ސުމޭކީ ވަސީލަތްތަކާ އެކު ރާއްޖޭގެ ހުރިހާ ރަށަކުން އުރީދޫގެ ހުރިހާ ޙިދުމަތެއް މިހާރު ލިބޭނެ!

އުރީދޫގެ ޕާޓްނަރުންގެ ވިއުގަ ހަރުދަނާކޮށް، ކަސްޓަމަރުންނަށް އަވަސް އަދި ފުރިހަމަ ޚިދުމަތް ފޯރުކޮށްދިނުމަށް ބާރުވެރިކޮށްދޭ ސުމޭކީ ވަސީލަތްތަކާއި ވިޔަފާރީގެ ބައިވެރިން ގުޅުވައިދީގެން، އެކުންފުނީގެ މައި ފިހާރަތަކުންނާއި އުރީދޫ އެކްސްޕީރިއަންސް ސެންޓަރުތަކުން ލިބޭ އެންމެހާ ޚިދުމަތްތަކެއް ރާއްޖޭގެ ހުރިހާ ރަށަކުން ފޯރުކޮށްދިނުން މިހާރު ލިބެން ހުންނާނެ ކަމަށް އެކުންފުނިން ހާމަކޮށްފިއެވެ.

މީގެ ތެރޭގައި ޕްރީޕެއިޑް އަދި ޕޯސްޓްޕެއިޑް ޕްލޭނާއި އެޑް-އޯންތައް ޚިޔާރުކުރުމުން، އުރީދޫގެ ބިލަށް ފައިސާ ދެއްކުން އަދި އެމް-ފައިސާގެ ޚިދުމަތްތައް ހޯދުން ވެސް ހިމެނެއެއެވެ.

ސުޕަނެޓް ފިކްސްޑް ބްރޯޑްބޭންޑް ތައާރަފް ކޮށްފައިވާ ރަށްތަކުގައި، ސުޕަނެޓްގެ ޚިދުމަތްތައް ވެސް އުރީދޫގެ ޕާޓްނަރ ފިހާރަތަށް މެދުވެރިކޮށް ލިބޭނެ ކަމަށާއި ހުރިހާ ފިހާރަތަކުން ވެސް އުރީދޫގެ ޚިދުމަތްތަކާއި ބިލްތަކާ ބެހޭ މައުލޫމާތު ފޯރުކޮށްދެވި، ކަސްޓަމަރުންގެ ސުވާލުތަކަށް ވަރަށް ގާތުން އެހީތެރިކަން ފޯރުކޮށްދޭނެ ކަމަށް އުރީދޫއިން ބުންޏެވެ.

އުރީދޫގެ ސީއީއޯ، ނަޖީބް ޚާން ވިދާޅުވީ ސުމޭކީ ޚިދުމަތްތައް ފޯރުކޮށްދޭ ކުންފުންޏެއްގެ ގޮތުގައި، ކަސްޓަމަރުންނާ ހަމައަށް އެކުންފުނީގެ ޚިދުމަތްތައް ފޯރުކޮށްދޭ ޑިސްޓްރިބިއުޝަން ސްޓްރެޓެޖީ އިން ފެށިގެންގޮސް، ކަސްޓަމަރުންނާ ކުރާ މުއާމަލާތްތަކާއި، ކުންފުނީގެ އެތެރޭގެ ތަފާތު ހިންގުންތަކާއި ހަމައަށް ވެސް، ދަނީ ސުމޭކީ އާލާތްތައް މެދުވެރިކޮށް ވަރުގަދަ ކުރަމުން ކަމަށެވެ.

"ރާއްޖޭގެ މީހުން ދިރިއުޅޭ ކޮންމެ ރަށެއްގައި ވެސް، އުރީދޫގެ ކޮންމެ ޚިދުމަތެއް ޚިޔާރުކުރުމުގެ ފުރުސަތު މަގުފަހިކޮށް، ކަސްޓަމަރުންގެ ކޮންމެ ބޭނުމަކަށް ވެސް އަމަލީ ގޮތުން އެހީތެރިކަން ފޯރުކޮށްދެވުމަކީ އަޅުގަނޑުމެން ނުހަނު ފަޚުރުވެރިވާ ކަމެއް. ޒަމާނީ ޓެކްނޮލޮޖީތަކާއި، އީޖާދީ ޚިދުމަތްތަކުގެ އެހީގައި އުރީދޫ އިން އަބަދުވެސް މަސައްކަތް ކުރަމުންދާނީ، އަޅުގަނޑުމެންނާއި އެކު ކަސްޓަމަރުން ކުރާ ކޮންމެ ތަޖުރިބާއެއް ވެސް އިތުރަށް ފުރިހަމަކޮށްދިނުމަށް،" އުރީދޫގެ ސީއީއޯ، ނަޖީބް ޚާން ވިދާޅުވިއެވެ.

ގައުމުގެ ސުމޭކީ ވިއުގަ އެތައް ގުނައަށް ވަރުގަދަ ކޮށްދިން ކަމީ އެންމެހާ ދިވެހިން ވެސް ހިމެނޭ ގޮތަށް، ބައިނަލްއަޤްވާމީ ސުމޭކީ ދުނިޔެއާ ގުޅުވާލަދިން ކަމެއް ކަމަށްވެސް ސީއީއޯ ވިދާޅުވިއެވެ.

މައި އުރީދޫ އެޕް، އުރީދޫ ނެކްސްޓް، އަދި މަގޭ ޕްލޭން ފަދަ ސުމޭކީ ޕްލެޓްފޯމްތައް މެދުވެރިކޮށް އުރީދޫ ކަސްޓަމަރުންނަށް ކޮންމެ ތަނަކު ހުރެގެން، ކޮންމެ ވަގުތެއްގައި ވެސް އުރީދޫގެ ޚިދުމަތް ހޯދޭނެއެވެ. ލިބިގެންދާ ފަސޭހަތަކާއި، އަވަސް ޚިދުމަތްތުގެ ސަބަބުން، 2018 ވަނަ އަހަރުގައި އުރީދޫގެ މި ޕްލެޓްފޯމްތައް މެދުވެރިކޮށް ކަސްޓަމަރުން ކޮށްފައިވާ ސުމޭކީ މުއާމަލާތްތައް ވަނީ ދެގުނަވެފައެވެ.