ދިޕިކާ އާއި ރަންވީރު ހަނީމޫނަށް ފުރައިފި

މިދިޔަ މަހު ކައިވެނި ކުރި ބޮލީވުޑްގެ ދެ ތަރިން ކަމަށްވާ ދިޕިކާ ޕަދުކޯން އާއި ރަންވީރު ސިންގް ވަނީ މުމްބާއި އެއަރޕޯޓުން ފެނިގެން ގޮސްފައެވެ.

އައު އަހަރު ފެށެން އެއްދުވަހަށް ވެފައިވަނިކޮށް އާދިއްތަ ދުވަހު މި ޖޯޑު ވަނީ މުމްބާއި އެއަރޕޯޓުން ޕަޕަރާޒީންނަށް ފެނިގެން ގޮސްފައެވެ. މި ޖޯޑު ފުރަނީ ހަނީމޫނަށް ކަމަށް ރިޕޯޓްތައް ބުނި ނަމަވެސް ދަނީ ކޮން ގައުމަކަށް ކަމެއް އެނގިފައެއް ނުވެއެވެ.

މި ދެމީހުން ވެސް އެއަރޕޯޓުން ފެނިގެން ގޮސްފައިވަނީ ކަޅުކުލައިގެ ހެދުމުގައެވެ.

ރަންވީރާއި ދިޕިކާ ކައިވެނި ކޮށްފައިވަނީ އިޓަލީގެ ލޭކް ކޯމޯގައެވެ. އެއަށް ފަހު މި ދެމީހުންގެ ކައިވެނީގެ ތިން ހަފްލާއެއް އިންޑިއާގައި ވަނީ ބާއްވާފައެވެ.

ރަންވީރު ކުޅެގފައިވާ ފިލްމް "ސިމްބާ" މިދިޔަ ހުކުރު ދުވަހު ރިލީޒް ކޮށްފައިވާއު ދެ ދުވަސް ތެރޭގައި އެ ފިލްމަށް ވަނީ އާމްދަނީގެ ގޮތުގައި 44 ކްރޯޑް އިންޑިއަން ރުޕީސް ލިބިފައެވެ. މި ދެމީހުން ހަނީމޫނަށް ފުރުމުގެ ކުރިން ދިޕިކާ ވަނީ "ސިމްބާ" ގެ ޚާއްސަ ސްކްރީނިންއަށް ގޮސްފައެވެ.

ދިޕިކާ މިވަގުތު ދަނީ މެގްނާ ގުލްޒާރުގެ ފިލްމް "ޗަޕާކް" ގެ މަސައްކަތް ކުރަމުންނެވެ. މި ފިލްމްގައި ދިޕިކާ އަދާކުރަނީ އެސިޑް އެޓޭކުން ސަލާމަތްވި ލަކްޝްމީ އަގަރުވާލްގެ ރޯލެވެ. ރަންވީރުގެ ކުރިއަށް ހުރި ފިލްމްތަކުގެ ތެރޭގައި ކަރަންޖޯހަރުގެ ފިލްމް "ތަޚްތް" ހިމެނެއެވެ. އެފިލްގައި ރަންވީރާއި އެކު ފެނިގެންދާނީ އާލިއާ ބަޓް އެވެ.