ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދާ ޕީޕަލްސް ނޭޝަނަލް ކޮންގްރެސް (ޕީއެންސީ) 3000 މެމްބަރުން ސޮއިކޮށްފި ކަމަށް އެ ޕާޓީ އުފެއްދުމުގެ ހުއްދައަށް އެދުނު ރައްޔިތުންގެ މަޖިލީހުގެ ފޮނަދޫ ދައިރާގެ މެމްބަރު އަބްދުއްﷲ އަބްދުއްރަހީމް ވިދާޅުވެއްޖެ އެވެ.  

ޕީޕަލްސް ނޭޝަނަލް ކޮންގްރެސް (ޕީއެންސީ) ނަމުގައި އުފައްދަން މަސައްކަތްކުރާ ޕާޓީ އުފެއްދުމުގެ ހުއްދަ ލިބުނުތާ ކުޑަ ވަގުތުކޮޅެއްގެ ތެރޭގައި 3000 މެމްބަރުން އެ ޕާޓީއަށް ސޮއި ކޮށްފައިވާ ކަމަށް އަބްދުއްރަހީމް ވިދާޅުވި އެވެ. ފުރަތަަމަ ޕީޕީއެމްގެ މެމްބަރެއްގެ ގޮތުގައި ހުންނަވައި އާ ޕާޓީ އުފެއްދުމަށް ހުށަހެޅުއްވުމުން، އީސީން ހުއްދައެއް ނުދިނެވެ. އެހެންވެ، ޕާޓީ އުފެއްދުމަށް އަބްދުއްރަހީމް ހުށަހެޅުއްވީ ޕީޕީއެމްއިން ވަކިވުމަށް ފަހު އެވެ. 

ޕާޓީގެ ފުރަތަމަ ޖަލްސާ ބޭއްވުމަށް އިލެކްޝަންސް ކޮމިޝަނުން ހުއްދަ ދޭނީ އެ ޕާޓީއަށް ވަނުމަށް އެދިފައިވާ 3000 މީހުންގެ ފޯމް އެ ކޮމިޝަނަށް ހުށައެޅުމުންނެވެ. އެކަން ކުރުމަށް ތިން މަސް ދުވަސް ލިބެ އެވެ. އާ ސިޔާސީ ޕާޓީއެއް އުފެއްދުމުގެ މަސައްކަތް ޔާމީން ފައްޓަވާފައި ވަނީ ޕީޕީއެމްގެ މައްސަލަ ސުޕްރީމް ކޯޓުގައި ވަނިކޮށެވެ. އެ މައްސަލަ ކޯޓް ނިމި، ޕާޓީ ލިބޭނެ ފަރާތެއް ނޭނގޭއިރު، އާ ޕާޓީއެއް އުފެއްދުން މުހިންމު ކަމަށް ރައީސް ޔާމީން އަރިހުގައި ތިއްބެވި ބޭފުޅުން ވިދާޅުވެއެވެ.

އާ ޕާޓީއެއް އުފެއްދުމަށް މިހާރު ޕީޕީއެމްގެ ލީޑަރޝިޕްގައި ތިއްބެވި ބޭފުޅުން މަސައްކަތްކުރައްވާއިރު، ޕީޕީއެމްގެ ފަރާތުން މަޖިލީހުގެ އިންތިޚާބަށް ވާދަކުރުމަށްޓަކައި 42 މީހަކަށް ވަނީ ޓިކެޓް ދީފަ އެވެ. ސުޕްރީމް ކޯޓްގައި މިހާރު އޮތް މައްސަލަ ޔާމީނަށް ކާމިޔާބު ނުވެއްޖެ ނަމަ، މަޖިލީހުގެ އިންތިޚާބުގައި ވާދަކުރެއްވުމަށް ޕީޕީއެމްގެ ޓިކެޓް ދީފައިވާ މެމްބަރުން ބަދަލުވާނީ އާ ޕާޓީއަށް ކަމަށް ޔާމީން ވަނީ ވިދާޅުވެފައެވެ