މަސްތުވާތަކެތީގެ ވަބާގައި ޖެހިފައި ތިބި ޒުވާނުންނަށް ދެވަނަ ފުރުސަތެއް ދޭންޖެހޭ: ނަޝީދު

މަސްތުވާތަކެތީގެ ވަބާގައި ޖެހިފައިތިބި ޒުވާނުންނަށް ދެވަނަ ފުރުސަތެއް ދޭންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މައްޗަންގޮޅީ ދެކުނު ދާއިރާއަށް އެމްޑީޕީ ޕްރައިމަރީގައި ވާދަކުރައްވާ އަހްމަދު ހައިތަމްގެ ކެމްޕޭނު ލޯންޗު ކުރުމުގެ ހަފްލާގައި ވާހަކަފުޅުދައްކަވަމުން ނަޝީދު ވިދާޅުވީ، މަސްތުވާތަކެތީ ބޭނުންކުރާ މީހުންނަށް ދެމުން ދިޔަ ފަރުވާ ޕްރޮގްރާމް ''މެތަޑޯން'' ހުއްޓާލަން ޖެހުނީކޮން ސަބަބަކާއި ހުރެގެންތޯ އެގިވަޑައިގެންފައި ނުވާކަމަށެވެ. މަސްތުވާތަކެތީގެ ވަބާގައި ގިނަ ޒުވާނުން ޖެހި ރަނގަޅު މަގުން ކައްސާލައިގެން ދަނީ އާއިލާގެ އިތުރުން ސަރުކާރުންވެސް އެމީހުންނަށް އެހީތެރިކަން ފޯރުކޮށް ނުދެވޭތިކަމަށް، ކަންބޮޑުވުމާއެކު ނަޝީދު ވިދާޅުވިއެވެ.

އެހެންކަމުން އެ ވަބާގައި ޖެހިފައި ތިބި މީހުންނަށް ދެވަނަ ފުރުސަތެއް ދޭންޖެހޭކަމަށް ނަޝީދު ވިދާޅުވިއެވެ. އަލަށް އިންތިހާބުވާ 19 މަޖިލީސްވެގެން ދާނީ މަސްތުވާތަކެއްޗަށް ދެވިހިފާފައި ތިބި ފަރާތްތަކަށް ދެވަނަ ފުރުސަތެއް ދީ އެމީހުންނަކީ ވެސް މުޖުތަމައުގައި މުހިއްމު ބަޔަކަށް ހަދަން މަސައްކަތް ކުރާ މަޖިލީހެއް ކަމަށް އެމަނިކުފާނު ވިދާޅުވިއެވެ.

''މާލޭގައި އަދިވެސް ވަރަށް ގިނަ ޒުވާނުންނަކީ ބާރުގަދަ ޑްރަގްގެ ޝިކާރައަކަށްވެ ގޮސްފައިވާ ޒުވާނުން. އެ ޒުވާނުންނަށް އަލުން އަނބުރާ ދެވަނަ ފުރުސަތެއް ހޯދައިދިނުމަކީ އަޅުގަނޑުމުންގެ ވާޖިބެއް. އަޅުގަނޑުމެން ކޮށްދޭންޖެހޭ މަސައްކަތެއް'' ނަޝީދު ވިދާޅުވިއެވެ.

މާލެގައި ފެންބޮޑުވާ މައްސަލައަށް އަލިއަޅުވާލަމުން ނަޝީދު ވިދާޅުވި، އެކަމަށް ދާއިމީ ހައްލެއް ލިބެންޖެހޭ ކަމަށެވެ. ވެހޭ ފެން އުކާލުމުގެ ބަދަލުގައި ފެން ރައްކާތެރި ކުރެވޭ ނިޒާމެއް ހަމަޖެހިގެން ދިއުމަކީ އެމްޑީޕީގެ ވައުދެއް ކަމަށް އެމަނިކުފާނު ވިދާޅުވިއެވެ.

''މާލޭގައި ފެންބޮޑު މި ވަނީ އެ ފެން ހިންދޭނެ ތަންތަން މާލެގައި މިހާރު ނެތުމުން މާލެއަށް ވެހޭ ފެން ރައްކާކުރެވޭނެ ގޮތްތަކެއް މާލޭގައި އުފެއްދުމަކީ އެމްޑިޕީގެ މަސައްކަތެއް މި ޕާޓިީގެ އަމާޒެއް.'' ނަޝީދު ވިދާޅުވިއެވެ.

ކުރިއަށް އޮތް ރައްޔިތުންގެ މަޖިލީހަށް ކުރިމަތި ލައްވާފައިވާ ނަޝީދު ވިދާޅުވީ، 19 މަޖިލީހުގައި ބޯހިޔާވަހިކަން ހޯދުމަށް ދިވެހިން ތަހައްމަލު ކުރަމުންދާ އުދަގޫތަކަށް ހައްލެއް ގެނައުމަށް މަސައްކަތް ކުރައްވާނެ ކަމަށެވެ. އެވާހަކަ އަށް އިތުރަށް ބާރުދެއްވަމުން ނަޝީދު ވިދާޅުވީ މި ސަރުކާރުގެ ފަސް އަހަރުގެ ތެރޭގައި ކޮންމެ ރައްޔިތަކަށް ވެސް ގޯއްޗެއް ނުވަތަ ފްލެޓެއް ހޯދައިދޭނެ އެމަނިކުފާނު މަސައްކަތްކުރައްވާނެ ކަމަށެވެ.

ކުރިޔަށް އޮށް 19 މަޖިލީސް ވެގެންދާނީ އެމްޑީޕީގެ މަޖިލީހަކަށް ކަމަށާއި، އެ މަޖިލީހުގެ މެމްބަރުންނަށް ރައްޔިތުންނަށް ހިޔާނަތްތެރިވުމުގެ ފުރުސަތު ނުދެއްވާނެ ކަމަށް އެމަނިކުފާނު ވިދާޅުވިއެވެ. އަދި އެ މަޖިލީހުގައި އެމަނިކުފާނުވެސް ހުންނަވާނެ ކަމުގެ ޔަގީންކަން ނަޝީދު ވަނީ ރައްޔިތުންނަށް ދީފައެވެ.