ބާސެލޯނާގައި މަޑުކުރަން ބޭނުންވާ ކަމަށް އެ ކްލަބަށް ކުޅެމުން އަންނަ ސްޕެއިންގެ ލެފްޓް ބެކް ޖޯޑީ އަލްބާ ބުނެފިއެވެ.

ދުނިޔޭގެ ނަން މަޝްހޫރު ގިނަ ކްލަބްތަކުން އަލްބާ ހޯދުމަށް މަސައްކަތް ކުރަމުން އަންނަ ދަނޑިވަޅެއްގައި އޭނާ ބުނީ، އެއްބަސްވުމުގައި ބާކީ އެއް އަހަރު އެބައޮތް ކަމަށާއި، ކްލަބުން އޭނާއާ މެދު އަމަލުކުރާނެ ގޮތެއް އަދި ނޭނގޭ ކަމަށެވެ.

ނަމަވެސް އަލްބާ ބުނީ، އޭނާ ބޭނުން ވަނީ ކްލަބުގައި މަޑުކުރަން ކަމަށާއި، އެއްބަސްވުން ވެސް އާކުރަން ބޭނުންވާ ކަމަށެވެ. އެގޮތުން ބާސާއިން އެކަމަށް މަސައްކަތް ކުރާނެ ކަމަށް އުންމީދުކުރާ ކަމަށް ވެސް އޭނާ ވަނީ ބުނެފައެވެ.

ރިޕޯޓްތައް ބުނާ ގޮތުން ބާސާއިން އަލްބާގެ އެއްބަސްވުން އާކުރަން މަޝްވަރާކުރަމުން އައި ނަމަވެސް އާ އެއްބަސްވުމާ މެދު އޭނާ ހިތްހަމައެއް ނުޖެހެއެވެ. އެގޮތުން ޖެނުއަރީ ޓްރާންސްފާގައި އަލްބާ ބާސާ ދޫކޮށްލާނެ ކަމަށް ވެސް ބައެއް ރިޕޯޓްތައް އަންނަނީ ބުނަމުންނެވެ.

ސްޕެއިންގެ ވެލެންސިއާ އިން ވިދާލި އަލްބާ ވަނީ އެ ޓީމަށް ކުޅުނު 110 މެޗުގައި ހަ ލަނޑު ކާމިޔާބުކޮށްފައެވެ. އޭނާ ވެލެންސިއާގައި ތިން ސީޒަން ހޭދަކުރުމަށް ފަހު ބާސާއަށް ބަދަލުވީ 2012 ވަނަ އަހަރުގެ ސީޒަނުގައެވެ.

އަލްބާ ވަނީ ބާސާއަށް މިހާތަނަށް ކުޅުނު 271 މެޗުގައި 14 ލަނޑު ކާމިޔާބުކޮށް، އެޓީމާއެކު ހަތަރު ލީގު ތަށި، ހަތަރު ކޮޕާޑެލްރޭ، ތިން ސްޕެނިޝް ސުޕާކަޕް، އެއް ޔުއެފާ ޗެމްޕިއަންސް ލީގު އަދި އެއް ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.

ސްޕެއިން ގައުމީ ޓީމަށް ކުޅުނު 67 މެޗުގައި 8 ލަނޑު ކާމިޔާބުކޮށްފައިވާ އަލްބާ ވަނީ 2012 ވަނަ އަހަރު އެޓީމާއެކު ކާމިޔާބުކުރުމުގެ އިތުރުން 2013 ވަނަ އަހަރު ފީފާ ކޮންފެޑެރޭޝަންސް ކަޕްގެ ދެވަނަ ވެސް ހޯދާފައެވެ.