ސަރުކާރުގެ ވައުދުތައް ފުއްދުމަށް ސަރުކާރުގެ މެޖޯރިޓީ އޮތް މަޖިލީހެއް އޮތުމަކީ މުހިއްމު ކަމެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީގެ ޕްރައިމަރީގައި ހިންނަވަރު ދާއިރާއަށް ވޯޓުލެއްވުމަށް ފަހު، ރާއްޖެއެމްވީ އިން ކުރި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ މި ސަރުކާރުން ވެފައިވާ ވައުދުތައް ފުއްދުމަށް އެންމެ މުހިއްމީ މަޖިލީހުގެ މެޖޯރިޓީ ކަމަށެވެ.
''އަޅުގަނޑު ބޭނުންވާ ކަމަކީ ސަރުކާރަށް ތާއިދު އޮތުން. އަޅުގަނޑުމެންގެ ވައުދުތައް ފުރިހަމަ ކުރުމަށްޓަކައި އެއްބާރުލާ، މެޖޯރިޓީ އޮތް ރައްޔިތުންގެ މަޖިލީހެއް.'' ސަރުކާރުގެ މެޖޯރިޓީގެ މުހިއްމުކަން ބަޔާންކުރައްވަމުން ރައީސް ސޯލިހު ވިދާޅުވިއެވެ.
ޕްރައިމަރީއަށް ފަހު އެންމެ މުހިއްމު ކަމަކަށް އޮންނާނީ، އޭޕްރީލް މަހު ބާއްވާ މަޖިލިސް އިންތިހާބު ކާމިޔާބު ކުރުމާ ބެހޭ ގޮތުން ގުޅިފައިވާ ޕާޓީތަކުގެ ލީޑަރުންގެ މެދުގައި މަޝްވަރާ ކުރުން ކަމަށް ރައީސް ސޯލިހު ވިދާޅުވިއެވެ.
ކޯލިޝަނަކުން އުފެދިގެން އައި ސަރުކާރުގައި ހިމެނޭ ޕާޓީތަކުގެ ތެރޭގައި، ޖުމްހޫރީ ޕާޓީ، އަދާލަތު ޕާޓީގެ އިތުރުން ރައީސް މައުމޫންގެ އެމްއާރްއެމް ވެސް ހިމެނެއެވެ.
''އަޅުގަނޑުމެން އިސް ޕާޓީތަކުގެ ލީޑަރުންގެ ދައުރަކަށް ވާން ވާނީ ޕްރައިމަރީ ނިމުމާ އެކީގައި އެއްތަންކޮށް ކުރިއަށް އޮތް އިންތިހާބު ކާމިޔާބު ކުރުމަށް ކުރަންޖެހޭ ކަންތައްތައް ކުރުން،'' ރައީސް ސޯލިހު ވިދާޅުވިއެވެ.
މީގެ އިތުރުން ރައީސް ސޯލިހު ވިދާޅުވީ، އެމްޑީޕީގެ ޕްރައިމަރީ އިންތިހާބަކީ ރާއްޖޭގެ ޑިމޮކްރެސީއަށް މުހިއްމު ހަރަކާތެއް ކަމަށާއި، ކުރިއަށް އޮތް މަޖިލިސް އިންތިހާބުގައި އެކަން ފެނިގެންދާނެ ކަމަށް ރައީސް ވިދާޅުވިއެވެ.
