ޖުޑިޝަލް ކައުންސިލެއް އުފައްދަވައިފި
ކައުންސިލް ހިންގާ ގަވާއިދަށް މިއަދުވަނީ އަމަލުކުރަން ފަށާފައި
ދިވެހިރާއްޖޭގެ ސުޕްރީމް ކޯޓު
ޝަރީއަތްތައް ހިންގުމާ ބެހޭ އުސޫލުތަކާއި ސިޔާސަތުތައް ކަނޑައެޅުމަށް ސުޕްރީމް ކޯޓުން ޖުޑިޝަލް ކައުންސިލެއް އާދިއްތަދުވަހު އުފައްދައިފިއެވެ
އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ސޮއިކުރައްވައި، ނެރުއްވާފައިވާ އެ ގަރާރުގައިވާ ގޮތުން ޖުޑިޝަލް ކައުންސިލް އުފެއްދީ އަދުލު އިންސާފު ގާއިމުކުރުމުގެ ނިޒާމް ހަރުދަނާ ކުރުމުގެ ގޮތުން އެކުލަވާލަންޖެހޭ ސިޔާސަތުތައް އެކުލަވާލުމުގައި ފަނޑިޔާރުންގެ މެދުގައި ފުޅާ ދާއިރާއެއްގައި މަޝްވަރާ ކުރެވޭނެ ފޯރަމެއް އޮތުމަކީ ބޭނުންތެރި ކަމެއް ކަމަށް ފެންނާތީ ކަމަށެވެ
ކައުންސިލް އުފައްދާފައި ވަނީ ދިވެހިރާއްޖޭގެ ގާނޫނުއަސާސީ އާއި ގާނޫނުތަކުގެ ދަށުން އަދުލުއިންސާފް ގާއިމްކުރުމުގެ އެންމެ އިސްފަރާތުގެ ހައިސިއްޔަތުން ދިވެހިރާއްޖޭގެ ސްޕްރީމް ކޯޓަށް ލިބިގެންވާ ގާނޫނީ ބެލެނިވެރިކަމުގެ މައްޗަށް ބަލައި، ވިސްނުމަށް ފަހު ގާނޫނު އަސާސީގެ 7 ވަނަ މާއްދާ އާއި 141 ވަނަ މާއްދާގެ (ށ) އާއި 156 ވަނަ މާއްދާއަށް ރިއާޔަތްކޮށެވެ.
މައިގަނޑު ގޮތެއްގައި ކައުންސިލް އެކުލެވިގެންވަނީ އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރުންނާއި ހައި ކޯޓުގެ އިސް ފަނޑިޔާރާއި މާލޭގެ ސުޕީރިއާ ކޯޓުތަކުގެ އިސް ފަނޑިޔާރުންގެ އިތުރުން ޖުޑިޝަލް ދާއިރާތަކުގެ އިސް މެޖިސްޓްރޭޓުންގެ ތެރެއިން ސުޕްރީމް ކޯޓުން އައްޔަންކުރާ ދެ މެޖިސްޓްރޭޓަކު ހިމެނިވަޑައިގަންނަވާ ގޮތަށެވެ
ކައުންސިލް ހިންގާ ގަވާއިދަށް މިއަދު އަމަލުކުރަން ފަށައިފައިވާއިރު އެ ގަވާއިދުގައިވާ ގޮތުން ކައުންސިލްގެ ރިޔާސަތު ބަލަހައްޓަވާނީ އުއްތަމަ ފަނޑިޔާރެވެ. އަދި ކައުންސިލްގެ ބައްދަލުވުމެއް ކޮންމެ ތިން މަހުން އެއް މަހު ބާއްވަން ޖެހޭނެއެވެ. ބައެއް ހާލަތްތަކުގައި ޖަލްސާ ބޭއްވުމުގެ ފުރުސަތު އޮންނާނެ ކަމަށް އެ ގަވާއިދުގައިވެއެވެ
ކޯޓުތަކާ ބެހޭ ގާނޫނު 2010 ގައި ވުޖޫދަށް އައުމާ އެކު، އެ ގާނޫނުގެ ދަށުން ޖުޑިޝަލް ކައުންސިލެއް އުފެދުނެވެ. އެކަމަކު ފަހުން ސުޕްރީމް ކޯޓުން ވަނީ އެ ކައުންސިލާ ބެހޭ ގޮތުން އެ ގާނޫނުގައި ހުރި މާއްދާތައް ބާތިލްކޮށް، އެ ކައުންސިލް ވެސް ބާތިލްކޮށްފައެވެ.
