ކާތިކް ބެނުންވަނީ ސީރިއަސް ފިލްމްތައް ކުޅެން

ކޮމެޑީ ފިލްމް ތަކުން ފެނިގެން ގޮސްފައިވާ ބޮލީވުޑްގެ ތަރި ކާތިކް އާރްޔަން މިހާރު ބޭނުންވަނީ ސީރިއަސް ފިލްމްތައް ކުޅެން ކަމަށް އޭނާ ބުނެފިއެވެ.

"ޕްޔާރުކާ ޕަންޗްނާމާ ސީރީސް" އަދި "ސޯނޫކި ޓިޓޫ ކި ސްވިޓީ" ފަދަ ހެއްވާ މަޖާ ފިލްމްތައް ކުޅެފައިވާ ކާތިކް ބުނެފައިވަނީ އުފާވެރި ހެއްވާ މަޖާ ރޯލްތައް ކުޅުމުން ދުރަށް ޖެހިލުމަށްފަހު ތްރިލާ ފިލްމްތައް ކުޅުމަށް ބޭނުންވާ ކަމަށެވެ.

ކާތިކްގެ ދެން އަންނަން އޮތް ފިލްމް "ލުކާ ޗުއްޕީ"ގެ ޓްރެއިލާ ލައުންޗިންގައި ކާތިކް ބުނެފައިވަނީ ކޮމެޑީ ރޯލްތަކަކީ ކުޅެން އެންމެ އުނަދގޫ ރޯލް ކަމަށް އޭނާ ގަބޫލު ކުރާ ކަމަށާއި މީހުން އޭނާގެ މަސައްކަތް ބަލައިގަންނާތީ އެކަމާ އުފާވާކަމަށެވެ.

"އަހަރެން ކުޅޭހިތްވޭ ތްރީލާ އަދި ވިލަންގެ ރޯލް. އެފަދަ ފިލްމްތައް ބެލުމަށް އަހަރެން ލޯބިކުރަން. އަހަރެން ބޭނުން ހެއްވާ މަޖާ ރޯލްތަކުގެ އިތުރުން އެފަދަ ރޯލްތައް ކުޅެން" ކާތިކް ވަނީ ބުނެފައެވެ.

ކާތިކް ބުނެފައި ވަނީ އޭނާއަށް ކޮމެޑީ ފިލްމްތަކުން މިހާރުވެސް ފުރުސަތު ލިބޭ ކަމަށާއި ނަމަވެސް މިހާރު ބޭނުންވަނީ ސީރިއަސް ފިލްމްތައް ކުޅެން ކަމަށެވެ.

"ލުކާ ޗުއްޕީ" ގައި ކާތިކް އާއި އެކު ބަތަލާގެ ރޯލުން ފެނިގެންދާނީ ކްރިތީ ސެނޯން އެވެ. މި ފިލްމްގައި ކާތިކް ފެނިގެންދާނީ ނޫސްވެރިއެއްގެ ރޯލުންނެވެ.

ކާތިކް އެންމެ ފަހުން ފެނިގެން ގޮސްފައިވަނީ ކާމިޔާބު ފިލްމް "ސޯނޫކި ޓީޓޫކި ސްވިޓީ" އިންނެވެ. މި ފިލްމް ވަނީ ބޮކްސް އޮފީހުގައި 100 ކްރޮޑް ކްލަބަށް ވަދެފައެވެ.

ލަކްސްމަން އުތޭކަރު ޑައިރެކްޓް ކުރާ މި ފިލްމްގައި ކާތިކް އާއި ކްރިޓީގެ އިތުރުން ޕަންކަޖް ޓްރިޕަތީ، އަޕާޝަކްތީ ކުރާނާ އަދި ވިނޭ ޕަތަކް ފެނިގެންދާނެއެވެ.

މޭޑޮކް ފިލްމްސް އާއި ޖިއޯ ސްޓޫޑިއޯ ގުޅިގެން އުފައްދާ މި ފިލްމް ރިލީޒް ކުރުމަށް ހަމަޖެހިފައިވަނީ މާރޗް މަހުގެ އެއްވަނަ ދުވަހު އެވެ.