މުންނާބާއި 3 މި އަހަރު ރިލީޒް ކުރަނީ

"މުންނާ ބާއީ 3" މިއަހަރު ތެރޭގައި ރިލީޒް ކުރާނެ ކަމަށް ބޮލީވުޑްގެ ތަރި އަދި "މުންނާ ބާއީ" ސީރީސްގެ ފިލްމްތަކުން ފެނިފައި ވަނީ އަރްޝަދް ވަރްސީ ބުނެފިއެވެ.

ރާޖް ކުމާރު ހިރާނީ ޑައިރެކްޓް ކުރާ މި ސީރީޒް ގައި ކުރިން ފެނިގެން ގޮސްފައިވަނީ ސަންޖޭދަތް އާއި އަރްޝްދްއެވެ.

ޕީޓީއައި އަށް ދިން އިންޓަވިއު އެއްގައި އަރްޝަދް ބުނެފައި ވަނީ މި ފިލްމްގެ ސްކްރިޕްޓް މިހާރު ތައްޔާރު ކުރަމުންދާ ކަމަށާއި މިއަހަރުގެ މެދުތެރޭގައި ނުވަތަ މިއަހަރުގެ ފަހުކޮޅު ފިލްމް ރިލީޒް ކުރާނެ ކަމަށެވެ.

މި ފިލްމްގައި ވެސް އޭނާ އާއި ސަންޖޭދަތު ފެނިގެންދާނެ ކަމަށް އަރަޝަދް ވަނީ ބުނެފައެވެ.

މީގެ އިތުރުން އަރްޝަދް ބުނެފައި ވަނީ "ގޯލްމާލް" ސީރީސްގެ ފަސްވަނަ ފިލްމް ވެސް މިއަހަރު ތެރޭގައި ރިލީޒް ކުރާނެ ކަމަށެވެ.

ގޯލްމާލް ސީރީސްގެ ޑައިރެކްޓަރ ރޯހިތު ޝެޓީގެ ފިލްމް "ސިމްބާ" ވަނީ ދާދި ފަހުން ރިލީޒް ކޮށްފައެވެ. މި ފިލްމްގެ ޚާއްސަ ލަވައަކުން ގޯލްމާލް ޓީމްގެ ތަރިން ވަނީ ފެނިގެން ގޮސްފައެވެ. މި ލަވައިގައި ގޯލްމާލްގެ އިތުރު ފިލްމެއް ހަދަން އުޅޭ ކަމުގެ އިޝާރާތެއް ވަނީ ދީފައެވެ.