ޕްރިމިއާ ލީގުގައި ސެސް ފެބްރިގާސް ކާމިޔާބުކޮށްދިން ލަނޑުން ވަޓްފޯޑް އަތުން ޗެލްސީ ސަލާމަތްވެއްޖެ އެވެ.
ހޯމަ ދުވަހުގެ ރޭ ކުޅުނު މެޗުން ޗެލްސީ މޮޅުވީ 3-4 ގެ ނަތީޖާއަކުންނެވެ.
ޗެލްސީ ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެފައިވަނީ އެޓީމުންނެވެ. އެގޮތުން މެޗުގައި ފުރަތަމަ ލަނޑު ޖަހާ ލީޑު ނެގީވެސް އެޓީމުންނެވެ. މި ލަނޑު 22 ވަނަ މިނެޓުގައި އެޓީމަށް ކާމިޔާބުކޮށްދިނީ ކެޕްޓަން ޖޯން ޓެރީ އެވެ. މި ލަނޑަކީ މިދިޔަ އަހަރުގެ ޖެނުއަރީ މަހަށް ފަހު ޕްރިމިއާ ލީގުގައި ޓެރީ ކާމިޔާބުކުރި ފުރަތަމަ ލަނޑެވެ.
485 - John Terry scored his first Premier League goal since Jan 16th 2016, 485 days ago. Celebration.
— OptaJoe (@OptaJoe) May 15, 2017
އެހެންނަމަވެސް އޭގެ ދެ މިނެޓު ފަހުން ވަޓްފޯޑް އިން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކެޕޯ އެވެ. މި ލަނޑާއެކު ވަޓްފޯޑް ވަނީ މެޗުގެ ތެރެއަށް ވަދެ ޗެލްސީގެ ހާފަށް ބާރުބޮޑުކޮށްފައެވެ.
އެގޮތުން ވަޓްފޯޑް އިން ޗެލްސީގެ ގޯލަށް ނުރައްކާކޮށްފައިވާއިރު، ލަނޑު ޖަހަން ރަނގަޅު ފުރުސަތުތައްވެސް އެޓީމުން ތަނަވަސްކުރި އެވެ. ވަޓްފޯޑް އިން ރަނގަޅަށް ކުޅެމުން ދިޔަ ދަނޑިވަޅެއްގައި ޗެލްސީގެ އަޒްޕިލިކުއެޓާ ވަނީ 36 ވަނަ މިނެޓުގައި އެޓީމަށް އަނބުރާ ލީޑު ނަގައިދީފައެވެ.
މި ލަނޑުތަކާއެކު ފުރަތަމަ ހާފް ނިމުނީ 1-2 ގެ ނަތީޖާ އިން ވަޓްފޯޑްގެ މައްޗަށް ޗެލްސީ ކުރީގައި އޮވެގެންނެވެ.
ދެވަނަ ހާފް ފެށިގެން މާގިނައިރުތަކެއް ނުވަނީސް ޗެލްސީން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބަޓްޝުއޭ އެވެ. ބަޓްޝުއޭ ވަނީ ޕްރިމިއާ ލީގުގައި އޮން ޓާގެޓަށް އުފެއްދި ހަތަރު ހަމަލާއިން ތިން ލަނޑު ކާމިޔާބުކޮށްފައެވެ. އެހެންނަމަވެސް އޭގެ ދެ މިނެޓު ފަހުން ވަޓްފޯޑްގެ ޖަމްނާޓް ވަނީ އެޓީމަށް ނަތީޖާގެ ފަރަގު ކުޑަކޮށްދީފައެވެ.
3 - Michy Batshuayi has scored three goals from just four shots on target in the Premier League this season. Clinical.
— OptaJoe (@OptaJoe) May 15, 2017
ވަޓްފޯޑް އިން ވަނީ 74 ވަނަ މިނެޓުގައި ދެވަނަ ފަހަރަށް މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އޮކަކާ އެވެ. މި ލަނޑާއެކު މެޗު ނިމެން ދަނިކޮށް ސެސް ފެބްރިގާސް ވަނީ ލަނޑެއް ކާމިޔާބުކޮށް މެޗުން ޗެލްސީ މޮޅުކޮށްދީފައެވެ.
މި ނަތީޖާއާއެކު ޗެލްސީ އޮތީ ކުޅުނު 37 މެޗުން ލިބުނު 90 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި ވަޓްފޯޑް އޮތީ ކުޅުނު 37 މެޗުން ލިބުނު 40 ޕޮއިންޓާއެކު ޕޮއިންޓް ތާވަލުގެ 16 ވަނައިގަ އެވެ.
