ދުވަހަކު ވެސް ޓްރެފިކް ކުށެއް ނުކުރާތީ އަގުވަޒަންކޮށްފި

ޔުނައިޓެޑް އަރަބް އެމިރޭޓްސް (ޔޫއޭއީ)ގައި އުމުރުން 79 އަހަރުގެ މީހަކު ޓްރެފިކް ކުށަކަށް އަރައިނުގަނެ 49 އަހަރު ހޭދަކުރުމުން އެކަން އެގައުމުގެ ފުލުހުން ފާހަގަކޮށް، އަގުވަޒަންކޮށްފި އެވެ.

ސައީދް ރަޝީދު އަހްމަދު ބަލްހަންގެ އަގުވަޒަންކޮށް ހަނދާނީ ލިޔުމެއް އެގައުމުގެ ފުލުހުން ދީފައިވަނީ ހޯމަ ދުވަހުއެވެ.

ޓްރެފިކް ގަވާއިދަށް އަމަލުކުރާ ޑްރައިވަރުންގެ އަގުވަޒަން ކުރުމުގެ ގޮތުން ކުރިއަށް ގެންދާ އޮޕަރޭޝަނުގެ ދަށުން ބަލްހަންގެ އަގުވަޒަން ކޮށްފައިވާއިރު، އޭނާ އަކީ ހުރިހާ ޑްރައިވަރުންނަށް ނަމޫނާއެއް ކަމަށް ފުލުހުން ބުންޏެވެ.

ބަލްހަންގެ ޑްރައިވިންގް ލައިސެންސް އޭނާ ނަގާފައިވަނީ މީގެ 49 އަހަރު ކުރިންނެވެ.

ލައިސެންސް ނެގި ދުވަހުން ފަށައިގެން މިހާތަނަށް އެއްވެސް ވަރަކަށް ޓްރެފިކް ކުށުގެ ރިކޯޑްއެއް ބަލްހަންގެ ނެތް ކަމަށާއި، އޭނާ ފަދަ ޑްރައިވަރުންނަކީ މަގުތަކުގެ ސަލާމަތާއި ރައްކާތެރި ކަމާއި މެދު ވަރަށް ބޮޑަށް ވިސްނާ ބައެއް ކަމަށް ފުލުހުން ބުންޏެވެ.

މި ކަމާއި ބެހޭ ގޮތުން ސައީދުގެ ދަރިފުޅު ރަޝީދު ޔޫއޭއީގެ ''ހަލީޖް ޓައިމްސް'' އަށް ދިން އިންޓަވިއުއެއްގައި ބުނީ، އޭނާގެ ބައްޕައާ މެދު ވަރަށް ފަހުރުވެރިވާ ކަމަށާއި، ބައްޕަ އަކީ ކުރާ ކަމެއް ވަރަށް ފަރުވާތެރިކަމާއި އެކު ކުރާ މީހެއް ކަމަށެވެ. ބައްޕަގެ ފަރާތުން މި ކަހަލަ ގިނަ ކަންތައްތައް ތަކެއް ދަސްވެފައިވާކަމަށާއި، ބައްޕަގެ ނަން ގިނިސް ވޯލްޑް ރިކޯޑް ފޮތަށް އަރަން ޖެހޭ ކަމަށް ރަޝީދު ބުންޏެވެ.