިސޯޓު އަދި ގެސްޓް ހައުސްތަކުގައި މަސައްކަތް ކުރުމަށް ބިދޭސީން ގެނައުމަށެވެ. އެ ފަރާތްތަކުން 302 ކޯޓާއަކަށް އެދިފައިވާއިރު އިމިގްރޭޝަންގެ ފަރާތުން ދޫކޮށްފައިވަނީ 174 ކޯޓާއެވެ. ދެވަނަ އަށް އެންމެ ގިނަ ކޯޓާ ދޫކޮށްފައިވަނީ ހޯލްސޭލް އަދި ރީޓެއިލް ވިޔަފާރި ކުރާ ތަންތަނުގައި މަސައްކަތް ކުރުމަށް ބިދޭސީން ގެނައުމަށެވެ. އެ ފަރާތްތަކުން 298 ކޯޓާއަކަށް އެދިފައިވާއިރު އިމިގްރޭޝަން އިން ދޫކޮށްފައިވަނީ 84 ކޯޓާއެވެ.
މީގެ އިތުރުން ތަފާސް ހިސާބުތައް މެދުވެރިކޮށް ޕާސްޕޯޓް ހެދުމަށްޓަކައި ފޯމް ހުށަހެޅި ފަރާތްތަކުގެ އަދަދާއި ޕާސްޕޯޓް ދޫކޮށްފައިވާ އަދަދުގެ މައުލޫމާތު ފެންނަ ހުރެއެވެ.
އިމިގްރޭޝަން އިން މި މަހުގެ 17 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިމިގްރޭޝަންގައި ގިނަ މައްސަލަތަކެއް ހުރިކަން ފާހަގަ ކުރައްވައި ހަނަފީ ވިދާޅުވީ ކޯޓާ ދޫކުރެވިފައިވާ އުސޫލުން ބޭރުން ކުދި ކެފޭފަދަ ތަންތަނަށް 100 ކޯޓާ ދޫކުރެވިފައި ކަމަށާއި، ގެސްޓްހައުސް ތަކަށް 80 ކޯޓާ ދޫކޮށްފައިވާ ކަމަށެވެ. އަދި ބައެއް ޕްރޮޖެކްޓްސް ތަކަށް އުސޫލުން ބޭރުން އެއްތަނަކަށް 3،700 ކޯޓާ ދޫކޮށްފައިވާ ކަމަށެވެ. އަދި އެކޯޓާތައް މިހާރު ކެންސަލް ކޮށްފައިވާ ކަމަށް އޭނާ ވިދާޅުވިއެވެ.
