ޔުނައިޓެޑުން ފެލައިނީ ވިއްކާލަނީ!
ފެލައިނީ ހޯދަން ގިނަ ކްލަބްތަކުން އަންނަނީ މަސައްކަތް ކުރަމުން
ޔުނައިޓެޑަށް ކުޅެމުން އަންނަ ފެލައިނީ
މެންޗެސްޓާ ޔުނައިޓެޑުން އެ ކްލަބަށް ކުޅެމުން އަންނަ ބެލްޖިއަމްގެ މިޑްފިލްޑަރު ފެލައިނީ ވިއްކާލަން އުޅޭ ކަމަށް ރިޕޯޓްތައް ބުނެފިއެވެ. ޑެއިލީ މެއިލްއިން ބުނީ، ފެލައިނީއަށް ގިނަ ކްލަބްތަކުން ޝައުގުވެރިވާ ކަމަށާއި، އޭނާ ވިއްކާލަން ޔުނައިޓެޑުން ނިންމާފައިވާ ކަމަށެވެ.
ޔުނައިޓެޑުގެ ކުރީގެ ކޯޗު ހޯޒޭ މޮރީނިއޯގެ އެ ކްލަބަށް ކޯޗުކަންކޮށްދިން އިރު ފެލައިނީއަށް ކުޅެން ގިނަ ވަގުތު ލިބުނު ނަމަވެސް އާ ކޯޗު އޮލް ގަނާ ސޮލްޝާގެ އިރުޝާދުގެ ދަށުން އޭނާއަށް ކުޅެން ފުރުސަތެއް ނުލިބެއެވެ.
އެގޮތުން ފެލައިނީވެސް ބޭނުންވަނީ ޔުނައިޓެޑު ދޫކޮށް، ގިނަ ވަގުތު އޭނާއަށް ކުޅެން ލިބޭފަދަ ކްލަބަކަށް ބަދަލުވާން ކަމަށްވެސް ރިޕޯޓްތައް ބުނެއެވެ.
ފެލައިނީއަށް މިހާތަނަށް ޝައުގުވެރިކަން ފާޅުކޮށްފައިވަނީ އޭސީ މިލާން އާއި ޕޯޓޯގެ އިތުރުން ޗައިނާ އާއި ތުރުކީގެ ކްލަބްތަކުންނެވެ. އަދި ޖެނުއަރީ ޓްރާންސްފާގައި އޭނާ ކްލަބް ބަދަލުކުރާނެ ކަމަށް ވަނީ ބެލެވިފައެވެ.
އެވަޓަން ދޫކޮށްލުމަށް ފަހު ފެލައިނީ ޔުނައިޓެޑަށް ބަދަލުވެފައި ވަނީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 177 މެޗުގައި 22 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެ ކްލަބާއެކު އެފްއޭކަޕާއި، ލީގް ކަޕާއި،ޔޫރޮޕާ ލީގުގެ އިތުރުން އެފްއޭ ކޮމިއުނިޓީ ޝިލްޑް ވެސް ކާމިޔާބުކޮށްފައެވެ.
ބެލްޖިއަމް ގައުމީ ޓީމުން ވެސް ބަރާބަރަށް ޖާގަ ހޯދަމުން އަންނަ ފެލައިނީ ވަނީ އެޓީމަށް ކުޅުނު 87 މެޗުގައި 18 ލަނޑު ކާމިޔާބުކޮށްފައެވެ. އޭނާ ވަނީ ބެލްޖިއަމްގެ "އެބޮނީ ޝޫ" 2008 ވަނަ އަހަރު ހާސިލްކޮށްފައެވެ.
