ސަލާ އަދިވެސް ނުފެނޭ، ހޯދުމުގެ މަސައްކަތް ދަނީ ކުރިޔަށް

ދަތުރުކުރި ޖެޓު ގެއްލުނު ހާދިސާގައި އަދިވެސް އޭނާ ފެނިފައިނުވާއިރު، ހޯދުމުގެ މަސައްކަތް ހުއްޓާނުލާ ކުރިޔަށް ގެންދާކަމަށް ކަމާބެހޭ ފަރާތްތަކުން ބުނެފިއެވެ.

އަންގާރަ ދުވަހު ފްރާންސް ގަޑިން ރޭގަނޑު 19:15 ގައި ނެންޓެސްއިން ނައްޓާލި މި ޖެޓުގެ ހަބަރެއް އެންމެ ފަހުންވީ 5000 ފޫޓު މަތީގައި އޮއްވައި ކަމަށާއި, ޖެޓާއި ގުޅުން ކެނޑުނީ 2300 ފޫޓު މަތިން ދަތުރުކުރަނިކޮށް ކަމަށް ރިޕޯޓުތައް ބުނެއެވެ.

ކަމާ ބެހޭ ފަރާތްތަކުން ބުނީ، ސަލާ ހޯދުމުގެ މަސައްކަތް ކުރިޔަށްދިޔަ ނަމަވެސް، އޭނާ ދިރިހުއްޓާ ފެނުމުގެ ފުރުސަތު ވަރަށް ހަނި ކަމަށާއި، ހުރިހާ ވަސީލަތެއް ބޭނުންކޮށްގެން މަސައްކަތް ކުރިޔަށްދާ ކަމަށެވެ.

ލީގުގައި ދަށް ނަތީޖާތަކެއް ނެރެމުން އަންނަ ކާޑިފް ރެލިގޭޝަނުން ސަލާމަތްކުރުމަށް އެޓީމަށް ސަލާ ގެނެސްފައި ވަނީ މިދިޔަ ހަފްތާއެވެ. މައުލޫމާތު ލިބިފައިވާ ގޮތުގައި ފްލައިޓުގައި ކާޑިފް އަށް ސަލާ ދަތުރުކުރަމުން ދިޔައީ އެޓީމާއި ގުޅުމަށެވެ.

ފްރާންސްގެ ނެންޓެސްއަށް ކުޅެމުން އައި ސަލާ ވަނީ އެޓީމަށް ކުޅުނު 130 މެޗުގައި 48 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ހަތަރު ސީޒަން ހޭދަކޮށްފައެވެ.

އާޖެންޓީނާއަށް އުފަން އުމުރުން 28 އަހަރުގެ ސަލާ ވަނީ ސިއަން އަދި ބޯޑޯ އަށް ވެސް ކުޅެފައެވެ.