ޕާކިސްތާނު ދެމަފިރިއަކު މޫދަށް އެރި އުޅެނިކޮށް، އެކަކު ގެނބެން ދަނިކޮށް ސަލާމަތްކޮށްފި

ކ. ތުލުސްދޫގައި ޕާކިސްތާނު ފަތުރުވެރިއަކު މޫދަށް އެރި އުޅެނިކޮށް، ގެނބިގެން ދަނިކޮށް ސަލާމަތް ކޮށްފި އެވެ.

ތުލުސްދޫ ކައުންސިލްގެ ރައީސް އަހުމަދު އަނީސް "ރާއްޖެއެމްވީ"އަށް ވިދާޅުވީ އެ ރަށުގައި ޗުއްޓީ ހޭދަކުރަމުންދިޔަ ޕާކިސްތާނު ދެމަފިރިންގެ ތެރެއިން އަންހެން މީހާ އޮޔާދަނިކޮށް، ސަލާމަތް ކުރަން މަސައްކަތް ކުރި ފިރިމީހާ ލޮނުބޮވިގެން ސިއްހީ މަރުކަޒުގައި ފަރުވާ ދެމުންދާ ކަމަށެވެ. އޭނާ ސިއްހީ މަރުކަޒަށް ގެނައީ މޫދުގައި "ތެޅެމުންދަނިކޮށް" އެ ސަރަހައްދުގައި އުޅުނު ބަޔަކު ކަމަށާއި އޭނާގެ ހާލު ސީރިއަސް ނޫން ކަމަށް އަނީސް ވިދާޅުވިއެވެ.

ފުލުހުން ބުނީ އޭނާގެ ހާލު ރަނގަޅުވަމުން އަންނަ ކަމަށެވެ.

ތުލުސްދޫ ކައުންސިލުން ބުނީ ޓޫރިސްޓުން ގެނބިގެން މަރުވާ މައްސަލާގައި ގެސްޓުހައުސްތައް މޮނީޓާ ކުރުމުގެ މަސައްކަތް އެ ރަށުގައި ފަށާފައިވާ ކަމަށާއި ފުލުހުންނާ ގުޅިގެން އެ ރަށުގެ ގިނަ ގެސްޓް ހައުސްތައް އާދީއްތަ ދުވަހު މޮނީޓާ ކޮށްފައިވާ ކަަމަށެވެ.

ތުލުސްދޫގައި ފަތުރުވެރިއަކު ގެނބެނިކޮށް ސަލާމަތްވެފައިވާއިރު، ހޮނިހުރު ޕެރަޑައިސް އައިލެންޑް ރިސޯޓުގައި ފަތުރުވެރިއަކު މޫދުގައި މަރުވެފައި އޮއްވާ ވަނީ ފެނިފައެވެ. އަދި މި މަހު 16 ވަނަ ދުވަހު ވެސް އެ ރިސޯޓުގައި ޓުއަރިސްޓަކު މޫދަށް އެރި އުޅެނިކޮށް ގެނބިގެން ވަނީ މަރުވެފައެވެ. މީގެ އިތުރުން ކ. ދިއްފުށީ ހަނީމޫން ހޭދަ ކުރަމުންދިޔަ ފިލިޕީންސްގެ ޒުވާން ދެމަފިރިއަކު ވެސް މި މަހުގެ 13 ވަނަ ދުވަހު ވަނީ ގެނބިގެން މަރުވެފައެވެ.