ހުޅުމާލޭގައި އެކްސިޑެންޓެއް ހިނގައި ދެ މީހަކަށް އަނިޔާވެއްޖެ!
23 ޖެނުއަރީ 2019 | ބުދަ 11:28ދެ އެކްސިޑެންޓް ވަނީ ހިނގާފައި
މިއަދު ހެނދުނު ހިނގި އެކްސިޑެންޓެއްގައި ދެ މީހަކަށް ވަނީ އަނިޔާވެފައި
ހުޅުމާލޭގައި އެކްސިޑެންޓެއް ހިނގައި ދެ މީހަކަށް އަނިޔާވެއްޖެއެވެ.
މި އެކްސިޑެންޓް ހިނގާފައި ވަނީ ބްރިޖް މަތިން ދުއްވާފައި ދިޔަ ސައިކަލަކާއި ވޭނެއް ޖެހިގެން ކަމަށް މައުލޫމާތު ލިބިއެވެ. ހުޅާމާލެ ހޮސްޕިޓަލްގެ މީޑިއާ އޮފިސަރ އާޝިޔާ ސޯލިހް ވިދާޅުވީ، މިއަދު މެންދުރު 14:55 އެހާކަށް ހާއިރު އެކްސިޑެންޓެއްގައި އަނިޔާވެގެން އުމުރުން 61 އަހަރުގެ ގއ. ކޮލަމާފުއްޓަށް ނިސްބަށްވާ މީހަކު ގެންގޮސްފައިވާ ކަމަށެވެ.
އެމީހާގެ ވާއަތު ފަޔަށް އަނިޔާވެފައިވާ ކަމަށާއި، ފައިގެ ކުޑަ ހުޅުގެ ކަށިގަނޑު ވެސް ވަނީ މަސްގަނޑުން ބޭރަށް ނިކުމެފައި ކަމަށް އާޝިޔާ ވިދާޅުވިއެވެ. ހޮސްޕިޓަލަށް ގެންގޮސްފައި ވަނީ ސައިކަލް ދުއްވަން އިން މީހާ ކަމަށް މައުލޫމާތު ލިބޭއެވެ.
މީގެ އިތުރުން މިއަދު ހެނދުނު ހުޅުމާލޭގައި ހިނގި އެކްސިޑެންޓެއްގައި ދެ ފިރިހެނަކަށް ވަނީ އަނިޔާވެފައެވެ. އެކްސިޑެންޓް ހިނގާފައި ވަނީ ދުއްވާފައި ދިޔަ ދެ ސައިކަލް ޖެހިގެން ކަމަށް ހުޅުމާލޭ ހޮސްޕިޓަލުން މައުލޫމާތުދެއެވެ.
އެކްސިޑެންޓްގައި 58 އަހަރުގެ މީހަކާއި 54 އަހަރުގެ މީހަކަށް ވަނީ އެކި ވަރުގެ އަނިޔާވެފައެވެ. މި ދެ މީހުންގެ ތެރެއިން 58 އަހަރުގެ މީހާއަކީ ގދ. ގައްދޫ އަށް ނިސްބަތްވާ މީހެއް ކަމަށާއި، އެނާގެ ބޮލުގެ އިތުރުން ވައަތު އަތަށް ވެސް އަނިޔާތަކެއް ވެފައިވާ ކަމަށް ހުޅުމާލޭ ހޮސްޕިޓަލްގެ މީޑިއާ އޮފިޝަލް ވަނީ ވިދާޅުވެފައެވެ.
ދެވަނަ މީހާގެ ނޭފަތުން ކޮންމެވެސް ވަރަކަށް ލޭ އައިސް ހުރި ކަމަށާއި އެ މީހާއާ އެކު ސައިކަލްގައި އިން އަށް އަހަރުގެ ކުއްޖަކު ވެސް ގެންގޮސް ފަރުވާދީފައިވާ ކަމަށް މީޑިއާ އޮފިޝަލް ވިދާޅުވިއެވެ.
އާޝިޔާ ވިދާޅުވީ، އަށް އަހަރުގެ އެ އަންހެން ކުއްޖާ އަށް އެއްވެސް އަނިޔާއެއް ލިބިފައި ނުވާ ކަމަށެވެ.
މި ފަހަކަށް އައިސް އެކްސިޑެންޓްތައް ހިނގާ އަދަދު ވަނީ ގިނަވެފައެވެ.
