މުމްބާއީގައި ބާއްވާ ޓްރަވެލް ޓްރޭޑް ފެއަރގައި ރާއްޖެއިން ބައިވެރިވެއްޖެ
23 ޖެނުއަރީ 2019 | ބުދަ 14:08މިފެއަރ ކުރިއަށް ދާނީ ޖެނުއަރީ 23 އިން 25 އަށް
މުމްބާއީގައި ކުރިއަށްދާ އޯޓީއެމް ފެއަރގެ ތެރެއިން
އިންޑިއާގެ މުމްބާއީގައި ބާއްވާ އެ ޤައުމުގެ އެންމެ ބޮޑު އެއް ޓްރަވެލް ޓްރޭޑް ފެއަރ ކަމުގައިވާ އޯޓީއެމްގައި ފުރަތަމަ ފަހަރަށް ގެސްޓް ހައުސް އެސޯސިއޭޝަން އޮފް މޯލްޑިވްސް އިން ބައިވެރިވެއްޖެއެވެ.
މި ފެއަރގައި ގެސްޓް ހައުސް އެސޯސިއޭޝަން އޮފް މޯލްޑިވްސް (ޖީއޭއެމް) އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަންސް (އެމްއެމްޕީއާރުސީ) އިން ބައިވެރިވެފައިވާއިރު، މި ފެއަރ ކުރިޔަށް ދާނީ މި ޖެނުއަރީ މަހުގެ 23 ވަނަ ދުވަހުން ފެށިގެން މި މަހުގެ 25 ވަނަ ދުވަހުގެ ނިޔަލަށެވެ. އަދި މި ފެއަރގައި ރާއްޖޭގެ ޓުއަރިޒަމަކީ އެންމެނަށް އެކަށީގެންވާ ގޮތުގައި ޗުއްޓީ ހޭދަކޮށްލެވޭނެ ފަދަ ޓްއަރިޒަމެއް އޮތް ޤައުމެއްގެ ގޮތުގައި އިޝްތިހާރު ކުރާނެއެވެ.
މި ފެއަރގައި ގެސްޓްހައުސް އެސޯސިއޭޝަންގެ ފަރާތުން ބައިވެރިވުމުގެ އެންމެ ބޮޑު އެއް ބޭނުމަކީ ގޯ އެއަރ އަދި އިންޑިގޯގެ ދަތުރުތައް ރާއްޖެއަށް ފެށުމާ އެކު އިންޑިޔާގެ ފަތުރުވެރިންގެ އަދަދު ވަރަށް ބޮޑަށް އިތުރުވެފައިވުމުގެ ސަބަބުން ރާއްޖޭގެ ފަތުރުވެރިކަން އިތުރަށް ފުޅާކޮށް ރާއްޖެއަށް އަންނަ ފަތުރުވެރިންގެ އަދަދު އިތުރުކުރުން ކަމަށް މި ފެއަރގައި ގެސްޓް ހައުސް އެސޯސިއޭޝަންގެ ފަރާތުން ބައިވެރި އެސޯސިއޭޝަންގެ ވައިސް ޕްރެސިޑެންޓް އަދި ޔޫ.އައި ހޮޓެލްސްގެ މެނޭޖިންގ ޑިރެކްޓަރ މޫސާ ނާސިހް ވިދާޅުވިއެވެ. މިއީ އިންޑިޔާ މާރކެޓުން ރާއްޖެއަށް އަންނަ ފަތުރުވެރިން އިތުރުކުރުމަށް ވަރަށް ރަނގަޅު ޕްލެޓްފޯމެއް ކަމަށް ވެސް ނާސިޙް ވިދާޅުވިއެވެ.
މި ފެއަރގައި ގެސްޓް ހައުސް އެސޯސިއޭޝަންގެ ފަރާތުން ރާއްޖެ ތަމްސީލުކުރުމަށް ބޭނުންކުރާ މޮޓޯ "ލޯކަލް އައިލެންޑް ޓްއަރިޒަމް" (ރަށްފުށު ފަތުރުވެރިކަން) އަށް ދަނީ ވަރަށް ބޮޑު ތަރުހީބެއް ލިބެމުންނެވެ.
