މުސްތަގުބަލުގައި ތިލަފުށި ވެގެންދާނީ އިގްތިސާދުގެ އެންމެ ބޮޑު ހިއްސާދާރަށް: އެމްޑީ އިބްރާހިމް ރަޝީދު

މުސްތަގުބަލުގައި ކ. ތިލަފުށި ވެގެންދާނީ އިގްތިސާދުގެ އެންމެ ބޮޑު ހިއްސާދާރަށް ކަމަށް މާލެ އިންޑަސްޓްރިއަލް ޒޯން ލިމިޓެޑްގެ މެނޭޖިން ޑިރެކްޓަރު (އެމްޑީ) އިބްރާހިމް ރަޝީދު އަބޫބަކުރު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އެމްޑީ އިބްރާހިމް ރަޝީދު ވިދާޅުވީ ސިނާއީ ގިނަ މަސައްކަތްތައް ތިލަފުށީގައި މިހާރު ވެސް ކުރަމުން ގެންދާ ކަމަށާއި، މުސްތަގުބަލުގައި އިގްތިސާދު ބޮޑު ހިއްސާދާރަކަށް ވެގެންދާނެ ކަމަށެވެ. އަދި މަސައްކަތްތެރިން ނިދަން ދާ ރަށަކަށް ބަދަލުވެގެންދާނެ ކަމަށެވެ.

އިބްރާހިމް ރަޝީދު ވިދާޅުވީ 4000 އެއްހާ މީހުން ތިލަފުށީގައި ދިރިއުޅެމުންދާއިރު، ކޮންމެ ދުވަހަކު 1900 އަށްވުރެ ގިނަ މީހުން ގޮސްއައިސްވާ ކަމަށާއި، އެމްޓީސީސީގެ ފެރީގެ ޚިދުމަތް ވެސް ލިބޭ ކަމަށެވެ.

އެހެންކަމުން ތިލަފުށިން ކޮންމެހެން ލިބެންޖެހޭ ޚިދުމަތްތައް ދެވޭނެ މަގުތަނަވަސްކޮށް އެޚިދުމަތްތައް ގާއިމް ކުރުމުގެ މަސައްކަތް ކުރަމުންދާ ކަމަށް އިބްރާހިމް ރަޝީދު ވިދާޅުވިއެވެ.

އިބްރާހިމް ރަޝީދު ވިދާޅުވީ ތިލަފުށީގައި މަސައްކަތް ކުރާ މީހުންނާއި ދިރިއުޅޭ މީހުންނަށް ދިމާވާ އަނެއް ދައްޗަކީ ފައިސާ ނެގުމަށް ދިމާވާ ދަތިކަން ކަމަށާއި، މިމައްސަލަ ހައްލުކުރުމުގެ މަސައްކަތް ފަށާފައިވާ ކަމަށެވެ.

އެގޮތުން މިދިޔަ ހަފްތާ ތެރޭގައި އޭޓީއެމްއެއް ގާއިމް ކުރުމުގެ މަސައްކަތް އަންގާރަ ދުވަހު ފަށާފައިވާ ކަމަށާއި، 10 ދުވަހުގެ ތެރޭގައި އިމާރާތް ނިންމޭނެ ކަމަށް އިބްރާހިމް ރަޝީދު ވިދާޅުވިއެވެ. އޭނާ ވިދާޅުވީ އޭގެ މައްޗަށް 10 ދުވަސްވާއިރު އެތަނުގައި އޭޓީއެމް ހަރުކުރެވި ޚިދުމަތް ދިނުމަށް މަސައްކަތް ކުރަމުންދާ ކަމަށެވެ. އަދި ވިދާޅުވީ އަންނަ މަހުގެ ފުރަތަމަ 10 ނިމުމުގެ ކުރިން ތިލަފުށީގަ އޭޓީއެމްއެއް ގާއިމް ކުރެވި ފައިސާގެ މުއާމަލާތް ކުރެވޭނެ ކަމަށެވެ.

ގުޅީފަޅަށް އަލިއަޅުއްވާލައްވާ އިބްރާހިމް ރަޝީދު ވިދާޅުވީ މަސައްކަތު މީހުން ނުވަތަ ކުންފުނިތަކުގައި ގެންގުޅޭ މަސައްކަތްތެރިން ނުވަތަ ވަޒީފާގަ އުޅޭ މީހުން އެޕާޓްމެންޓް މިހާރު ވެސް ގުޅީފަޅުން ދޫކުރާ ކަމަށާއި، އެޕާޓްމެންޓްތައް ދޫކުރަނީ ވަރަށް ކުޑަކުޑަ އަގެއްގައި ކަމަށެވެ. އެއީ މަސައްކަތްތެރިންނަށް ލުއި ފަސޭހަގޮތްތައް ހޯދައިދީ، މާލެ ތޮއްޖެއްސުން ކުޑަކުރުމުގެ ގޮތުން ކުރާ ކަމެއް ކަމަށް އިބްރާހިމް ރަޝީދު ވިދާޅުވިއެވެ.

އިބްރާހިމް ރަޝީދު ވިދާޅުވީ ގުޅީފަޅާއި، ތިލަފުށި ތަރައްގީ ކުރުމަށް ޕްލޭން އެކުލަވާލެވިފައިވާ ކަމަށާއި، ޕްލޭންއާ އެއްގޮތަށް މަސައްކަތްތައް ކުރިއަށްދާ ކަމަށެވެ. އެގޮތުން 2025 ވަނަ އަހަރަށް މާސްޓަރ ޕްލޭން ހަދާފައިވާ ކަމަށް އިބްރާހިމް ރަޝީދު ވިދާޅުވިއެވެ.