ސުނާމީން އިބުރަތް ލިބިގަނެ މުސްތަގުބަލު އުޖާލާ ކުރަންޖެހޭ:ހޯމް މިނިސްޓަރު
26 ޑިސެމްބަރު 2018 | ބުދަ 07:50އޯގާތެރިކަމާއި ކުލުނު ދިވެހިންގެ ތެރޭގައި އާކުރަންޖެހޭ
ހޯމް މިނިސްޓަރ ޝެއިހް އިމްރާން
ސުނާމީ ކާރިސާއަކީ ދިވެހިންގެ އެއްބައިވަންތަކަން ވަރަށް ބޮޑަށް ފެނިގެން ދިޔަ ދުވަހެއް ކަމެއް ކަމަށާއި އެކަމުން އިބުރަތް ލިބިގަނެ މުސްތަގުބަލު އުޖާލާ ކުރަންޖެހޭ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރ އިމްރާން ދުވާފަރުގައި ނޫސްވެރިންނާ ވާހަކަ ދައްކަވަމުން ވިދާޅުވީ 2004 ވަނަ އަހަރު ޑިސެމްބަރު 26 ވަނަ ދުވަހު އެރި ސުނާމީގައި ވަރަށް ބޮޑު ހިތާމައަކާއި ހިތްދަތިކަމެއް ލިބުނު ކަމަށެވެ. އެކަމުން އަރައިގަތުމަށް ރައްޔިތުން ކުރި މަސަތްކަތަކީ އެކަމަށް ޝުކުރު ހައްގުވާފަދަ މަސަތްކަތެއްކަމަށް އޭނާ ވިދާޅުވި އެވެ.
ސުނާމީގައި އައްޑިހަ ދެ މީހުން މަރުވެ، 26 މީހަކު ގެއްލިފައިވާއިރު، އިމްރާން ވިދާޅުވީ، އެ ހާދިސާ ލޯ ކުރިމަތިން ފެންނަން ނެތް ކަމުގައިވިޔަސް އެކަމުގެ އިހްސާސްތަކާއި އަސަރުތައް ދިވެހިންގެ ތެރޭގައި އެބަހުރިކަމަށާއި އެކަމުން އިބުރަތް ލިބި އޯގާތެރިކަމާއި ކުލުނު ދިވެހިންގެ ތެރޭގައި އާކުރަންޖެހޭނެ ކަމަށެވެ.
ދިވެހިންނަށް ދިވެހިންގެ ގޮތުގައި ތިބެވެނީ އޮންނަ އެއްބައިވަންތަކަމާއި، އެކުވެރިކަމާއި، އޯގާތެރިކަމުގެ ސަބަބުންކަން ފާހަގަކުރައްވާ މިނިސްޓަރ ވިދާޅުވީ ސުނާމީ އެރި ދުވަހުގެ ޒިކުރާ އާކުރަމުން ގައުމު އާރާސްތުކޮށް ބިނާ ކުރުމަށް މަސަތްކަތް ކުރަންޖެހޭކަމަށެވެ. ދުވާފަރުގެ ރައްޔިތުންނަކީ ވަރަށް އެކުވެރި އެއްބައިވަންތަ ބައެއް ކަމަށާއި ރާއްޖޭގެ ހުރިހާ ރައްޔިތުންވެސް ސުނާމީން އިބުރަތް ލިބިގަނެ ހުރިހާ ދިވެހިންނަކީ ވެސް އެއްބައިވަންތަ ބައެއް ކަމުގައިވެ އެކުވެރިކަމާއިއެކު މުސްތަގުބަލު އުޖާލާ ކުރަންޖެހޭކަމަށް މިނިސްޓަރު ވިދާޅުވި އެވެ.
ންޑޮނޭޝިއާގެ ސުމަޓްރާ ކައިރިއަށް އައި ބާރުގަދަ ބިންހެލުމަކާއެކު، ޑިސެމްބަރު 26، 2004 ގައި ސުނާމީ އަރައި ރާއްޖެއިން ވެސް ގިނަ ބަޔަކު މަރުވެ، ގިނަ ރަށްތަކެއް ސުންނާފަތިވި އެވެ. ސުނާމީ އެރި ދުވަހުގައި ދިވެހިން ދެއްކި އެއްބައިވަންތަކަމާ ގުޅިގެން، އެ ދުވަސް މިހާރު ފާހަގަ ކުރަނީ ގައުމީ އެއްބައިވަންތަކަމުގެ ދުވަހުގެ ގޮތުގަ އެވެ.
