ޗެލްސީއަށް ކުޅެމުން އައި ސްޕެއިންގެ މިޑްފިލްޑަރު ސެސް ފެބްރިގާސް މޮނާކޯއަށް ބަދަލުވެއްޖެއެވެ.
އުމުރުން 31 އަހަރުގެ ފެބްރިގާސް މޮނާކޯއަށް ބަދަލުވީ ތިން އަހަރާއި ބައިގެ އެއްބަސްވުމުގެ ދަށުންނެވެ.
މޮނާކޯއަށް ބަދަލުވުމަށްފަހު ފެބްރިގާސް ބުނީ، މިއީ އޭނާގެ ކެރިޔަރުގައި މުޅިން އާ ޕްރޮޖެކްޓެއް ކަމަށާއި، ކްލަބަށް ކުރިއެރުން ހޯދައިދިނުމަށް ކެތްމަދުވެފައި ހުރި ކަމަށެވެ.
މޮނާކޯގެ ކޯޗު ތިއެރީ އޮންރީ އަކީ އާސެނަލްގައި ފެބްރިގާސްއާއެކު ކުޅެފައިވާ ކުޅުންތެރިޔެކެވެ. ފެބްރިގާސް އާއި އޮންރީ ވަނީ އާސެނަލްގައި ގިނަ ކާމިޔާބީތަކެއް ހޯދާފައެވެ.
AS Monaco are thrilled to announce the arrival of Cesc Fabregas from Chelsea FC on a deal that runs until June . pic.twitter.com/hjy1xfn3mU
— AS Monaco EN (@AS_Monaco_EN) January 11, 2019
ފްރެންޗް ލީގުގެ ޕޮއިންޓް ތާވަލަށް ބަލާއިރު، މޮނާކޯ އޮތީ ކުޅުނު 18 މެޗުން ލިބުނު 13 ޕޮއިންޓާއެކ ޕޮއިންޓް ތާވަލުގެ 19 ވަނައިގައެވެ. އެޓީމު މިހާރު އޮތީ ރެލިގޭޓްވުމާ ގާތުގައެވެ.
ލީގުގައި މޮނާކޯ ދެން އެންމެ އަވަހަށް ކުޅޭ މެޗުގައި އާދީއްތަ ދުވަހުގެ ރޭ ނިކުންނާނީ ރަށުން ބޭރުގައި މާސޭއާ ދެކޮޅަށެވެ. މި މެޗުގައި ފެބްރިގާސްވެސް ފެނިގެންދާނެއެވެ.
އާސެނަލް އިން 2003 ވަނަ އަހަރު ކެރިއަރު ފެށި އުމުރުން 29 އަހަރުގެ ފެބްރިގާސް ވަނީ އާސެނަލްއާ އެކު އޭނާ ހޭދަކުރި އަށް ސީޒަނުގައި އެޓީމަށް ކުޅުނު 303 މެޗުގައި 57 ލަނޑު ކާމިޔާބު ކޮށްފައެވެ.
އާސެނަލް ދޫކޮށްލުމަށް ފަހު 2011 ވަނަ އަހަރު ފެބްރިގާސް ވަނީ ބާސާއަށް ބަދަލުވެފައެވެ. އެގޮތުން އޭނާ ވަނީ އެ ޓީމާ އެކު ހޭދަކުރި ތިން ސީޒަނުގައި މޮޅު ކުޅުމެއް ދައްކައި ގިނަ ކާމިޔާބީތަކެއް ވެސް އެޓީމާ އެކު ހޯދާފައެވެ.
Thanks for the memories, @cesc4official. pic.twitter.com/6nyZ4Ba6id
— Chelsea FC (@ChelseaFC) January 11, 2019
ބާސާއާއެކު ލަލީގާ، ކޮޕާޑެލްރޭ، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ކްލަބް ވޯލްޑްކަޕް ކާމިޔާބުކުރި ފެބްރިގާސް ޗެލްސީއަށް ބަދަލުވީ 2014 ވަނަ އަހަރުއެވެ.
ފެބްރިގާސް ވަނީ ޗެލްސީއަށް މިހާތަނަށް ކުޅުނު198 މެޗުގައި 22 ލަނޑު ކާމިޔާބު ކޮށްފައެވެ. އޭނާ ވަނީ އެޓީމާއެކު ޕްރިމިއާ ލީގު ދެ ފަހަރު، އެފްއޭ ކަޕް އެއްފަހަރު އަދި ލީގް ކަޕް އެއްފަހަރު ކާމިޔާބުކޮށްފައެވެ.
ސްޕެއިން ގައުމީ ޓީމާއެކު ވޯލްޑްކަޕް ކާމިޔާބު ކުރި ފެބްރިގާސް ވަނީ އެ ގައުމަށް ދެ ފަހަރު ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްދިނުމަށް މުހިންމު ދައުރެއް އަދާކޮށްފައެވެ.
