"އޭކް ލަޅްކީ ކޮ ދޭކާތޮ އެއިސާ ލަގާ" ގެ ފުރަތަމަ ޓްރެއިލާ ދައްކާލައިފިއެވެ.

މި ޓްރެއިލާ ފެށޭއިރު ފެނިގެންދަނީ ރާޖް ކުމާރު ވާހަކައެއް ކިޔައިދޭ މަންޒަރެވެ. އެ ވާހަކާގައި އޭނާ އަންހެން ކުއްޖަކު (ސޯނަމް) ދެކެ ލޯބިވާ ވާހަކަ ބުނެއެވެ. އެ އަންހެން ކުއްޖާގެ އާއިލާ އެކުއްޖާއާ ކައިވެނި ކުރުމަށްޓަކައި ރަނގަޅު ކުއްޖަކު ހޯދަން އުޅެއެވެ. އަދި އޭނާއާކައިވެނި ކުރުމަށް ވަރަށް ރަނގަޅު ކުދިންވެސް ލިބެއެވެ. ނަމަވެސް އެ އަންހެން ކުއްޖާ ބުނަމުން ދަނީ އޭނާގެ މައިންބަފައިން އޭނާ އާއި އިދިކޮޅުވާނެ ސިއްރު ކަމެއް އެބަ އޮތް ކަމަށެވެ. ޓްރެއިލާގައި އަންހެން ކުއްޖާ އެހެން އަންހެނަކާއި ގުޅުން އޮންނާ ކަމަށް ދައްކުވައިދެއެވެ. އެ އަންހެން ކުއްޖާ އެހެން އަންހެނަކު ދެކެ ލޯބިވާ ކަމުގެ އިޝާރާތެއް ފެނިގެންދެއެވެ.

މި ފިލްމްގެ ޕޯސްޓަރެއް ވަނީ އަނިލް ކަޕޫރުގެ 62 ވަނަ އުފަން ދުވަހު ރިލީޒް ކޮށްފައެވެ. އެ ޕޯސްޓަރުގައި ފެނިގެންދަނީ އަނިލްގެ ކޮނޑުގައި ސޯނަމް ބޯއަޅައިގެން އޮންނަ މަންޒަރެވެ. އެ ޕޯސްޓަރުން ބައްޕައާއި ދަރިފުޅުގެ ގުޅުން ފެނިގެންދެއެވެ.

މީގެ ކުރިން ވަނީ މި ފިލްމްގެ ޓީޒާ ވެސް ދައްކާލާފައެވެ. އެއް މިނެޓްގެ އެ ޓީޒާ ފެށޭއިރު ފެނިގެންދަނީ 1994 ވަނަ އަހަރު އަނިލް ކަޕޫރު ކުޅެފައިވާ ފިލްމް 1942 – އަ ލަވްސްޓޯރީގެ ބައެއް މަންޒަރު ތަކެވެ. އަދި ފަހުބައިގައި ދައްކުވައިދެވީ ސޯނަމް އާއި ރާޖް ކުމަރުގެ ލަވް ސްޓޯރީއެވެ.

އަނިލް ކަޕޫރާއި އޭނާގެ ދަރިފުޅު ސޯނަމް ކަޕޫރު ފުރަތަމަ ފަހަރަށް ފިލްމަކުން އެކުގައި ފެނިގެންދާ މި ފިލްމްގައި ދެ ބަފައިންގެ އިތުރުން ދެން ފެނިގެންދަނީ ޖޫހީ ޗާވްލާ އާއި ރާޖް ކުމާރު ރާއޯ އެވެ.

 ޝެލީ ޗޯޕްރާ ޑައިރެކްޓްކޮށްފައިވާ މި ފިލްމް ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހުގެ އެއްވަނަ ދުވަހު އެވެ.