ގައުމީ އެމްބިއުލާންސްގެ ހިދުމަތް ވަރަށް އަވަހަށް ތައާރަފް ކުރާން ނިންމާފައިވާ ކަމަށް ހެލްތް މިނިސްޓަރު ޢަބްދުﷲ އަމީން ވިދާޅުވެއްޖެއެވެ.
ހެލްތް މިނިސްޓްރީން އިންތިޒާމް ކޮށްގެން ޓެކްސީ ޑްރައިވަރުންނަށް އަމާޒުކޮށް ކުރިޔަށް ގެންދަން ހަމަޖެހިފައިވާ ފަސްޓް އެއިޑް ޕްރޮގްރާމް އިފްތިތާހުކުރުމަށް އަންގާރަ ދުވަހު ބޭއްވި ޖަލްސާގައި ވާހަކަ ދައްކަވަމުން އަމީން ވިދާޅުވީ، މި ސަރުކާރުގެ ސިޔާސަތަކީ ސިއްހީ ހިދުމަށް ތަރައްގީކޮށް އެ ހިދުމަތަށް އިތުރު ބަދަލުތަކެއް ގެނައުން ކަމަށެވެ. އެގޮތުން އެމްބިއުލާންސްގެ ހިދުމަތް އިތުރަށް ތަރައްގީ ކުރުމުގެ ގޮތުން ގައުމީ ސީ އެމްބިއުލާންސް ސާރވީސް ތައާރަފް ކުރަން ހަމަޖެހިފައިވާ ކަމަށް އަމީން ވިދާޅުވި އެވެ. އަދި އެ ހިދުމަތުގައި އުޅޭ ފަރާތްތަކަށް މަތީ ފެންވަރުގެ ތަމްރީނު ދެވޭނޭ ކަމަށް ވެސް މިނިސްޓަރު ވިދާޅުވިއެވެ.
''ހާއްސަކޮށް މާލޭ ސަރަހައްދުގައި ރާއްޖޭގެ އާބާދީ ބޮޑެތި ދިގު މަގުތައް ހުރި ސަރަހައްދުތަކަށްވެސް މިކަމަށް ވަރަށް ބޮޑު އިސްކަމެއް ދޭން ޖެހިފައި ވަނީ. ސަރުކާރުގެ ވިސްނުން މިހާރު މިހިރީ ގައުމީ އެމްބިއުލާންސް ހިދުމަތެއް ތައާރަފްކޮށް، އެ ހިދުމަތުގެ ތެރެއިން ސީ އެމްބިއުލާންސް ހިދުމަށް ފޯރު ކޮށްދިނުމަށް'' އަމީން ވިދާޅުވިއެވެ.
އެ ހިދުމަތުގެ ތެރެއަށް ކަނޑު މަގުން އަދި ވައިގެ މަގުން ދެވޭ ހިދުމަތް އިތުރުވެގެން ދާނެކަމަށް އޭނާ ވިދާޅުވިއެވެ. ޓެކްސީ ޑްރައިވަރުންނަށް ހާއްސަ ކޮށްގެން ހިންގާ ޕްރޮގްރާމްގެ ސަބަބުން ޓެކްސީ ޑްރައިވަރުންގެ ހިދުމަތުގެ ފެންވަރު އިތުރަށް ރަނގަޅުވެ، ޓެކްސީ ޑްރައިވަރުންގެ ފަރާތުން ލިބޭ އެހީތެރިކަމުގެ ސަބަބުން ސިއްހީ ހިދުމަތް ފޯރުކޮށްދޭ ނިޒާމަށް ލުއި ފަސޭހާކަމެއް އަންނާނެ ކަމަށް ގަބޫލުފުޅު ކުރައްވާ ކަމަށް އަމީން ވިދާޅުވިއެވެ.
ޓެކްސީ ޑްރައިވަރުންގެ އިތުރުން ފުލުހުންވެސް ބައިވެރިވި މި ރަސްމިއްޔާތުގެ ޝަރަފްވެރި މެހެމާނު އެކްޓިން ކޮމިޝަނަރު މުހައްމަދު ހަމީދު (އެމްސީ) ވިދާޅުވީ، މަގުމަތީގައި ހިނގާ އެކްސިޑެންޓް ތަކުގައި އަނިޔާވާ މީހުނަށް ފަރުވާދޭން ސިއްހީ މަރުކަޒު ނުވަތަ ހޮސްޕިޓަލަށް ގެންދަން ބައެއް ޓެކްސީ ޑްރައިވަރުން ފަސްޖެހޭކަން ފާހަގަ ވެފައިވާ ކަމާށެވެ.
''މަގުމަތީގައި އޮޕަރޭޓް ކުރާ ވެހިކަލްތައް ހާއްސަ ކޮށް ޓެކްސީ އޮޕަރޭޓް ކުރާ ކުރުމުގައި ހާނިކަވާ ފަރާތް ނުވަތަ އަނިޔާ ލިބޭ ފަރާތްތަކަށް ބައެއް ފަހަރު އިހްމާލުވެވިފައި ހުރޭ. ކޮންމެވެސް ސަބަބަކާއި ހުރެ ޓެކްސީ ދުއްވާ ފަރާތުން ނުވަތަ ވެހިކަލް އޮޕަރޭޓް ކުރާ ފަރާތްތަކުން ފަސްޖެހެމުން ދޭ އަނިޔާ ލިބިފައިވާ ފަރާތްތަށް ހޮސްޕިޓަލަށް ގެންދަން'' އެކްޓިން ކޮމިޝަނަރު ވިދާޅުވިއެވެ.
އަންގާރަ ދުވަހު މިފެށި ތަމްރީނު ޕްރޮގްރާމަކީ އެކަމަށްޓަކައި ޓެކްސް ޑްރައިވަރުންނަށް މުހިއްމު ޕްރޮގްރާމެއް ކަމަށް އެނާ ވިދާޅުވިއެވެ. އަދި މި ތަމްރީނު ޕްރޮގްރާމު ފުރިހަމަކުރުމާއި އެކު ފުލުހުންނާއި ޓެކްސީ ޑްރައިވަރުން ގުޅިގެން އެމެޖެންސީ ހާލަތްތަކުގައި ދިމާވާ ކަންތައްތަކަށް ބަދަލުތަކެއް އަންނާނެ ކަމަށް ގަބޫލުފުޅު ކުރައްވާ ކަމަށް ހަމީދު ވިދާޅުވިއެވެ.
ހަތް ގަޑި އިރަށް ކުރިޔަށް ގެންދާ ޓްރެއިނިން ޕްރޮގްރާމްގައި ފަސްޓް އެއިޑް ޓްރެއިނިންގެ އިތުރުން އެއް ގަޑިއިރު މަގުމަތީގެ ގަވާއިދު ތަކަށް ޓެކްސީ ޑްރައިވަރުން އަހުލުވެރި ކުރުވުންވެސް ހިމެނެއެވެ.
