ކައުންސިލްތައް ބާރުވެރިކުރުމަށް މިއަހަރު ޚާއްސަ އިސްކަމެއްދޭނަން: ފިނޭންސް މިނިސްޓްރީ

ލޯކަލް ކައުންސިލުތައް ބާރުވެރި ކުރުމަކީ 2019 ވަނަ އަހަރު ޚާއްސަ އިސްކަމެއްދީގެން ކުރާނެ ކަމެއް ކަމަށް ފިނޭންސް މިނިސްޓްރީން ބުނެފިއެވެ.

އެ މިނިސްޓްރީން 2019 ވަނަ އަހަރު ކުރަން ރާވާފައިވާ މުހިއްމު މަސައްކަތްތައް ބަޔާންކޮށް ބުދަ ދުވަހު ނެރުނު ނޫސްބަޔާނެއްގައި ބުނެފައިވަނީ، އެހެން އަހަރުތަކާއި ޚިލާފަށް މިއަހަރު މިނިސްޓްރީން އެންމެ ބޮޑު އިސްކަމެއްދީގެން ކުރާނެ އެއް މަސައްކަތަކީ ކައުންސިލުތައް ބާރުވެރި ކުރުމުގެ މަސައްކަތް ކަމަށެވެ.

އެގޮތުން ކައުންސިލުތައް ބާރުވެރި ކުރުވައި ފިސްކަލް ޑީސެންޓްރަލައިޒޭޝަނެއް ގެނައުމަށް މިނިސްޓްރީގައި އެކަމަށް ޚާއްސަ ޔުނިޓެއްވެސް އުފައްދަވާނެ ކަމަށާއި، އެކަމަށްޓަކައި މާލިއްޔަތު ޤާނޫނާއި ޤަވައިދުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތް މިހާރުވެސް ފަށާފައިވާ ކަމަށް އެ ބަޔާނުގައި ބުނެފައިވެއެވެ.

މީގެ އިތުރުން، ކައުންސިލްތައް ބާރުވެރި ކުރުމަށްޓަކައި ލޯކަލް ކައުންސިލު ތަކުގެ ޤާނޫނުގެ 104 ވަނަ މާއްދާގައި ބަޔާންކޮށްފައިވާ ފައިސާ ކައުންސިލުތަކަށް ދޭނެ ގޮތުގެ އުސޫލެއް ކަނޑައަޅައި، މިއަހަރުތެރޭގައި އެ ފައިސާވެސް ކައުންސިލުތަކާއި ހަވާލުކުރެވޭނެ ކަމަށް ބަޔާނުގައި ބުނެފައިވެއެވެ.

ރައީސް ސޯލިހްގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނނިގެން ސަރުކާރުން ނިންމާފައިވާ މުހިންމު ނިންމުންތަކުގެ ތެރޭގައި ކައުންސިލްތަކުން ނިގުޅައިގަނެފައިވާ ބާރުތައް އަލުން އަނބުރާ ސިޓީ ކައުންސިލްތަކާއި ހަވާލުކުރުން ހިމެނެ އެވެ. އެގޮތުން ކައުންސިލުތަކަށް ގިނަ ބާރުތަކެއް އަލުން އަނބުރާ ހަވާލު ކޮށްފައިވެސްވެއެވެ.