މަޓީގެ އަހަރީ އާންމު ޖަލްސާ މި މަހުގެ 21 ގައި

މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ އަހަރީ އާންމު ޖަލްސާ މި މަހުގެ 21 ވަނަ ދުވަހު ބާއްވަން ނިންމައިފިއެވެ.

މަޓީން ބުނީ އަހަރީ އާންމު ޖަލްސާ ބޭއްވުމަށް ހަމަޖެހިފައިވަނީ އެ ދުވަހުގެ ހެނދުނު 10 ޖަހާއިރު ކުރުނބާ މޯލްޑިވްސް ރިސޯޓުގައި ކަމަށެވެ.

މިދިޔަ އަހަރު މަޓީ އިން ބޭއްވި އަހަރީ އާންމު ޖަލްސާގެ ތެރެއިން ވަނީ މަޓީގެ ބޯޑު އެކުލަވާލާފައެވެ. އެ އެސޯސިއޭޝަންގެ ޗެއާމަނަކަށް ހަމަޖައްސާފައިވަނީ ޔުނިވާސަލްގެ ޗެއާމަން މުހަންމަދު އުމަރު މަނިކެވެ. ވައިސް ޗެއާމަންގެ ގޮތުގައި ހަމަޖައްސާފައިވަނީ އެ ބޯޑުގައި ހިމެނިވަޑައިގަންނަވާ ވޮޔެޖަސް މޯލްޑިވްސްގެ ޑިރެކްޓަރު ސޮލާހު ޝިހާބެވެ. އަލަށް އެ ބޯޑަށް އައްޔަންކުރެއްވީ ސަން ޓްރެވަލްގެ ފަރާތުން ޒުލޭހާ މަނިކާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މެނޭޖިން ޑިރެކްޓަރު އާދިލް މޫސާއެވެ.

މަޓީ އުފައްދާފައިވަނީ 1982 ވަނަ އަހަރު އުފައްދާފައިވާ އެ އެސޯސިއޭޝަންގެ މައިގަނޑު މަގްސަދަކީ ރާއްޖޭގެ ފަތުރުވެރިކަން ޕްރޮމޯޓް ކުރުމެވެ.