ފްރެންޗް ލީގް: ގުއިންގޭމްޕް ކޮޅަށް ނުވަ ލަނޑު ޖަހާ ޕީއެސްޖީން ބަދަލު ހިފައިފި

ފްރެންޗް ލީގުގައި ގުއިންގޭމްޕް ކޮޅަށް ނުވަ ލަނޑު ޖަހާ ޕެރިސް ސެއިންޓް ޖާމަން (ޕީއެސްޖީ) އިން ބަދަލު ހިފައިފިއެވެ.

މި މަހުގެ ނުވަ ވަނަ ދުވަހު ގުއިންގޭމްޕުން ވަނީ ހައިރާންކުރެވިނިވި ގޮތަކަށް ފްރެންޗް ކަޕުން ޕީއެސްޖީ ކަޓުވާލާފައެވެ. ނަމަވެސް އޭގެ ބަދަލު ހިފާ ފްރެންޗް ލީގުގައި ހޮނިހިރު ދުވަހުގެ ރޭ ކުޅުނު މެޗުގައި ޕީއެސްޖީ ވަނީ ގުއިންގޭމްޕްގެ މައްޗަށް 0-9 ގެ ތަފާތުބޮޑު ނަތީޖާއަކުން ކުރިހޯދާފައެވެ.

ޕީއެސްޖީ ދަނޑުގައި ކުޅުނު މި މެޗު ފެށިގެން 11 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ނޭމާއެވެ. އެޓީމުން ލީޑު ފުޅާކުރީ 37 ވަނަ މިނެޓުގައި ކާމިޔާބުކުރީ ކީލިއަން އެމްބަޕޭއެވެ.

ފުރަތަމަ ހާފް ނިމުމުގެ ކުރިން ޕީއެސްޖީން ވަނީ ތިންވަނަ ލަނޑު ކާމިޔާބުކޮށްފައެވެ. މި ލަނޑު ކާމިޔާބުކުރީވެސް ނޭމާއެވެ.

މި ލަނޑުތަކާއެކު ފުރަތަމަ ހާފް ނިމުނީ 0-3 ގެ ނަތީޖާއިން ގުއިންގޭމްޕްގެ މައްޗަށް ޕީއެސްޖީ ކުރީގައި އޮވެގެންނެވެ.

ދެވަނަ ހާފް ފެށިގެން ޕީއެސްޖީގެ ހަތަރުވަނަ ލަނޑު ކާމިޔާބުކުރީ ކަވާނީއެވެ. ފަސްވަނަ ލަނޑުވެސް ކަވާނީ ކާމިޔާބުކުރިއިރު، ހަވަނަ ލަނޑު ކާމިޔާބުކުރީ ނޭމާއެވެ.

ޕީއެސްޖީގެ ހަތްވަނަ ލަނޑު 75 ވަނަ މިނެޓުގައި ކާމިޔާބުކޮށް ކަވާނީ އޭނާގެ ހެޓްރިކް ފުރިހަމަކުރިއިރު، 80 ވަނަ މިނެޓުގައި އެމްބަޕޭ ވަނީ ލަނޑެއް ޖަހާ އޭނާގެ ހެޓްރިކް ފުރިހަމަކޮށްފައެވެ. އެޓީމުގެ ނުވަ ވަނަ ލަނޑު 83 ވަނަ މިނެޓުގައި ކާމިޔާބުކުރީ މުނިއޭއެވެ.

މި ނަތީޖާއާއެކު ޕީއެސްޖީ އޮތީ ކުޅުނު 19 މެޗުން ލިބުނު 53 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ގުއިންގޭމްޕް އޮތީ ކުޅުނު 21 މެޗުން ލިބުނު 14 ޕޮއިންޓާއެކު ޕޮއިންޓް ތާވަލުގެ ފުލުގައެވެ.