ސައުދީގެ ކެބިނެޓަށް ބޮޑެތި ބަދަލުތަކެއް ގެންނަނީ
28 ޑިސެމްބަރު 2018 | ހުކުރު 06:20ފޮރިން މިނިސްޓަރުވެސް ބަދަލުކުރަން ވަނީ ނިންމާފައި
ސައުދީ ކެބިނެޓް ބައްދަލުވުމެއްގެ ތެރެއިން
ސައުދި އަރަބިއާގެ ކެބިނެޓަށް ބޮޑެތި ބަދަލުތަކެއް ގެންނަން ނިންމައިފިއެވެ.
ދަ ގާޑިއަންއިން ބުނީ، ސައުދީގެ ކެބިނެޓުގެ ބައެއް މަގާމުތަކަށް ބޮޑެތި ބަދަލުތަކެއް ގެންނަވަން ކިންގް ސަލްމާން އަމުރުކުރައްވާފައިވާ ކަމަށާއި، އެގޮތުން އާ ފޮރިން މިނިސްޓަރެއް ވެސް ކަނޑައެޅުއްވުމަށް ނިންމަވާފައިވާ ކަމަށެވެ.
މީގެ އިތުރުން ސައުދީ ސަރުކާރުގެ ދިފާއީ ކައުންސިލާއި، އިގްތިސާދީ ކައުންސިލަށް ވެސް ބަދަލުތަކެއް ގެންނަން ކިންގް ސަލްމާން ވަނީ ނިންމަވާފައި ކަމަށް ދަ ގާޑިއަންއިން ވަނީ ބުނެފައެވެ.
ކިންގް ސަލްމާން ވަނީ ދާދި ފަހުން ސައުދީގެ އިންޓެލިޖެންސް ހިދުމަތްދޭ އިދާރާތަކަށްވެސް ބަދަލުތަކެއް ގެންނަން ނިންމަވާފައެވެ. އެގޮތުން އިންޓެލިޖެންސް އިދާރާތަކުގެ މަސައްކަތް ބެލުމަށް ސަރުކާރުގެ އައު ތިން ވުޒާރާއެއް އުފެއްދުމަށްވެސް ވަނީ ނިންމަވާފައެވެ.
ތަޖުރިބާކާރުން ބުނާ ގޮތުގައި މިއީ، ތުރުކީގައި ހުންނަ ސައުދީ ކޮންސުލޭޓް ތެރޭގައި މަރާލެވުނު ނޫސްވެރިޔާ ޖަމާލް ހާޝޯގީގެ މަރުގެ ތުހުމަތު ސައުދީ ވަލީއަހުދު މުހައްމަދު ބިން ސަލްމާނަށް ކުރެވޭތީ، އެ ތުހުމަތުން ވަލީއަހުދު ސަލާމަތް ކުރަން ގެނެވޭ ބަދަލުތަކެވެ.
ހަޝޯގީ މަރާލެވުނު އިރު ސައުދީ ދިފާއީ ބާރާއި އިންޓެލިޖެންސްގެ ހިދުމަތް ހިންގަމުން ގެންދިޔައި ސީދާ ވަލީއަހުދުގެ ބެއްލެވުމުގެ ދަށުންނެވެ. އަދި ސައުދީ އާއި ތުރުކީން ވެސް މި ގަތުލުގެ މޭސްތިރި ކަމުގައި ބުނާ އަހްމަދު އަލް-އަސީރީއަކީ އޭރު ސައުދީގެ ޑެޕިއުޓީ އިންޓެލިޖެންސް ޗީފްއެވެ. ޙަޝޯގީގެ މަރަށް ފަހު އެނާ ވަނީ މަގާމުން ވަކިކޮށްފައެވެ.
ހަޝޯގީ މަރާލާފައި ވަނީ ތުރުކީގެ އިސްތަންބޫލްގައި ހުންނަ ސައުދީ އަރަބިއްޔާގެ ކޮންސިއުލޭޓް ތެރޭގައި އޮކްޓޫބަރު މަހުގެ ދެ ވަނަ ދުވަހުއެވެ. އެ ޖަރީމާގައި ވަލީއަހުދު މުހައްމަދުގެ އެއްވެސް ބައިވެރިވުމެއް ނުވާ ކަމަށް ސައުދީގެ ކަމާބެހޭ ފަރާތްތަކުން ވަނީ ތަކުރާރުކޮށް ބުނެފައެވެ.
