ސިޔާސީ ކަންކަމާ ކުޅިވަރާ ގުޅުވުމުގެ އެއްވެސް ބޭނުމެއް ނެތް: ޤަތަރު

ސިޔާސީ ގޮތުން އުފެދިފައި އޮތް ނުތަނަވަސްކަން އެއް ފަރާތްކުރުމަށްފަހު، ޔުނައިޓެޑް އަރަބް އެމިރޭޓްސްގައި ބާއްވާ އޭއެފްސީ ކަޕް 2019ގައި ޤަތަރުން ބައިވެރިވެއްޖެއެވެ.

މަހެއްހާ ދުވަހަށް ކުރިޔަށްދާ މި މުބާރާތަށް ޤަތަރުގެ 25 ކުޅުންތެރިންނާއި، ކޯޗާއި، އޮފިޝަލުން ދަތުރުކުރި ޕްރައިވެޓް ޖެޓް ޔޫއޭއީގެ އަލް އައިންގައި ޖައްސާފައިވަނީ ހޮނިހިރު ދުވަހުއެވެ.

މި މުބާރާތް ކުރިޔަށް މިދަނީ ޤަތަރުން ޓެރެެރިޒަމަށް ވާގިވެރިވެރިވާކަމަށް ތުހުމަތުކޮށް 2017 ވަނަ އަހަރުގެ ޖޫން މަހުގެ 5 ވަނަ ދުވަހު ސައުދީ އަރަބިއްޔާ، ޔޫއޭއީ، މިސްރު އަދި ބަހުރެއިނުން ގަތަރާ ދެކޮޅަށް ފިޔަވަޅު އަޅާފައި އޮންނަތާ 20 މަސް ވެފައިވަނިކޮށެވެ. އެ ގައުމުތަކުގެ ތުހުމަތު ޤަތަރުން ދޮގުކުރެއެވެ.

ސިޔާސީ ނުތަނަވަސްކަން އެއްފަރާތް ކުރުމަށްފަހު ބުދަ ދުވަހު ކުޅޭ މެޗާއެކު ކުޅުންތެރިން ތިބީ މުބާރާތް ފެށުމަށް ތައްޔާރަށްކަމަށް ޤަތަރުގެ ފުޓްބޯޅަ އެސޯސިއޭޝަންގެ މީޑިއާ އޮފިސަރ އަލްޖަޒީރާގައި ބުނެފައިވެއެެވެ.

"އެމީހުންނަކީ އެތްލީޓުން، އެ މީހުން އެއުޅެނީ ފުޓްބޯޅަ ކުޅެން" ފޯނުން ދިން އިންޓަވިއުގައި ބުންޏެވެ. "ސިޔާސީ ކަންކަމާ ކުޅިވަރާ ގުޅުވުމުގެ އެއްވެސް ބޭނުމެއް ނެތް"

މި މުބާރާތުގައި ގަތަރު ހިމެނެނީ ވާދަވެރި ސައުދީ އަރަބިއާއާއި އެއް ގްރޫޕެއްގައެވެ. މި ދެ ގައުމުގެ އިތުރުން ގްރޫޕް އީގައި ދެން ހިމެނެނީ އުތުރު ކޮރެއާއާއި ލުބުނާނެވެ.

ސައުދީ އަރަބިއާއާއި ޤަތަރު ބައްދަލުކުރާ މެޗް އޮންނާނީ ޖެނުއަރީ މަހުގެ 17 ވަނަ ދުވަހު އަބޫދާބީގެ ޒައިދް ސްޕޯޓްސް ސްޓޭޑިއަމްގައެވެ.

މީގެ ކުރިން ބޭއްވި ނުވަ މުބާރާތުގައިވެސް ޤަތަރަށް ކުއާޓަރ ފައިނަލަށްވުރެ ދުރަށް ދަތުރުކުރެވިފައެއްނުވެއެވެ.